ރިސޯޓުތަކަށް ލިބޭ ޑޮލަރު އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރުމަކީ ކުރެވޭނެ ކަމެއް ނޫން ކަމަށް ބުނެ ރިސޯޓު ވިޔަފާރިތަކުން ކަންބޮޑުވުން ފާޅުކޮށްފައި ވަނިކޮށް، އަންނަ އޮކްޓޫޫބަރުން ފެށިގެން އެ މިންވަރަށް މާރުކުރަން ޖެހޭ ގޮތަށް ބޭރު ފައިސާއާ ބެހޭ ގާނޫނު ބަދަލުކޮށްފި އެވެ.
ރައްޔިތުންގެ މަޖިލީހުން މިދިޔަ ހަފްތާގައި ފާސްކުރި ބިލު މިއަދު މެންދުރު ރައީސް މުހައްމަދު މުއިއްޒު ވަނީ ތަސްދީގުކުރައްވާފަ އެވެ. މީގެކުރިން ބޭރު ފައިސާއާ ބެހޭ ގާނޫނަށް އަމަލުކުރަން ފެށިއިރު ރިސޯޓުތަކުން މާރުކުރަން ޖެހެނީ ބޮލަކަށް 500 ޑޮލަރެވެ.
އާ ގާނޫނު އޮތްގޮތުން މީލާދީ އަހަރެއްގެ ތެރޭގައި 25 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭ ޓޫރިޒަމް ވިޔަފާރިތައް ނޫން އެހެން ވިޔަފާރިތަކަށް ލިބޭ އާމްދަނީގެ 40 ޕަސެންޓު މާރުކުރަން ޖެހެ އެވެ.
ބޭރު ފައިސާއާ ބެހޭ ގާނޫނުގައި ބުނާ ކެޓެގަރީ-ސީ އަށް ގެނައި އެންމެ ބޮޑު ބަދަލަކީ، މާރުކުރަން ޝަރުތު ހަމަވާ އާމްދަނީގެ މިންވަރު އަހަރަކު 15 މިލިއަން ޑޮލަރުން 25 މިލިއަން ޑޮލަރަށް މަތިކުރުމެވެ.
ކެޓެގަރީ ސީ ގައި ހިމެނޭ ވިޔަފާރިތަކުގެ ތެރެއިން 40 ޕަސެންޓު މާރުކުރަން ނުޖެހެނީ ސައްތައިންސައްތަ ދިވެހިން ހިއްސާވާ ކުންފުނިތަކެވެ. ގާނޫނަށް ގެނައި ބަދަލުގައި ވަނީ އެ ކުންފުނިތަކުން މާރުކުރަން ޖެހޭނީ އާމްދަނީގެ ހަތް ޕަސެންޓު ކަމަށެވެ.
ރިސޯޓުތަކަށް ލިބޭ އާމްދަނީގެ 40 ޕަސަންޓު މާރުކުރުމަކީ ކުރެވޭނެ ކަމެއް ނޫން ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ވަނީ ބުނެފަ އެވެ. ރާއްޖޭގައި ހިންގާ 200 ރިސޯޓުގެ ތެރެއިން 146 ރިސޯޓު ތަމްސީލުކުރަނީ އެ ޖަމިއްޔާއިންނެވެ.
މިހާރު އޮންނަ ތިން މަސް ދުވަހުގެ ބަދަލުގައި ޑޮލަރު މާރުކުރަން ޖެހޭ މުއްދަތު ވެސް 28 ދުވަހަށް ވަނީ ކުރުކޮށްފަ އެވެ. އެހެންކަމުން މި މަހު ލިބޭ އާމްދަނީ ޖެހިގެން އަންނަ މަހުގައި ރިސޯޓުތަކުން މާރުކުރަން ޖެހޭނެ އެވެ.
މިހާރު ޓޫރިސްޓު ހިދުމަތްދޭ ތަންތަނުން މާރުކުރަން ޖެހެނީ ބޮލަަކަށް 500 ޑޮލަރު ނޫނީ އާމްދަނީގެ 20 ޕަސެންޓެވެ. އޮކްޓޯބަރުން ފެށިގެން މިއަދު ގެނައި ބަދަލުތަކަށް އަމަލުކުރާނެ އެވެ.
