ކުރީގެ ރައީސް އަބްދުﷲ ޔާމީން މިނިވަންވުމުން ހިތާމަކުރަން ޖެހޭ ކަމަށް ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމަންޓްރީ ގްރޫޕްގެ ލީޑަރު އިބްރާހިމް ފަލާހު މިއަދު ވިދާޅުވެއްޖެ އެވެ.
ފަލާހް އެކްސް ކުރެއްވި ޕޯސްޓެއްގައި ވިދާޅުވީ ޔާމީނު ފަދަ ހާއިނަކު ގޭގައި އިނުމުގެ ފުރުސަތު ލިބިފައިވުމަކީ ހިތާމަހުރި އަދި އެކަމާ ގައުމުވެސް ލަދުވެތިވާ ކަމެއް ކަމަށެވެ. އޭނާ ވިދާޅުވީ އެމްޑީޕީއާ ގުޅިގެން ސަރުކާރު ވައްޓާލަން ޔާމީނު ކުރާ މަސައްކަތުން ހާމަވަނީ އެމަނިކުފާނު ދައްކާ ވާހަކަ އާއި އަމަލު ދިމާނުވާ މިންވަރު ކަމަށެވެ.
"ފަހަކަށް އައިސް އެމްޑީޕީއާއި ގުޅިގެން ސަރުކާރު ވައްޓާލަން ޔާމީނު ކުރަމުންދާ މަސައްކަތުން ހާމަވަނީ ޔާމީނު ދައްކާ ވާހަކައާއި އަމަލާއި ދިމާނުވާމިންވަރު. މިއަދުވެސް ޔާމީނު ފަދަ ހާއިނަކަށް ގޭގައި އިނުމުގެ ފުރުސަތު ލިބިފައިވުމަކީ ހިތާމަހުރި އެކަމާ ގައުމުވެސް ލަދުވެތިވާ ކަމެއް،" ފަލާހު ވިދާޅުވި އެވެ.
މީގެއިތުރުން ރިސޯޓުތަކަށް ލިބޭ އާމްދަނީގެ 40 ޕަސަންޓު މާރުކުރުމާ ރިސޯޓުތަކުން ދެކޮޅު ހަދަން ޔާމީން ގޮވާލެއްވުމާ ގުޅިގެން އެކަމަށް ރައްދު ދެއްވައި ފަލާހު ވިދާޅުވީ ވެރިކަން ކޮށްފައިވާ ވެރިޔަރު ރާއްޖޭގައި ހެދިފައިވާ ގާނޫނުތަކާއި ހިލާފުވާން ރައްޔިތުންނަށް ގޮވާލުމަކީ ވަރަށް ބޮޑު ކުށަކަށް ދައުވަތު ދެއްވުން ކަމަށެވެ.
ފަލާހު ވިދާޅުވީ ޔާމީނުގެ ނުބައިކަމާއި އަމިއްލަ އެދުމުގެ ބޮޑުކަން ވެރިކަމަށް އޮތް ދަހިވެތިކަމާއި ހަސަދަވެރިކަން ހާމަވަމުންދާ ކަމަށާއި އެމަނިކުފާނު ދައުތުން ވަގަށް ނަގާފައިވާ ޑޮލަރުތައް ދައުލަތަށް ހޯދިއްޖެނަމަ، މިހާރުން މިހާރަށް ޑޮލަރުގެ މައްސަލަވެސް ހައްލުވެގެންދާނެ ކަމަށެވެ.
މި ސަރުކާރުން ވެރިކަމަށް އައީ ޔާމީނު މިނިވަންކުރުމުގެ ވައުދާއެކީގަ އެވެ. އެގޮތުން ގިނަ ބަޔަކު މުއިއްޒަށް ވޯޓު ދެއްވީ އެއީ އޭރު އެމަނިކުފާނު ދެއްކެވި ކެންޑިޑޭޓަށްވުމުންނެވެ. ރިޔާސީ އިންތިހާބުގައި ޔާމީނަށް ވާދަނުކުރެއްވުނީ ޖަލު ހުކުމެއް ތަންފީޒު ކުރަމުންދިޔުމާ ގުޅިގެންނެވެ.
2023 ވަނަ އަހަރު ބޭއްވި ރިޔާސީ އިންތިހާބު މުއިއްޒު ކާމިޔާބުކުރެއްވުމާއެކު އޭރުގެ ރައީސް އިބްރާހިމް މުހައްމަދު ސޯލިހު ވަނީ މަސްލަހަތަށްޓަކައި ޔާމީން ގޭބަންދަށް ބަދަލުކުރައްވާފަ އެވެ. އޭގެ ފަހުން ސުޕްރީމް ކޯޓުން ވަނީ އެމަނިކުފާނުގެ މައްޗަށް އިއްވި ޖަލު ހުކުމް ބާތިލުކޮށްފަ އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވާނެކަން ޔާމީނު ވަނީ އިއުލާންކުރައްވާފަ އެވެ. އޭގެއިތުރުން މުއިއްޒުވެސް ދެވަނަ ދައުރެއް ހޯއްދެވުމަށް ވާދަކުރައްވާނެކަން އިއުލާންކުރައްވާފައިވެ އެވެ. އިދިކޮޅު އެމްޑީޕީގެ ރިޔާސީ ކެންޑިޑޭޓް ކަށަވަރުވާނީ އެ ޕާޓީން ބާއްވާ ރިޔާސީ ޕްރައިމަރީއަށްފަހު އެވެ.
