މި ސަރުކާރުގައި ތިބި ސިޔާސީ މުވައްޒަފުންގެ ޖުމްލަ އަދަދު ހާމަނުކޮށް، އޭގެ ތެރެއިން 205 މުވައްޒަފަކު މިދިޔަ ހަތަރު މަހެއްހާ ދުވަސްތެރޭގައި ވަކިކޮށްފައިވާ ކަމަށް ރައީސް އޮފީހުން މިއަދު ބުނެފި އެވެ.
ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) ޕީއެސްއެމްގައި ނޫސްވެރިންނަށް މައުލޫމާތު ދެއްވަމުން ވިދާޅުވީ އެ 205 ސިޔާސީ މުވައްޒަފުން ވަކިކުރީ އެނުއަލް އިވެލުއޭޝަންގެ ތެރެއިން ވަރަށް ގިނަ ކަންކަމަށް ބެލުމަށްފަހު ކަމަށެވެ.
"އެ މަސައްކަތުގެ ތެރެއިން [ސިޔާސީ މުވައްޒަފުން އިވެލުއޭޓްކުރުން] ތިބޭފުޅުންނާއެކު މި އިންއިރު 205 މުވައްޒަފުން އުނިވެއްޖެ އެނގޭތޯ. މިހާތަނަށް. ތުރީ އޯ ފޯ މަންތުސް ދެއްތޯ މިވީ. އެ މަސައްކަތުގެ ތެރެއިން އާދެ. 205 މުވައްޒަފުން އުނިކުރެވިއްޖެ ނޫނިއްޔާމުން ރިމޫވްވެއްޖެ،" މުންދު ވިދާޅުވި އެވެ.
ވަކިކުރި ސިޔާސީ މުވައްޒަފުންގެ ތެރޭގައި ހިމެނެނީ ސްޓޭޓް މިނިސްޓަރުންނާއި، ޑެޕިއުޓީ މިނިސްޓަރުންނާއި، ސީނިއާ ޕޮލިޓިކަލް ޑިރެކްޓަރުންގެ އިތުރުން ޕޮލިޓިކަލް ޑިރެކްޓަރުންކަން ފާހަގަކުރައްވާ މުންދު ވިދާޅުވީ ސިޔާސީ މުވައްޒަފުންގެ އިވެލުއޭޝަންގެ މަސައްކަތް މިހާރުވެސް ކުރިއަށްގެންދާ ކަމަށެވެ.
މިގޮތުން އިވެލުއޭޝަން މަސައްކަތުގެ ތެރެއިން ވަކިކުރާ މުވައްޒަފުންގެ އަދަދު ކުރިއަށް އޮތް ދުވަސްތަކުގައި ހާމަކުރަމުންދާނެ ކަމަށް ވެސް މުންދު ވިދާޅުވި އެވެ. ނަމަވެސް ސިޔާސީ މުވައްޒަފުންގެ ޖުމްލަ އަދަދެއް މުންދު މި ބައްދަލުވުމުގައި ހާމަކުރައްވާފައެއް ނުވެ އެވެ.
މި ސަރުކާރުން ވެރިކަމަށް އައުމަށްފަހު އައްޔަންކުރި ސިޔާސީ މުވައްޒަފުންގެ އަދަދާއި، މަގާމުން ވަކިކުރި އަދި އިސްތިއުފާދެއްވި ސިޔާސީ މުވައްޒަފުންގެ އަދަދުގެ އިތުރުން އެ މުވައްޒަފުންގެ މުސާރަ އާއި އިނާޔަތްތަކަށް ހިނގި ހަރަދުގެ ތަފްސީލް 14 ދުވަސް ތެރޭގައި ހާމަކުރަން މިދިޔަ ޖުލައި 5، ގައި އިންފޮމޭޝަން ކޮމިޝަނުން ރައީސް އޮފީހަށް އެންގި އެވެ.
ނަމަވެސް އެ 14 ދުވަސް ހަމަވީއިރުވެސް ސިޔާސީ މުވައްޒަފުންގެ އަދަދު ރައީސް އޮފީހުން ހާމަކޮށްފައެއް ނުވެ އެވެ. ސިޔާސީ މުވައްޒަފުންގެ ޖުމްލަ އަދަދު ހާމަކުރުމުގެ ބަދަލުގައި ސަރުކާރުން މިހާރު އަންނަނީ ވަކިކުރާ ސިޔާސީ މުވައްޒަފުންގެ އަދަދު ހާމަކުރަމުންނެވެ.
ސިޔާސީ މުވައްޒަފުންތައް ވަކިކުރަމުންދިޔަ ނަމަވެސް، ސަރުކާރުން ދަނީ ގިނަ އަދަދެއްގެ މީހުން ސިޔާސީ މަގާމުތަކަށް އައްޔަންކުރަމުންކަން ވެސް ފާހަގަކުރެވެ އެވެ.
ސިޔާސީ މުވައްޒަފުންގެ އަދަދު ހާމަކުރުމަށް ސަރުކާރުން ފަސްޖެހެމުންދާ ކަމަށް ބުނެ އިދިކޮޅު ފަރާތްތަކުންނާއި އާންމުންގެ ފާޑުކިޔުން ވަނީ އަމާޒުވެފަ އެވެ. ސަރުކާރުގެ އެކި ވުޒާރާތަކުން މީގެ ކުރިން ބުނެފައި ވަނީ ސިޔާސީ މުވައްޒަފުންގެ އަދަދު ހާމަކުރެވޭނީ ރައީސް އޮފީހުން ކަމަށެވެ.
މި ސަރުކާރު ވެރިކަމަށް އައުމުގެ ކުރިންނާއި އިންތިގާލީ މަރުހަލާގައި ވެސް ތަކުރާރުކޮށް ބުނަމުންދިޔައީ ސިޔާސީ މުވައްޒަފުންގެ އަދަދު ހަތްސަތޭކައަށް ވުރެ އިތުރު ނުކުރާނެ ކަމަށެވެ.
ނަމަވެސް ސިޔާސީ މުވައްޒަފުންގެ އަދަދު 700 ގައި ހިފެހެއްޓުމަކީ ރިޔާސީ ވައުދެއް ނޫން ކަމަށް ވިދާޅުވެ، އެ ވާހަކަ މުންދު މީގެކުރިން ދިފާއުކުރައްވާފައިވެ އެވެ.
