ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) ބާއްވާ ނޫސްވެރިންގެ ބައްދަލުވުމުގައި ބައިވެރިވުމުގެ ފުރުސަތު އަދަދު ނޫހުގެ ނޫސްވެރިޔާ ލީވާން އަލީ ނާސިރަށް ނުދީ، ޕްރެސް ކޮންފަރެންސް ބޭއްވި ތަނުން އޭނާ ނެރެލައިފި އެވެ.
ޕީއެސްއެމްގައި ބޭއްވަން އުޅުނު މި ނޫސްވެރިންގެ ބައްދަލުވުމުން ލީވާން ނެރެލީ އެ ބައްދަލުވުމުގައި ބައިވެރިވުމުގެ ފުރުސަތު ލިބިފައިވާ ނޫސްވެރިންގެ ލިސްޓުގައި އޭނާގެ ނަން ނެތް ކަމަށް ބުނެ އެވެ. ނަމަވެސް, ލީވާން އެ ނޫސްވެރިންގެ ބައްދަލުވުމަށް ދިޔައީ އޮންނަ އުސޫލުގެ މަތިން ރައީސް އޮފީހަށް ނަން ފޮނުވައިގެންނެވެ.
މިކަމާ ގުޅިގެން މީޑިއާތަކަށް މުންދު ފޮނުއްވި ވީޑިއޯ މެސެޖެއްގައި ވިދާޅުވީ ނޫސްވެރިންގެ ބައްދަލުވުމުގައި ބައިވެރިވުމުގެ ފުރުސަތެއް އަދަދު ނޫހަށް ނެތް ކަމަށެވެ. ނޫސްވެރިންގެ ބައްދަލުވުން ބާއްވާ ތަނަށް ލީވާން ވަދެ އިނުމުން ނޫސްވެރިންގެ ބައްދަލުވުން ކުރިއަށް ނުގެންދެވި ކެންސަލް ކުރަން ޖެހިފައިވާ ކަމަށްވެސް އޭނާ ވިދާޅުވި އެވެ.
ރައީސް އޮފީހުން އިންތިޒާމުކޮށްގެން ބާއްވާ ނޫސްވެރިންގެ ބައްދަލުވުންތަކަށް އަދަދު ނޫހާއި މި ނޫހުގެ އެއްވެސް ނޫސްވެރިއަކަށް ނުވަދެވޭ ގޮތަށް ހަމަޖައްސާފައިވާ ކަމަށް އެ އޮފީހުން ބުނެ އެވެ. އެ ފިޔަވަޅު އަޅާފައިވާކަން މިހާތަނަށްވެސް ރައީސް އޮފީހުން ރަސްމީކޮށް ލިޔުމުން އަދަދު ނޫހަށް އަންގާފައި ނުވެ އެވެ.
އެހެންވެ، ރައީސް އޮފީހުގެ ނޫސްވެރިންގެ ބައްދަލުވުންތަކަށް މި ނޫހުގެ ނޫސްވެރިން ނުވައްދަން ނިންމި ނިންމުން ރަސްމީކޮށް ލިޔުމުން ހޯދަން ދެ ފަހަރެއްގެ މަތިން ރައީސް އޮފީހުގައި ވާނީ ސިޓީ މެދުވެރިކޮށް އެދިފަ އެވެ. އެ ސިޓީތަކަށް މިހާތަނަށްވެސް ޖަވާބު ނުލިބޭތީ އެކަމާ ގުޅިގެން މިދިޔަ ބުރާސްފަތި ދުވަހު އަދަދު ނޫހުން ވަނީ ރައީސް މުހައްމަދު މުއިއްޒަށް އާ ސިޓީއެއް ވެސް ފޮނުއްވާފަ އެވެ.
ސަރުކާރުގެ ޕްރެސްތަކަށް އަދަދުގެ ނޫސްވެރިން ނުވައްދާ މައްސަލައިގައި ޖަވާބެއް ނުދޭތީ އަނެއްކާވެސް މުއިއްޒުއަށް ސިޓީއެއް
މި ފިޔަވަޅަކީ ބޭއިންސާފު އަދި ގާނޫނީ ހަމަތަކުން ބޭރު ނިންމުމެއް ކަމަށް ފާހަގަކޮށް، މި މައްސަލަ ބައިނަލްއަގުވާމީ ފަރާތްތަކަށް ހުށަހަޅާނެ ކަމަށް އެ ނޫހުން ބުނެއެވެ.
އަދަދުގެ ނޫސްވެރިންނަށް ޕްރެސްތަކަށް ނުވަދެވޭ ގޮތަށް ރައީސް އޮފީހުން ފިޔަވަޅު އެޅީ މެއި 11، ގައި މުއިއްޒު ބައިވެރިވެވަޑައިގެންނެވި ނޫސްވެރިންގެ ބައްދަލުވުމެއްގައި އަދަދުގެ ނޫސްވެރިއަކު ކުރި ސުވާލަކާ ގުޅުވަ އެވެ.
އެ ސުވާލުކުރި ހިސާބުން މުއިއްޒު ވަނީ އެއީ މި ނޫހުން ނެރުނު "އައިޝާ" ޑޮކިއުމެންޓްރީގެ މައްސަލައިގައި ކްރިމިނަލް ކޯޓުން ނެރެފައިވާ އަނގަބަންދުކުރުމުގެ އަމުރު (ގެގް އޯޑާ) އާ ހިލާފު އަމަލެއް ކަމަށް އަމިއްލައަށް ނިންމަވައި، މި ނޫހުގެ ނޫސްވެރިޔާ މުހައްމަދު ޝަހުޒާން އެ ބައްދަލުވުމުން ބޭރުކޮށްލާފަ އެވެ.
ހަމަ އެ ރޭ 11:01 ގައި ރައީސް އޮފީހުން މީޑިއާތަކަށް ކަނޑައަޅާފައިވާ ވަޓްސްއެޕް ގްރޫޕުގައި ހިއްސާކުރި މެސެޖަކުން ވަނީ އަދަދު ނޫހަށް ނުވަދެވޭނެ ކަމަށް ބުނެފަ އެވެ.
އެ ފަހުން ރައީސް އޮފީހުން އާ ވަޓްސްއެޕް ގްރޫޕެއް އެކުލަވާލިއިރު، މި ނޫހުގެ އެއްވެސް ނޫސްވެރިޔަކު އެ ގްރޫޕުގައި ވެސް ބައިވެރިކޮށްފައި ނެތެވެ.
އަދަދު ނޫހާ ދެކޮޅަށް އެޅި ފިޔަވަޅުގައި ރައީސް އޮފީހުން ބުނެފައި ވަނީ އެ "ސަސްޕެންޝަން" ދެމިގެން ދަނީ ފިޔާޒު އަދި މި ނޫހުގެ އެޑިޓަރު ހަސަން މުހައްމަދުއާ ދެކޮޅަށް ކްރިމިނަލް ކޯޓުގައި ހިނގަމުންދާ މައްސަލަ ނިމުމުން ކަމަށެވެ.
އައިޝާ ޑޮކިއުމަންޓްރީއަކީ މުހައްމަދު މުއިއްޒު ރައީސް އޮފީހުގެ މުވައްޒަފަކާ ކައިވެނިން ބޭރުން ގުޅުމެއް ބޭއްވެވި ކަމުގެ ތުހުމަތުތަކެއް ރައްދުވާ ޑޮކިއުމެންޓަރީއެކެވެ. އެ ޑޮކިއުމަންޓްރީގައި ހިމެނޭ ކަންކަން މުއިއްޒު ދޮގުކުރައްވަ އެވެ.
