އާންމުކޮށް މި ކަހަލަ ވާހަކަތައް އަޑު އިވެނީ، ރާއްޖެއަށް ޓޫރިޒަމް ސިނާއަތް ތައާރަފުވެގެން އައި ދުވަސްވަރު ހިނގި ކަމަށް ބުނާތީ ތުންތުން މަތިންނެވެ. ކޮންމެ ވެސް ބޭރުގެ އިންވެސްޓަރަކު ރިސޯޓެއް ތަރައްގީކުރަން ބޭނުންވެގެން، އެއްވެސް ވިޔަފާރިއެއް ނުކުރާ އަތުގައި މާ ބައިވަރު ފައިސާއެއް ނެތް ދިވެއްސަކަށް ރިސޯޓު ވިޔަފާރީގެ ހިއްސާތަކެއް ދެނީ އެވެ. އެ ހިސާބުން އެ މީހާ ބޮޑު މަހުޖަނަކަށް ވަނީ އެވެ.
އެކަމަކު މި ކިޔައިދޭން އުޅޭ ހާދިސާގެ ކަންކަން ހިނގައިދިޔައިކީ ބައި ގަރުނު ކުރިއަކުން ނޫނެވެ. މި ކަމެއް ހިނގީ މި ފަހުންނެވެ. ވާގޮތަކީ ހަމަ އިހުގެ ވާހަކަތަކުގައި އަޑު އިވޭ ގޮތަށް، ވިޔަފާރިއެއް ނުކުރާ ދިވެއްސަކު ރިސޯޓެއްގެ ހިއްސާދާރަކަށް ވަނީ އެވެ. އެ މީހާގެ ނަމަކީ ހައްސާން ވަހީދެވެ.
ހައްސާންގެ ލިންކްޑްއިން ޕްރޮފައިލް ބުނާ ގޮތުގައި އޭނާއަކީ ހާރިޖީ ގުޅުންތަކާއި ސަރުކާރާއި ބައިނަލްއަގުވާމީ ގުޅުންތަކުގެ އިތުރުން އިސްތިރާޖީ ސިޔާސަތު ތަރައްގީކުރުމުގެ ތަޖުރިބާ ލިބިފައިވާ ޑިޕްލޮމެއްޓެ އަދި ޕަބްލިލް ޕޮލިސީ ފަންނުވެރިއެކެވެ. ރާއްޖެއިން ޔޫއޭއީއަށް ކަނޑައަޅާފައި ހުންނަ ޑެޕިއުޓީ އެމްބެސެޑަރެވެ. ވަރަށް މޮޅަށް ކިޔަވައިގެން ހުރި، ހާއްސަ ވަނަތައް ވެސް ހާސިލުކޮށްފައިވާ މޮޅު ދަރިވަރެކެވެ.
އެކަމަކު، ޓޫރިޒަމް އަދި ހޮސްޕިޓާލިޓީ ހިމެނޭ ގޮތަށް ހަދާފައިވާ ސޯޝަލް ސައިންސަސް ޑިޕްލޮމާއެއް ފިޔަވައި، އެ ޕްރޮފައިލު ހާވާހާވާ ވެސް ރިސޯޓު ދާއިރާގައި ނޫނީ އެ ނޫން ވިޔަފާރިއެއްގައި ހައްސާންގެ ހުރި ތަޖުރިބާއެއް ނޫނީ އޮތް ހިއްސާއެއްގެ ވާހަކަ ނެތެވެ.
ސުވާލަކީ، ކުއްލިއަކަށް ހައްސާންގެ އަތުގައި މި ވަރުގެ ނަސީބެއް ހިފީ ކީއްވެގެންތޯ އެވެ. މި ސުވާލުގެ ޖަވާބު ހޯދަން ފީނާލިއިރު ފެނުނީ، އާއިލީ ގުޅުންތަކާއި މަގާމުގެ ނުފޫޒު ބޭނުންކޮގެން ނާާޖައިޒު މަންފާއެއް ހޯދާ، ޖީލުތަކަކަށް ދެމިގެންދާ ވަރުގެ ނުހައްގު މުއްސަނދިކަމެއް ހޯދަން ހައްސާން މެދުގައި ހުރެގެން ހިންގަމުންދާ ބޮޑު ހިޔާނާތެކެވެ.
ޑެޕިއުޓީ އެމްބެސެޑަރު ކަމުގެ ތެރެއިން ހޯދި "ލިންކު"
ގިނަ އަހަރުތަކެއް ވަންދެން ރައީސް އޮފީހުގައި ޑެޕިއުޓީ ޑިރެކްޓަރެއްގެ މަގާމުގައި ހުރުމަށް ފަހު، މުއިއްޒުގެ ސަރުކާރުގައި ހައްސާނަށް ވަނީ ޑެޕިއުޓީ އެމްބެސެޑަރަކަށް އައްޔަންކޮށްފަ އެވެ. މިއަދު ވެސް އޭނާ ހުރީ އެ މަގާމުގަ އެވެ. ހައްސާންގެ ތައުލީމާއި ފަންނީ ތަޖުރިބާގެ އިތުރުން، މި މަގާމަށް ޝަރުތު ހަމަވީ އަނެއް ސަބަބަކީ މުއިއްޒުއާ އޮތް އާއިލީ ގުޅުމެވެ. އޭނާއަކީ މުއިއްޒުގެ ދެބެންގެ ދެދަރި މީހެއްގެ ދަރިއެކެވެ.
ހައްސާންގެ މި ކަމުގައި މަގާމުގެ ނުފޫޒު ބޭނުންކޮށްފައިވާ ކަމާއި މި މުއާމަލާތާ މުއިއްޒުއާ ގުޅުން އޮތް ކަމަށް ބުނެ ލިޔެކިޔުންތަކާއެކީ ފަޅައިއަރުވާލީ ހަސަން ކުރުސީގެ ނަމުގައި ހިންގާ އެކްސް އެކެއުންޓުން އިއްޔެގެ ވަގުތެއްގަ އެވެ. އެ އެކައުންޓުން ވަނީ މި މުއާމަލާތުގައި އުޅޭ އިންޑިއާގެ ކުންފުންޏާއި އެ މުއާމަލާތް ހިންގި ކަމަށް ބުނާ ގޮތާއި އޭގައި މުއިއްޒުގެ ބައިވެރިވުން އޮތް މިންވަރުގެ މައުލޫމާތު ހިއްސާކޮށްފަ އެވެ.
އަދަދު ނޫހުން އިތުރަށް ބެލިއިރު، މިއީ ވަރަށް ދުރާލާ ރޭވިގެން ހިންގާފައިވާ ހިޔާނާތެއް ކަމަށް ބާރުދޭ ލިބޭ އެތައް މައުލޫމާތެއް ވަނީ ލިބިފަ އެވެ.
މި ހިޔާނާތް ފެށިގެން އައީ ޔޫއޭއީން ހައްސާން އާއި އިންޑިއާގެ "އަރަޓް ޑިވެލޮޕާސް" އާ ބައްދަލުވީ ހިސާބުންނެވެ. މި ގޮތަށް އުފެދުނު ގުޅުމުގެ ތެރެއިން ރަނގަޅު އަގެއްގައި ރާއްޖޭގެ ކޮންމެ ވެސް ސަރަހައްދަކުން ރިސޯޓެއް ތަރައްގީކުރާނެ "ޑީލް" އެއްގެ ވާހަކަ ދެކެވުނެވެ. އެ ޑީލު ނިންމީ ތ. އޮމަދު އާއި ހިރިލަންދުއާ އެއް ފަޅެއްގެ ތެރޭގައި، ކައިރިކައިރީގައި އޮންނަ ފުއްޓާއި ވަންބަންޖާއި ކަނި ދޭ ގޮތަށެވެ.
ޓޫރިޒަމްގެ ބޭނުންތަކަށް ކުއްޔަށް ދޫކުރާ ރަށްތަކުގެ ތެރޭގައި މި ރަށްތައް ހިމެނީ، މިދިޔަ އަހަރުގެ ޖޫން މަހުގެ ފަހުކޮޅެވެ. މި ރަށްތައް ހިމެނޭހެން 21 ތަނެއް ޓޫރިޒަމްގެ ބޭނުންތަކަށް ކަނޑައެޅުމުގެ ކުރިން މިދިޔަ މެއި 15، ގައި ޓޫރިޒަމް މިނިސްޓްރީން ވަނީ ރަށްތައް ކުއްޔަށް ދިނުން ވަގުތީ ގޮތުން މަޑުޖައްސާލާފަ އެވެ. އޭރު ޓޫރިޒަމުން ބުނީ އެ ގޮތަށް ހުއްޓާލި ރިސޯޓުތައް މަދު އަތޮޅުތަކަށް ހާއްސަ ލުއިތަކެއް ދޭން ގެންގުޅޭ ސިޔާސަތުގެ ދަށުން އަގުތަކާއި ދޫކުރާ ތަންތަން މުރާޖާ ކުރުމަށް ކަމަށެވެ.
ކުރުސީ އެކައުންޓުން ތުހުމަތުކޮށްފައިވާ ގޮތުގައި މި ހުރިހާ ކަމެއް ހިނގިއިރު، ހައްސާން ދިޔައީ ރަނގަޅު ޑީލެއް ލިބޭނެ ކަމަށް އޭނާގެ އިންޑިއާ ބައިވެރިންނަށް ޔަގީންކަން އަރުވަމުންނެވެ. އަދި، އޭނާ މި ހުރިހާ ކަމެއް ކުރަމުން ދިޔައީ މުއިއްޒުގެ ލަފަ އާއި އިރުޝާދުގެ ދަށުން ކަމަށެވެ. ހަމައެހެންމެ، ސީދާ މުއިއްޒު ވެސް އަރަޓުގެ ވެރިންނާ ބައްދަލުކުރެއްވި ކަމަށް ވެސް ބުނެފައިވެ އެވެ.
ގާބިލު އިންޑިއާ ކުންފުންޏަކަށް ހައްސާންގެ ކޮން ބޭނުމެއް؟
މި ތިން ރަށް ކުއްޔަށް ނަގާފައިވާ އާޔަތާނާ ހޮސްޕިޓާލިޓީސްގައި އޮންނަނީ ހައްސާން އާއި އިންޑިއާގެ އާޔަތާނާ ހޮސްޕިޓާލިޓީސްގެ ހިއްސާ އެވެ. ބޭރު ހިއްސާދާރުގެ، ހަމަ އެ ނަން ކިޔާ ކުންފުންޏަކީ 2017 އިން ފެށިގެން ޓޫރިޒަމުގެ ހަރަކާތްތެރިވަމުން އަންނަ އަދި އިންޑިއާގެ ގޯއާ އާއި އޫޓީ އާއި ކޫގުގައި ރިސޯޓުތަކެއް ހިންގާ ކުންފުންޏެކެވެ. މި ކުންފުނީގެ ބެލެނިވެރި އަރަޓު ޑިވެލޮޕާސްއަކީ ބެންގަލޫރޫ އޮންނަ ކަރްނަޓާކާ ސްޓޭޓުގައި ރިއަލް އެސްޓޭޓުގައި ފުންނާބު އުސް ކުންފުންޏެކެވެ. މި ކުންފުންޏަށް ލީސް އެކުއިޒިޝަން ކޮސްޓުގެ ގޮތުގައި ނުވަ ލައްކައެއްހާ ޑޮލަރު ދެއްކިދާނެ ކަމާ މެދު ޝައްކެއް ނެތެވެ.
އެކަމަކު މި ކުންފުނިން މި ފައިސާ މީރާއަށް ނަގުދު ފައިސާއިން ދެއްކުމުން ވަރަށް ސުވާލު އުފެދެ އެވެ. ކުރުސީ ލީކުކޮށްލާފައިވާ އަދި އަދަދު ނޫހުން ސައްހަކަން ކަށަވަރުކޮށްފައިވާ މީރާގެ ޕޭމަންޓް ސްލިޕްގައި ވަނީ ލީސް އެކުއިޒިޝަންގެ ގޮތުގައި 864،000 އެމެރިކާ ޑޮލަރު (ގާތްގަނޑަކަށް 13.3 މިލިއަން ރުފިޔާ) ދެއްކީ ސީދާ ނަގުދު ފައިސާއިން ކަމަށެވެ. ނަމަވެސް އެހެން މަސްދަރަކުން ބުނެފައި ވަނީ މި ފައިސާ ކޭޝްގެ ގޮތުގައި ރެކޯޑު ކުރިޔަސް، އެއީ ބޭންކު ޓްރާންސްފާއިން އައި ފައިސާއެއް ކަމަށެވެ.
މި ރަށް ކުއްޔަށް ދީފައިވަނީ ހެކްޓަރެއް 75،000 ޑޮލަރު މަގުންނެވެ. މިއީ ތ. އަތޮޅުން މިދިޔަ އަހަރު ދޫކުރި ކުރަނދިވަރު (ހެކްޓަރަކަށް 671،936 ޑޮލަރު) އަށް ވުރެ އަގު ހެޔޮ އަދި މާގުޅި (ހެކްޓަރަކަށް 57،142 ޑޮލަރު) އަށް ވުރެ ބޮޑު އަގުގައި ކުއްޔަށް ދޫކޮށްފައިވާ ތަނެކެވެ.
މި މުއާމަލާތުގެ ތެރެއިން އިންޑިއާގެ ކުންފުނީގެ ގާބިލުކަމާއި އެ ކުންފުނިން ކުރަން އުޅޭ ކަމަކާ ހިލާފަށް މައްސަލައަަކަށް ވެގެން މި އުޅެނީ ހައްސާންގެ ބައިވެރިވުމެވެ. މިކަމާ ގުޅޭ ގޮތުން ހައްސާން ވަހީދުގެ ބަހެއް ހޯދުމަށް ގުޅައި މެސެޖު ކުރުމުންވެސް އެއްވެސް ޖަވާބެއް ނުދޭތީ އޭނާގެ ބަހެއް ނުލިބުނެވެ.
