ބޭރު ފައިސާގެ ގާނޫނަށް ސަރުކާރުން ގެނައި ބަދަލުތަކާ ގުޅިގެން ކުރިއަށް އޮތް ދުވަސްތަކުގައި ޑޮލަރުން މުސާރަ އާއި ސާވިސް ޗާޖު ނުދެވޭނެކަން ރިސޯޓުތަކުގައި މަސައްކަތް ކުރާ މުވައްޒަފުންނަށް އަންގަމުންދާތީ އެކަމާ ދެކޮޅަށް ޓޫރިޒަމް އެމްޕްލޯއީސް އެސޯސިއޭޝަން (ޓީމް) އިން ފަށާފައިވާ ޕެޓިޝަނުގައި 42 ރިސޯޓެއްގެ މުވައްޒަފުން ސޮއިކޮށްފި އެވެ.
ރިސޯޓުތަކަށް ލިބޭ ޑޮލަރު އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރުމަކީ ކުރެވޭނެ ކަމެއް ނޫން ކަމަށް ބުނެ ރިސޯޓު ވިޔަފާރިތަކުން ކަންބޮޑުވުން ފާޅުކޮށްފައި ވަނިކޮށް، އެ ބަދަލު ގާނޫނަށް ވަނީ ގެނެސްފަ އެވެ. އަންނަ އޮކްޓޯބަރުން ފެށިގެން ލިބޭ އާމްދަނީގެ 40 ޕަސެންޓު ރިސޯޓުތަކުން މާރުކުރާނެ އެވެ.
އޭގެ ސަބަބުން އެންމެ ބޮޑު އަސަރެއް ކުރާނީ ރާއްޖޭގެ ރިސޯޓުތަކުގައި މަސައްކަތް ކުރާ މުވައްޒަފުންނަށެވެ. ރިސޯޓުތަކުން މުސާރަ ދެނީ ޑޮލަރުންނެވެ. އެކަމާ ދެކޮޅަށް ޕެޓިޝަނެއްގައި ސޮއިކުރުމުގެ މަސައްކަތް ޓީމްއިން ފެށީ މިދިޔަ ހަފްތާ ބަންދުގަ އެވެ.
"އެއް ދުވަހުގެ ތެރޭގައި، 42 ރިސޯޓެއްގެ މުވައްޒަފުން ވަނީ ޑޮލަރުން ލިބޭ މުސާރަ އާއި ސާވިސް ޗާޖު ދިވެހި ރުފިޔާއަށް ބަދަލުކުރުމާ ދެކޮޅަށް ހުށަހެޅޭ ޕެޓިޝަނުގައި ސޮއިކޮށްފައި. މި ތަރުހީބުން ސާފުކޮށް އެނގެނީ ރިސޯޓު މުވައްޒަފުން އެ މީހުންގެ އާމްދަނީ އާއި، ހައްގުތަކާއި، ދިރިއުޅުމުގެ ވަސީލަތްތައް ދިފާއުކުރުމުގައި އެއްގަލަކަށް އަރާނެކަން،" ޓީމްގެ ފޭސްބުކް ޕޭޖުގައި ބުނެފައިވެ އެވެ.
އެ ރިސޯޓުތަކުގެ ތެރޭގައި ރާއްޖޭގައި ހިންގާ އެކި ފަންތީގެ ރިސޯޓުތައް ހިމެނެ އެވެ. ހުރިހާ ރިސޯޓަކުން ވެސް އެ ޕެޓިޝަނުގައި ސޮއިކުރުމުގައި ބައިވެރިވުމަށް ޓީމްއިން ވަނީ ގޮވާލާފަ އެވެ.
އެ ޕެޓިޝަނުގައި ޑިމާންޑުކުރަނީ ރިސޯޓު މުވައްޒަފުންގެ މުސާާރަ އާއި ސާވިސް ޗާޖު ޑޮލަރުން ދިނުން ހުއްޓޭ ގޮތަށް ސަރުކާރުން އަޅަމުންދާ ފިޔަވަޅުތައް ހުއްޓާލުމަށެވެ. އެ ޕެޓިޝަނުގައި ސޮއިކުރުމުގެ ކަންކަން ޓީމްގެ ފޭސްބުކް ޕޭޖަށް އިންބޮކްސް ކުރުމުން ހަމަޖެހޭނެ ކަމަށް އެ ޔޫނިއަނުން ބުނެ އެވެ.
ރިސޯޓު މުވައްޒަފުންގެ އެއްވެސް އިހުމާލެއް ނެތި ކުަރިމަތިވި ހާލަތެއްގެ އަގު މުވައްޒަފުން ދައްކަން ޖެހޭ ހަމައެއް އޮތްކަމަށް ނުދެކޭ ކަމަށް ޓީމްއިން ބުނެފައިވެ އެވެ. ރަސްމީ ރޭޓުގައި ޑޮލަރު ލިބޭނެ ކަމުގެ ޔަގީންކަން ނެތި މުސާރަ ޑޮލަރަށް ބަދަލުކުރަން ތާއިދުނުކުރާކަން ޓީމްއިން ވަނީ މީގެކުރިން ހާމަކޮށްފަ އެވެ.
ރިސޯޓު މުވައްޒަފުންގެ އާމްދަނީއަށް އަސަރުކުރާނެ އެއްވެސް ފިޔަވަޅެއް އަޅަން ޖެހޭނީ އެންމެ ފަހު ފިޔަވަޅެއްގެ ގޮތުގައި ފުޅާ ދާއިރާއެއްގައި މަޝްވަރާކުރުމަށް ފަހު ކަމަށް ޓީމްއިން ވަނީ ބުނެފަ އެވެ. ޑޮލަރުގެ މައްސަލަ ހައްލުކުރުމަށްޓަކައި ސަރުކާރުގެ ހަރަދުތައް ކުޑަކުރަން ވެސް ޖަމިއްޔާއިން ވަނީ ގޮވާލާފަ އެވެ.
