މާލެ އާއި ހުޅުމާލެ ގުޅުވައިދޭ ސިނަމާލެ ބްރިޖްގެ ކްރެޑިޓް މުހައްމަދު މުއިއްޒު ނަންގަވަން އުޅުއްވާތީ ކުރީގެ ރައީސް އަބްދުﷲ ޔާމީން އެކަމަށް ރޭ ފާޑުވިދާޅުވެއްޖެ އެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން ބޭއްވި ޖަލްސާގައި ޔާމީން ވިދާޅުވީ މުއިއްޒު ހައުސިން މިނިސްޓަރަކަށް ހުންނެވުމުގެ އިތުރުން ބްރިޖުގެ އެއްވެސް ކަމެއްގައި އެމަނިކުފާނު ނޫޅުއްވާ ކަމަށާއި ހަގީގަތް އޮޅުވާލައްވާތީ ވަރަށް ދެރަ ކަމަށެވެ.
ޔާމީން ވިދާޅުވީ ބްރިޖުގެ ވާހަކަ އެންމެ ފުރަތަމަ އެމަނިކުފާނު ޗައިނާގެ ރައީސް ޝީ ޖިން ޕިން އަރިހަށް ވަޑައިގެން މަޝްވަރާކުރެއްވުމަށްފަހު، ބާކީ ހުރިހާ މަޝްވަރާތަކެއް ރައީސް އޮފީހުގައި ކުރިއަށްގެންދިޔައީ އިކޮނޮމިކް ކައުންސިލުގައި ކަމަށެވެ. އިކޮނޮމިކް ކައުންސިލުގައި މުއިއްޒު ހިމެނިވަޑައެއް ނުގަންނަވަ އެވެ.
"އަޅުގަނޑު ހަމަ ވަރަށް ސާފުކޮށް ދިވެހި ރައްޔިތުންނަށް މި ދަންނަވަނީ ހައުސިން މިނިސްޓަރަކަށް މުއިއްޒު އޭރު ހުންނެވި. ބްރިޖެއް އެޅުމުގެ ވާހަކަ ދެކެވުނީ ޝީ ޖިން ޕިން އަރިހަށް އަޅުގަނޑު ކުރި ޒިޔާރަތެއްގައި. ހުރިހާ ޑިސްކަޝަނެއް އޭގެ ފަހުން ކުރިއަށްދިޔައީ ރައީސް އޮފީހުގައި. އިގްތިސާދީ ކޮމިޓީގައި. އޭގައި އިސްކޮށް އަޅުގަނޑުމެންގެ ތެރެއިން ތިއްބެވި ބޭފުޅުން އޭރު އަދީބު ނައިބުރައީސަކަށް ހުންނެވީ،"
"އެކަމަކު މިހާވަރަށް ކަންތައްތައް އޮޅުވާލަން މަސައްކަތް ކުރެއްވީމަ ވަރަށް ދެރަ. ދެން ހަމަ ތެދެއްމެ ނަލަ ހެދިގެން ހިނގާ ހެދިދާނެ ދެކޮޅަށް ދެކޮޅަށް. އެ ނޫން ކަމެއް މިހާރު ކުރަންވެސް ނެތީ."
މީގެއިތުރުން ޔާމީން ވިދާޅުވީ ބްރިޖުގެ މަސައްކަތަކީ މުޅިންވެސް ބޭރުގެ ތަޖުރިބާކާރުންގެ އެހީއާއެކު ކުރިއަށްގެންދިޔަ މަސައްކަތެއް ކަމަށެވެ. ނަމަވެސް އެމަނިކުފާނު ވިދާޅުވީ ބްރިޖު މަސައްކަތުގައި ތަޖުރިބާކާރުންނަށް އެހީތެރިވުމުގައި ދިވެހި އިންޖިނިއަރުން އުޅެދާނެ ކަމަށެވެ.
"މިވަރުގެ ބޮޑު މަސައްކަތެއް ހިނގައިދިޔައިރު ރާއްޖޭގެ ސިވިލް އިންޖިނިއަރުންގެ ކޮންޓްރިބިއުޝަނެއް ނޫނީ ހިއްސާއެއް މިއަކު ނޯންނާނެ އެނގޭތޯ. މިއީ ހަމަ މުޅިން ބޭރުގެ އެކްސްޕަޓީސް. ޗައިނާއިން މި މަސައްކަތް ކޮށްދީފައި، ޗައިނާ ސަރުކާރުން އަތްދަށު ވަޑިން ގޮތުގައި ކޮންމެވެސް ވަރަކަށް ދިވެހި އިންޖިނިއަރުން އުޅެފާނެ،" ޔާމީން ވިދާޅުވި އެވެ.
ސިނަމާލެ ބްރިޖުގެ ކްރެޑިޓް ނަންގަވަން މުއިއްޒު އެކި މަސައްކަތް ކުރައްވަމުންދާއިރު، ނިމިދިޔަ އެމްޑީޕީ ސަރުކާރުން އިންޑިއާގެ އެހީތެރިކަމާއެކު މާލެ، ވިލިމާލެ، ގުޅީފަޅު އަދި ތިލަފުށި ގުޅާލުމަށް އަޅަން ފެށި ތިލަމާލެ ބްރިޖްގެ މަސައްކަތް ފެށީ މުއިއްޒުގެ ބެއްލެވުމުގެ ދަށުން މި ސަރުކާރުން ކަމަށް ދައްކަން ދަނީ މަސައްކަތް ކުރައްވަމުންނެވެ.
