އިނގިރޭސި ބޮޑުވަޒީރު ސަރ ކިއާ ސްޓާމަރާ ދެކޮޅަށް، ލޯޑް މެންޑެލްސަންގެ މަގާމުގެ ވެޓިންގް މަރުހަލާއާ ގުޅޭގޮތުން މަޖިލީހަށް ދޮގު މައުލޫމާތު ދެއްވި ކަމަށް ބުނާ މައްސަލައިގައި ތަހުގީގެއް ހިންގުމާ މެދު އިނގިރޭސި ގާނޫނު ހަދާ މަޖިލީހުގައި މިއަދު ވޯޓަށް އެހުމަށް ނިންމައިފި އެވެ.
މަޖިލީހުގެ ރައީސް ސަރ ލިންސޭ ހޮއިލް ވިދާޅުވީ މި މައްސަލައިގައި ބަހުސް ކުރުމުގެ ފުރުސަތު އަންގާރަ ދުވަހު ދެއްވާނެ ކަމަށާއި، ޕްރިވިލެޖަސް ކޮމިޓީން މިކަން ތަހުގީގު ކުރަން ފެނޭތޯ ނިންމާނީ މެންބަރުންގެ ވޯޓުން ކަމަށެވެ. އެމެރިކާގައި ހުންނަވާ އިނގިރޭސި ސަފީރުގެ މަގާމަށް ލޯޑް މެންޑެލްސަން އައްޔަން ކުރުމުގައި އުސޫލުތަކާ އެއްގޮތަށް އަމަލުކޮށްފައިވާ ކަމަށާއި، ފޮރިން އޮފީހުގެ އޮފިޝަލުންނަށް އެއްވެސް ނުފޫޒެއް ފޯރުވާފައި ނުވާނެ ކަމަށް ބޮޑުވަޒީރު ވިދާޅުވި ވިދާޅުވުމަކީ އިތުރުފުޅެއް ކަމަށް އިދިކޮޅު ފަރާތްތަކުން ތުހުމަތު ކުރެ އެވެ.
ބޮޑުވަޒީރު ސްޓާމަރ މި ތުހުމަތުތައް ދޮގުކުރައްވައި، މިއީ ކޮންޒަވޭޓިވް ޕާޓީން ހިންގާ ސިޔާސީ "ސްޓަންޓެއް" ކަމަށް ވަނީ ސިފަކުރައްވާފަ އެވެ. އަދި ލޭބަރ ޕާޓީގެ މެންބަރުންނާ ބައްދަލުކުރައްވައި، މިއީ ސިޔާސީ ކަމެއް ކަމަށާއި އެންމެން އެކަތިގަނޑަކަށް ވެގެން މިކަމާ ދެކޮޅަށް ތެދުވުމަށް އެމަނިކުފާނު ވަނީ ގޮވާލައްވާފަ އެވެ. ބީބީސީން ރިޕޯޓްކުރާ ގޮތުގައި، މި ވޯޓުގައި ބޮޑުވަޒީރާ ދެކޮޅަށް ވޯޓު ދިނުމަށް ލޭބަރ ޕާޓީގެ މެންބަރުންނަށް "ވިޕް" އެއް ނެރުމަކީ ވަރަށް އެކަށީގެންވާ ކަމެކެވެ.
ކޮންޒަވޭޓިވް ޕާޓީގެ ލީޑަރު ކެމީ ބޭޑެނޮކް ވިދާޅުވީ ބޮޑުވަޒީރު ވަނީ މި މައުލޫއުގައި މަޖިލީހަށް އެތައް ފަހަރަކު އޮޅުވާލައްވާފައި ކަމަށެވެ. އަދި ލޭބަރ ޕާޓީގެ މެންބަރުން އެ ބޭފުޅުންގެ އަމިއްލަ ނަފްސާ ސުވާލުކޮށް، މި މައްސަލަ ތަހުގީގު ކުރުމަށް ތާއީދު ކުރުމަށް އޭނާ ގޮވާލެއްވި އެވެ. ނަމަވެސް ޑައުނިންގް ސްޓްރީޓުން ބުނެފައިވަނީ މެންޑެލްސަންގެ އައްޔަން ކުރުމާ ގުޅޭގޮތުން މިހާރުވެސް ހިނގަމުންދާ ދެ މަރުހަލާއަކަށް ސަރުކާރުން ފުރިހަމައަށް އެއްބާރުލުން ދެމުންދާ ކަމަށެވެ.
މި މައްސަލައިގައި ފޮރިން އޮފީހުގެ ސެކިއުރިޓީގެ އިސްވެރިޔާ އިއާން ކޮލާޑް ދެއްވި ބަޔާނެއްގައި ބުނެފައިވަނީ، ލޯޑް މެންޑެލްސަންގެ ވެޓިންގް މަރުހަލާ އަވަސް ކުރުމަށް ބޮޑުވަޒީރުގެ އޮފީހުން ތަކުރާރުކޮށް ގުޅަމުން ދިއުމުގެ ސަބަބުން "ޕްރެޝަރު" އިހުސާސް ކުރެވުނު ކަމަށެވެ. ނަމަވެސް އެ ޕްރެޝަރުގެ ސަބަބުން އޭނާގެ ނިންމުމަށް އެއްވެސް ބަދަލެއް އައިސްފައި ނުވާ ކަމަށްވެސް އޭނާ ފާހަގަކުރެއްވި އެވެ.
މަޖިލީހުގެ އަގުލަބިއްޔަތު ލޭބަރ ޕާޓީއަށް އޮތުމުން، މި ތަހުގީގު ކުރިއަށް ގެންދެވޭނީ އެ ޕާޓީގެ ގިނަ އަދަދެއްގެ މެންބަރުން ސަރުކާރާ ދެކޮޅަށް ވޯޓު ދީގެންނެވެ. ކެބިނެޓް މިނިސްޓަރުން މިހާރުވެސް ގެންދަވަނީ މެންބަރުންނަށް ގުޅުއްވައި ބޮޑުވަޒީރުގެ ދިފާއުގައި ވޯޓު ދިނުމަށް ބާރުއަޅުއްވަމުންނެވެ. އިނގިރޭސި ގާނޫނުތައް ބުނާގޮތުން، ގަސްތުގައި މަޖިލީހަށް ދޮގު މައުލޫމާތު ދޭ ވަޒީރުން މަގާމުން އިސްތިއުފާ ދޭން ޖެހޭނެ އެވެ. ޕްރިވިލެޖަސް ކޮމިޓީއަކީ މީގެ ކުރިން ކުރީގެ ބޮޑުވަޒީރު ބޮރިސް ޖޯންސަން މަޖިލީހަށް އޮޅުވާލެއްވި ކަމަށް ނިންމި ކޮމިޓީ އެވެ.
