ސައުދީ އަރަބިއްޔާ އާއި ތުރުކީވިލާތް އަދި ޕާކިސްތާނުން ގުޅިގެން އެކުލަވާލާފައިވާ "މައްކާ ޖޮއިންޓް ޑިފެންސް އެގްރީމަންޓް" ގެ ދަށުން، ސައުދީ އަރަބިއްޔާގައި ސެކްރެޓޭރިއަޓެއް ގާއިމުކުރުމަށް އެ ތިން ގައުމުން އެއްބަސްވެއްޖެ އެވެ.
މަޝްވަރާތަކަށް ފަހު ހޯމަ ދުވަހު ނެރުނު ގުޅިފައިވާ ބަޔާނެއްގައި ބުނެފައިވަނީ، މި ސެކްރެޓޭރިއަޓްގެ ސެކްރެޓަރީ ޖެނެރަލްގެ މަގާމު ފުރަތަމަ ތިން އަހަރު ދުވަހު ފުރާނީ ޕާކިސްތާނުގެ ބޭފުޅެއް ކަމަށެވެ.
މި އެއްބަސްވުމަށް އައިސްފައިވަނީ ތުރުކީވިލާތުގެ އިސްތަންބޫލްގައި މިދިޔަ ހޯމަ ދުވަހު އެ ތިން ގައުމުގެ މަންދޫބުން ބޭއްވި ބައްދަލުވުމުގަ އެވެ.
އެ ބައްދަލުވުމަށްފަހު ނެރުނު ބަޔާނުގައި ބުނެފައިވަނީ، ތިން ގައުމު ގުޅިގެން ދިފާއީ ގާބިލުކަން އިތުރުކުރުމަށާއި، ތިން ގައުމުގެ ސިފައިންގެ މެދުގައި އޮންނަ ގުޅުން މިހާރަށް ވުރެ ބަދަހިކުރުމަށް މަސައްކަތް ކުރާނެ ކަމަށެވެ.
މިދިޔަ އޮގަސްޓް މަހުގެ ކުރީކޮޅު ސޮއިކުރި "މައްކާ ޖޮއިންޓް ޑިފެންސް އެގްރީމަންޓް" އަކީ ބޭރުގެ އުދުވާންތަކުން ދިފާއުވުމަށް ތިން ގައުމު ގުޅިގެން ކުރާ މަސައްކަތް ވަރުގަދަކުރުމަށް އެކުލަވާލި އެއްބަސްވުމެކެވެ.
މި އެއްބަސްވުމުގައި ބަޔާންކޮށްފައިވާ ގޮތުން، އެ ތިން ގައުމުގެ ތެރެއިން ކޮންމެ ގައުމަކަށް ދޭ ހަމަލާއަކީ ވެސް ތިން ގައުމަށް ދެވޭ ހަމަލާއެއްގެ ގޮތުގައި ބަލާނެ އެވެ.
