ވެރިކަންކުރާ ޕީއެންސީގެ ތެރޭގައި ހިމޭން އިނގިލާބެއް ހިނގަމުންދާ ކަމަށް ވިދާޅުވެ ކުރީގެ ރައީސް އަބްދުالله ޔާމީން ދެއްކެވި ވާހަކަތަކަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله ރައްދު ދެއްވައިފި އެވެ.
ޕީޕަލްސް ނޭޝަނަލް ފްރަންޓު (ޕީއެންއެފް) ގެ އޮފީހުގައި ބުރާސްފަތި ރޭ ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ ބޭރު ފައިސާއާ ބެހޭ ގާނޫނަށް ގެނައި ބަދަލުތަކާމެދު ހިތްހަމަނުޖެހޭ އެތައް ބަޔަކު ޕީއެންސީގެ މަޖިލިސް މެންބަރުންގެ ތެރޭގައި އެބަތިބި ކަމަށެވެ. އެ ވާހަކަތަކަށް އަބްދުއްރަހީމް ރައްދު ދެއްވީ މިރޭ ބޭއްވި ޕީއެންސީ ޖަގަހަ ޖަލްސާގަ އެވެ.
"މަޖިލީހުގެ ތެރެއިން އެއް ކަމެއް ވެސް ނުކުރެވޭނެ، ބައިބައެއް ނުކުރެވޭނެ. މޮޅު ވާހަކަ ދައްކާނެ ކަމެއް ނެތް. ރައްޔިތުންގެ މަޖިލީހުގައި ތިބި ހުރިހާ މެންބަރުން މި ތިބީ އެކީގައި ބަނދެލާފައި އޮތް ދަރުބޮނޑިއެއްހެން ގަދަކޮށް. އެކަތައިގެ ފާރެއްހެން ގަދަކޮށް ރައީސް މުއިއްޒުއާއެކު މިތިބީ. ރައީސް ޔާމީން ޖެހޭނީ ޖަމީލާ މަލީހުއާ ގޮވައިގެން މަހަށް ދާން،" އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވި ގޮތުގައި ރައީސް މުހައްމަދު މުއިއްޒުއަށް ދެވަނަ ދައުރެއް ހޯދައިދިނުމަށް އޭނާ ނުކުމެވަޑައިގެން ހުންނެވީ "ފިސާރި ގަދަކޮށް" އެވެ. މަޖިލިސް މެންބަރުން ތިބީ ވަރަށް އެކުގައި ކަމަށް ތަކުރާރުކޮށް ވިދާޅުވި އެވެ.
މަޖިލިސް މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީއަށް ގެނައި ބަދަލުގެ ސަބަބުން، ޕީއެންސީގެ މެންބަރުންނަށް އިހުސާންތެރިކަމެއް ހިތުގައި ނެތް ކަމަށް ޔާމީން ވިދާޅުވި އެވެ.
"އެތަނުގައި މިހާރު އެ ހިނގަނީ ހަމަ ވަރަށް ސައިލެންޓްކޮށް ހިނގާ އިންގިލާބެއް އެ ހިނގަނީ އިނގޭތޯ؟ ﷲ މިންވަރުކުރައްވާށި، ދާދި ފަސޭހައިން މި ހާލަތު ބަދަލުވެގެންދާތަން އަޅުގަނޑުމެން ބަލަން ތިބޭނަން،" ޔާމީން ވިދާޅުވި އެވެ.
ޔާމީން އެހެން ވިދާޅުވިއިރު، ޕީއެންސީގެ އެތެރޭގައި ހިޔާލުތަފާތުވުންތަކެއް އުޅޭކަމުގެ އަޑުތައް ސޯޝަލްމީޑިއާގައި ވެސް ވަނީ ފެތުރިފަ އެވެ. އެހެންނަމަވެސް، އެއީ ކަނޑައެޅިގެން ދޮގެއް ކަމަށް ވިދާޅުވެ ޕީއެންސީގެ މަޖިލިސް މެންބަރުން ގެންދަވަނީ ރައްދު ދެއްވަމުންނެވެ.
