ޕެންކްރިއަޓިކް ކެންސަރަށް ފަރުވާ ކުރުމަށް ކްލިނިކަލް ޓްރަޔަލްތަކުގައި ބަލިމީހުންގެ ފުރާނަ ސަލާމަތްކޮށްދޭ މުއްދަތު ގާތްގަނޑަކަށް ދެގުނައަށް އިތުރުކޮށްދިން އާ ފަރުވާއަކަށް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ހުއްދަ ދީފި އެވެ.
ރިވޮލިއުޝަން މެޑިސިންސް ކުންފުނިން އުފައްދާ، "ރޭސޮންކް" ބްރޭންޑްގެ ނަމުގައި ވިއްކާ "ޑަރަކްސޮންރަސިބް" އަކީ ދުނިޔޭގައި އެންމެ ނުރައްކާތެރި ކެންސަރުގެ ބާވަތްތަކުގެ ތެރޭގައި ހިމެނޭ ޕެންކްރިއަޓިކް ކެންސަރަށް ފަރުވާ ކުރުމުގައި ލިބުނު ބޮޑު ކުރިއެރުމެއްގެ ގޮތުގައި ބެލެވެ އެވެ.
ޖުމްލަ 500 ބަލިމީހުން ބައިވެރިކޮށްގެން ކުރިއަށްގެންދިޔަ ފަހު މަރުހަލާގެ ކްލިނިކަލް ޓްރަޔަލްއަކުން ދެއްކި ގޮތުގައި، ކޮންމެ ދުވަހަކު މި ބޭސް ބޭނުންކުރި މީހުންގެ ފުރާނަ ސަލާމަތްވެފައި ހުންނަ މުއްދަތު އެވްރެޖްކޮށް 13.2 މަހަށް އިތުރުވެފައިވެ އެވެ. މިއާ ހިލާފަށް، ކީމޯތެރަޕީ ބޭނުންކުރި މީހުންގެ ފުރާނަ ސަލާމަތްވެފައި ހުރީ އެވްރެޖްކޮށް 6.6 މަސްދުވަހަށެވެ.
އެފްޑީއޭ އިން ބުނި ގޮތުގައި މި ބޭހަކީ ފަރުވާ ކުރަން އުނދަގޫ އަދި ބަލިމީހުންނަށް އިންތިހާއަށް ގޮންޖެހުން ބޮޑު މި ކެންސަރާ ދެކޮޅަށް ލިބުނު "މުހިންމު އާ ފަރުވާއެއް" ކަމަށެވެ.
ޕެންކްރިއަޓިކް ކެންސަރުގެ 90 އިންސައްތައަށްވުރެ ގިނަ ޓިއުމަރުތަކުގައި ހިމެނޭ އަދި ކެންސަރު ފެތުރުމަށް ބާރުދޭ "ކޭ-ރާސް" ޖީންއަށް އަންނަ ބަދަލުތައް ހުއްޓުވައި، އެ ޖީންގެ މަސައްކަތް މެދުކަނޑާލުމަށް "ޑަރަކްސޮންރަސިބް" އެހީތެރިވެދެ އެވެ. މީގެ ސަބަބުން ކެންސަރު ފެތުރުން ހުއްޓުވައިދެ އެވެ.
އެމެރިކަން ކެންސާ ސޮސައިޓީގެ ތަފާސްހިސާބުތަކުން ދައްކާ ގޮތުގައި، އެމެރިކާގައި ކޮންމެ އަހަރަކު ގާތްގަނޑަކަށް 67,000 މީހުންނަށް ޕެންކްރިއަޓިކް ކެންސަރު ޖެހޭއިރު، މިއީ ކެންސަރުގެ ބޮޑެތި ބާވަތްތަކުގެ ތެރެއިން މަރުވާ މީހުންގެ ނިސްބަތް އެންމެ މަތީ ބާވަތެވެ.
ޕެންކްރިއަޓިކް ކެންސަރަކީ އާންމުކޮށް ބަލީގެ ފަހު މަރުހަލާގައި ދެނެގަނެވޭ، އަދި ފަރުވާ ކުރަން އިންތިހާއަށް އުނދަގޫ ބައްޔެކެވެ. މި ބަލި ޖެހޭ މީހުންގެ ދެބައިކުޅަ އެއްބަޔަށްވުރެ ގިނަ މީހުން ބަލި ދެނެގަންނަތާ ތިން މަސްދުވަހުގެ ތެރޭގައި މަރުވެ އެވެ.
މި ބޭހަކީ ސީރިއަސް ބަލިތަކަށް ދޭ އަވަސް ފަރުވާއެއްގެ ގޮތުގައި ބަލައި، 2025 ވަނަ އަހަރު އެފްޑީއޭ އިން ވަނީ މި ބޭހަށް "ބްރޭކްތްރޫ ތެރަޕީ" ގެ ދަރަޖަ ދީފަ އެވެ.
މައުލޫމާތު: ބީބީސީ
