ސޯޝަލް މީޑިއާގައި ރައީސް މުހައްމަދު މުއިއްޒުގެ މަގުބޫލުކަން ކުޑަ ވަމުންދާތީ، ސޯޝަލް މީޑިއާގެ މަންސަތަކުގައި އެމަނިކުފާނު ޕްރޮމޯޓުކުރަން ޕީއެންސީން ސަތޭކަ މީހުންނަށް ވަޒީފާ ދީފި އެވެ.
އިތުބާރު ހުރި މަސްދަރުތަކުން އަދަދު ނޫހަށް ކަށަވަރުކޮށްދީފައިވާ ގޮތުގައި ރާއްޖޭގެ އެކި ކަންކޮޅުތަކުން ހޮވާލި މި މީހުންގެ ހަމައެކަނި މަސައްކަތަކީ ސޯޝަލް މީޑިއާގައި މުއިއްޒަށް ހުޝާމަދުކުރުން ކަމަށެވެ.
ޕީއެންސީން މުސާރަ ދޭ ގޮތަށް ނަގާފައިވާ މި "ޕްރޮމޯޓަރުންގެ" މަހު މުސާރައަށް 12،000ރ. ލިބެ އެވެ. މިއީ މަހެއްގެ މައްޗަށް ހިސާބުކުރާ ނަމަ 1.2 މިލިއަން ރުފިޔާ އެވެ.
މި ނޫހާ ވާހަކަ ދެއްކި މީހުން ބުނި ގޮތުގައި މި މަސައްކަތުގައި އިސްކޮށް އުޅުއްވަނީ ސަރުކާރުގެ އިސް ތަރުޖަމާނު އަދި ޕީއެންސީގެ ނައިބު ރައީސް މުހައްމަދު ހުސެއިން ޝަރީފު (މުންދު) އެވެ.
މި ވާހަކަތަކަށް ބާރުދޭ "ޕީއެންސީ ދާއިރާ ސޯޝަލް މީޑިއާ ޓީމް" ނަން ދީފައިވާ ވަޓްސްއެޕް ގްރޫޕް ޗެޓެއްގެ ސްކްރީންޝޮޓްތަކެއް ވެސް ވަނީ ސޯޝަލް މީޑިއާގައި ލީކުވެފަ އެވެ.
އެ ސްކްރީންޝޮޓްތަކުގައި މުންދު ވަނީ ޕީއެންސީއާ ނުގުޅި ތިބި ބަޔަކު ވެއްޖެއްޔާ ޕާޓީއާ ގުޅުމަށާއި، ސިއްރު ހިފެހެއްޓުމަށް އިލްތިމާސްކުރައްވައި، ޓީމުގެ ބައްދަލުވުންތައް ކުރިއަށް ދާނެ ގޮތުގެ އިރުޝާދު ދެއްވާފަ އެވެ. އަދި، މި ކަމުގައި އޭނާއާ އެކީ އިސްކޮށް އުޅުއްވަނީ ހައްޖު ކޯޕަރޭޝަަންގެ ސީއީއޯ މުހައްމަދު ފިރުޒުލް ކަމަށް ވެސް އޭނާ ވިދާޅުވެފައި ވެ އެވެ.
މުންދު ވަނީ އެ މީހުންނާ ހަވާލުކޮށްފައިވާ މަސައްކަތް ފެށުމުގެ ގޮތުން މި މަހުގެ ބާކީ އޮތް ބަޔަށްވާ މުސާރަ ޖަމާކޮށްދީ، އަންނަ މަހުން ފެށިގެން މުސާރަ އެއްކޮށް ލިބޭނެ ކަމަށް ވެސް ވިދާޅުވެފަ އެވެ.
މުއިއްޒު ޕްރޮމޯޓުކުރަން ހާއްސަ ޓީމެއް ނެރޭއިރު، ސަރުކާރުގެ ޕޯސްޓުތައް ޝެއާކުރުމާއި މުއިއްޒު ޕްރޮމޯޓުކުރުމަކީ ސިޔާސީ މަގާމުތަކުގައި ތިބި މީހުންނަށް މިހާރު ވެސް ލާޒިމުކޮށްފައި އޮންނަ ކަމެކެވެ. މިގޮތަށް އިރުޝާދު ދިނުމަށާއި، އެކިއެކި ހަރަކާތްތައް ހިންގުމަށް ހަދާފައިވާ ވަޓްސްއެޕް ގުރޫޕުތަކުގެ ސްކްރީންޝޮޓްތައް މީގެ ކުރިން ވެސް ލީކުވެފައި ވެ އެވެ.
