ދިވެހިރާއްޖޭގެ ސިއްހީ ދާއިރާއަށް 2000 އެއްހާ މުވައްޒަފުން އިތުރުކުރަން ސަރުކާރުން ނިންމާފައިވާ ކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވެއްޖެ އެވެ.
ރައީސް އޮފީހުން ގެނެސްދޭ ރައްޔިތުންގެ އަޑު ޕްރޮގްރާމުގައި ވާހަކަ ދައްކަވަމުން މުއިއްޒު ވިދާޅުވީ ސިއްހީ ދާއިރާއަށް 2000 އެއްހާ މުވައްޒަފުން އިތުރުކުރަން ނިންމާފައި ވަނީ މުޅި ރާއްޖެއަށް ބަހާލައިގެން ކަމަށެވެ. އަދި އެ މުވައްޒަފުން ނެގުމުގެ ކަންކަން ވެސް ކުރިއަށް ގެންދަނީ ބެޗުތަކަކަށް ބަހާލައިގެން ކަމަށް އެމަނިކުފާނު ވިދާޅުވި އެވެ.
"ހެލްތު ސެކްޓާއަށް އެކަނި މިފަހަރު އަޅުގަނޑުމެން ސްޓާފުން އިތުުރުކުރަން ވެސް އަސްލު އިންނާނީ ނިންމާފައި، ދެން ނިއާލީ [ގާތްގަނޑަކަށް] 2000 އެއްހާ ސްޓާފުން މުޅި ރާއްޖެއަށް، ދެން އޭގެތެރެއިން ވެސް ބެޗުބެޗަށް މި ދަނީ، ދެން މިހާރު ވެސް އިތުރު ސްޓާފުން ނެގުން،" މުއިއްޒު ވިދާޅުވި އެވެ.
ހުޅުމާލޭގެ ދެވަނަ ފިޔަވަހީގައި އާއި ފުރަތަމަ ފިޔަވަހީގައި އިމާރާތް ކުރުމުގެ މަސައްކަތް ކުރަމުންދާ ޖީޕީ ކްލިނިކްތަކުގެ މަސައްކަތްތައް ނިމުނީމާ އެ ތަންތަނުން ވެސް މީހުންނަށް ވަޒީފާ ދެއްވާނެ ކަމަށް އެމަނިކުފާނު ވިދާޅުވި އެވެ.
ރައްޔިތުންގެ އަޑު ޕްރޮގްރާމު މިހާރު ގެނެސްދެމުން ދަނީ ވަރަށް ގިނަ ވާހަކަތަކުގެ އަޑު ކަނޑާލައިގެންނެވެ. އެހެންކަމުން، އެ ވާހަކަ މުއިއްޒު ދެއްކެވީ ސީދާ ކޮން ސުވާލަކާ ނުވަތަ ކަންބޮޑުވުމަކާ ގުޅުވައިގެންކަމެއް ނޭނގެ އެވެ.
ނަމަވެސް، އޭގެފަހުން ދެއްކި ވާހަކަތަކަށް ބަލާއިރު، ބޮޑަށް ގަބޫލުކުރެވެނީ ހުޅުމާލޭގައި ސިއްހީ ހިދުމަތްދޭ ހޮސްޕިޓަލާއި ޖީޕީ ކްލިނިކުގައި މަސައްކަތްކުރާ މުވައްޒަފުންގެ އަދަދު މަދުވުމުގެ ކަންބޮޑުވުމާ ގުޅިގެން އެމަނިކުފާނު ދެއްކެވި ވާހަކައެއް ކަމަށެވެ.
ސިއްހީ ދާއިރާއަށް 2000 އެއްހާ މުވައްޒަފުން އިތުރުކުރަން ނިންމާފައިވާކަމަށް ރައީސުލްޖުމްހޫރިއްޔާ ވިދާޅުވެފައި މިވަނީ ސަރުކާރު ހިއްސާވާ ކުންފުނިތަކުން ގިނަ އަދަދެއްގެ މުވައްޒަފުން ވަޒީފާއިން ވަކިކުރަމުންދާ ދަނޑިވަޅެއްގަ އެވެ.
ސަރުކާރު ހިއްސާވާ ކުންފުނިތަކުން ވަޒީފާއިން ވަކިކުރަމުންދާ މީހުންގެ ތެރޭގައި އެތައް އަހަރެއްވަންދެން އެ ކުންފުނިތަކުގެ ވަޒީފާގައި ތިބި މުވައްޒަފުން ހިމެނެ އެވެ. ގިނަ ބަޔަކު ބުނަމުންދަނީ އެ މީހުން ވަޒީފާއިން ވަކިކުރަނީ ސިޔާސީ ފިކުރަށް ބެލުމަށްފަހު ކަމަށެވެ.
