ހުޅުމާލެ ފޭސް 2، ވިނަރެސް ފްލެޓު ހަތެއް ކައިރީގައި ހިނގި އެކްސިޑެންޓުގައި އަނިޔާވި ނުވަ އަހަރުގެ އަންހެން ކުއްޖާ އިތުރު ފަރުވާއަށް އައިޖީއެމްއެޗް ހޮސްޕިޓަލަށް ބަދަލުކޮށް، އައިސީޔޫގައި ފަރުވާދޭން ފަށައިފި އެވެ.
އައިޖީއެމްއެޗް ހޮސްޕިޓަލުން އަދަދު އާ ވާހަކަ ދެއްކި އޮފިޝަލަކު ބުނީ އެކްސިޑެންޓުގައި އަނިޔާވި ނުވަ އަހަރުގެ ކުއްޖާއަށް ފަރުވާދެމުންދަނީ އައިސީޔޫގައި ކަމަށާއި އޭނާ އޮތީ ވެންޓިލޭޓަރުގައި ކަމަށެވެ.
ފުލުހުން ބުނީ އެކްސިޑެންޓު ހިނގީ މަގުގެ އެއް ފަރާތުގައި މަޑުކޮށްގެން އޮތް ކާރަކަށް އަރަން ދިޔަ މީހެއްގެ ގައިގައި ސައިކަލަކުން އައިސް ޖެހިގެން ކަމަށާއި މައްސަލަ އިތުރަށް ތަހުގީގު ކުރަމުންދާ ކަމަށެވެ.
މި އެކްސިޑެންޓުގައި ސައިކަލު ދުއްވަން އިން 19 އަހަރުގެ އަންހެން މީހާއަށް ވެސް އަނިޔާވި އެވެ. އެކަމަކު އޭނާގެ ހާލު ރަނގަޅު ކަމަށް ފުލުހުން ބުނެ އެވެ. އެކްސިޑެންޓުގައި އެންމެ ބޮޑަށް އަނިޔާވީ ސައިކަލު ފަހަތުގައި އިން ކުއްޖާއަށެވެ.
"އެ ސަރަހައްދުގެ ސީސީޓީވީ ފުޓޭޖްތަކުން މިހާތަނަށް ބެލިބެލުމުން އެނގޭ ގޮތުގައި، މި އެކްސިޑެންޓް ހިނގަން މެދުވެރިވީ ހިތިގަސްމަގުން ދުއްވާފައި ދިޔަ ސައިކަލެއް، ވިނަރެސް ހަތެއްގެ ކައިރީގައި މަޑުކޮށްފައި އޮތް ކާރަކަށް އަރަން މަގާވީ ފަޅިން ހިނގާފައި ދިޔަ މީހެއްގެ ގައިގައި ޖެހިގެން،" މީޑިއާތަކަށް ފޮނުވި މެސެޖެއްގައި ފުހުން ބުންޏެވެ.
ފުލުހުން އާންމުކޮށްފައިވާ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ހަ މަސްދުވަހު (ޖަނަވަރީ އިން ޖޫން އަށް) މާލެ އާއި ބްރިޖު ހައިވޭގައި އެކަނިވެސް 1،355 އެކްސިޑެންޓް ވަނީ ރެކޯޑުކުރެވިފަ އެވެ. މިއީ ދުވާލެއްގެ މައްޗަށް އެވްރެޖްކޮށް 7.49 އެކްސިޑެންޓެވެ.
