ޖަލުގައި ހުންނެވި ޕާކިސްތާނުގެ ކުރީގެ ބޮޑުވަޒީރު އިމްރާން ހާނަށް އެކަށީގެންވާ ސިއްހީ ފަރުވާ ފޯރުކޮށްދިނުމަށް ދުނިޔޭގެ މަޝްހޫރު ކުރީގެ ކްރިކެޓް ކެޕްޓަނުންތަކެއް ޕާކިސްތާނު ސަރުކާރަށް ގޮވާލައިފި އެވެ.
މި ބޭފުޅުންގެ ތެރޭގައި އިންޑިއާގެ ބެޓިން ލެޖެންޑް ސުނިލް ގަވާސްކަރާއި، އިނގިރޭސިވިލާތުގެ ގައުމީ ޓީމަށް އެންމެ ގިނަ ދުވަހު ކެޕްޓަންކަން ކޮށްދެއްވި އެއް ކުޅުންތެރިޔާ ކަމަށްވާ ސާ އެލަސްޓެއާ ކުކް ހިމެނެ އެވެ.
ކްރިކެޓް ކުޅުންތެރިއެއްގެ ގޮތުގައި މަޝްހޫރުވެވަޑައިގަތުމަށް ފަހު ސިޔާސީ ދާއިރާއަށް ނުކުމެވަޑައިގެންނެވި އިމްރާން ހާން، ކޮރަޕްޝަންގެ ތުހުމަތުތަކުގައި ޖަލަށްލާފައިވަނީ 2023 ވަނަ އަހަރުން ފެށިގެންނެވެ. ނަމަވެސް އެމަނިކުފާނު ގެންދަވަނީ އެ ހުރިހާ ތުހުމަތުތަކަކަށް އިންކާރު ކުރައްވަމުންނެވެ.
ޕާކިސްތާނުގެ މިހާރުގެ ބޮޑުވަޒީރު ޝެހްބާޒް ޝަރީފަށް ފޮނުއްވި ސިޓީއެއްގައި، ކުރީގެ 21 ކެޕްޓަނުން ވަނީ އުމުރުފުޅުން 73 އަހަރުގެ އިމްރާން ހާންގެ ސިއްހީ ހާލަތާ މެދު ކަންބޮޑުވުން ފާޅުކޮށްފަ އެވެ. އެ ސިޓީގައި ފާހަގަކޮށްފައިވާ ގޮތުގައި، މިދިޔަ ހަފުތާގައި ސަރުކާރުން ކަނޑައެޅި ޑޮކްޓަރުންގެ ޓީމަކުން އިމްރާން ހާން ބެއްލެވުމަށް ހޮސްޕިޓަލުގައި ހޭދަކުރަން ދީފައިވަނީ "މަދު ގަޑިއިރުކޮޅެއް" ކަމަށެވެ.
އިމްރާން ހާންގެ އަމިއްލަ ޑޮކްޓަރުންނާ ބައްދަލުކުރުމުގެ ފުރުސަތު ދިނުމަށް އެ ގައުމުގެ ސުޕްރީމް ކޯޓުން އަމުރުކޮށްފައިވީ ނަމަވެސް، ސަރުކާރުން އެކަމަށް ހުރަސްއަޅަމުންދާތީ އެމަނިކުފާނުގެ ޕާޓީން ވަނީ ކޯޓުގެ އަމުރަށް ނުކިޔަމަންތެރިވި ކަމަށް ބުނެ ސަރުކާރާ ދެކޮޅަށް މައްސަލައެއް ހުށަހަޅާފަ އެވެ.
ކުރީގެ ކްރިކެޓް ކެޕްޓަނުން ފޮނުއްވި ސިޓީގައި މައިގަނޑު ތިން ކަމަކަށް ވަނީ އެދިފަ އެވެ. އޭގެ ތެރެއިން ފުރަތަމަ ކަމަކީ، ޕާކިސްތާނުގެ ސުޕްރީމް ކޯޓުގެ އިރުޝާދުގެ ދަށުން އެކުލަވާލާ މެޑިކަލް ބޯޑަކުން އިމްރާން ހާންގެ ސިއްހީ ހާލަތު ބެލުމެވެ. އަދި އެ ބޯޑުގައި އެމަނިކުފާނުގެ އަމިއްލަ ޑޮކްޓަރުން ހިމެނުމަށާއި، ހާއްސަކޮށް އެމަނިކުފާނުގެ ކަނާތު ލޮލުގެ ފެނުން ދަށްވަމުންދާ ކަމަށް ބުނާ މައްސަލަ ބެލުމަށް ވަނީ އެދިފަ އެވެ.
މީގެ އިތުރުން، ކޯޓުން އަމުރުކޮށްފައިވާ ފަދައިން، އެއްވެސް ހުރަހެއް ނުވަތަ އިދާރީ ލަސްކަމެއް ނެތި ކޮންމެ ހަފުތާއަކު އެއްފަހަރު އިމްރާން ހާންގެ އާއިލާއަށް އެމަނިކުފާނާ ބައްދަލުކުރެވޭނެ އިންތިޒާމު ހަމަޖައްސައިދިނުމަށް ވެސް އެ ބޭފުޅުން ވަނީ ގޮވާލައްވާފަ އެވެ.
އަދި އެންމެ ފަހު ކަމެއްގެ ގޮތުގައި އެދިފައިވަނީ، މެޑިކަލް ބޯޑުން ލަފާދޭ އެއްވެސް ފަރުވާއެއް ލަސްކުރުމެއް ނެތި ފޯރުކޮށްދިނުމަށެވެ.
އޮސްޓްރޭލިއާގެ ކުރީގެ ކެޕްޓަން ގްރެގް ޗެޕަލް އިސްވެ ހުންނަވައި ފޮނުއްވި އެ ސިޓީގައި ބުނެފައިވަނީ، އިމްރާން ހާންގެ އުމުރުފުޅަކީ 73 އަހަރު ކަމަށާއި، އެމަނިކުފާނު ބަންދުގައި ހުންނަވާތާ މިހާރު ތިން އަހަރަށްވުރެ ގިނަ ދުވަސް ވެފައިވާ ކަމަށެވެ.
"އެމަނިކުފާނުގެ މައްސަލައިގައި ހުރި ގާނޫނީ އަދި ސިޔާސީ ބަހުސްތައް ކޮންމެ ގޮތަކަށް ހުރި ނަމަވެސް، ކޯޓުން އަމުރުކޮށްފައިވާ ސިއްހީ ފަރުވާގެ ކަންކަން ފުރިހަމަކޮށްދިނުމަކީ އިންސާނިއްޔަތުކަމުގެ ގޮތުން ބަލާއިރު ބަހުސް ކުރަންޖެހޭ ފަދަ ކަމެއް ނޫން،" އެ ސިޓީގައި ބުނެފައިވެ އެވެ.
މި ސިޓީގައި ސޮއިކުރެއްވި އެހެން ބޭފުޅުންގެ ތެރޭގައި އިނގިރޭސިވިލާތުގެ މައިކަލް އެތަޓަން، މައިކަލް ބްރިއާލީ، ނާސިރު ހުސައިން، އެންޑްރޫ ސްޓްރައުސް އަދި ޑޭވިޑް ގޯވާ ހިމެނެ އެވެ. މީގެ އިތުރުން އިންޑިއާގެ ކަޕިލް ދޭވް އާއި ދިލިޕް ވެންގްސަކަރްގެ އިތުރުން އޮސްޓްރޭލިއާގެ ބެލިންޑާ ކްލާކް، އެޑަމް ގިލްކްރިސްޓް، ސްޓީވް ވޯ އަދި ކިމް ހިއުސް ވެސް ހިމެނެ އެވެ.
މި ސިޓީގައި ސޮއިކުރެއްވި ކެޕްޓަނުންގެ ތެރެއިން 14 ބޭފުޅަކީ، މި އަހަރުގެ ފެބްރުއަރީ މަހު އިމްރާން ހާނަށް "އިންސާނީ ގޮތުންނާއި އެކަށީގެންވާ ސިއްހީ ފަރުވާ" ދިނުމަށް ގޮވާލައި ހުށަހެޅި އިލްތިމާސްގައި ވެސް ބައިވެރިވި ބޭފުޅުންނެވެ.
އެ ދުވަސްވަރު އިމްރާން ހާންގެ ވަކީލު ވިދާޅުވެފައިވަނީ، ޖަލުގެ އިދާރާތަކުން ފަރުވާ ދިނުމުގައި އިހުމާލުވުމުގެ ސަބަބުން، އެމަނިކުފާނުގެ ކަނާތު ލޮލުގެ ފެނުމުގެ ތެރެއިން ބާކީ ހުރީ އެންމެ 15 އިންސައްތަ ކަމަށެވެ.
ޕާކިސްތާނުގެ ގައުމީ ކްރިކެޓް ޓީމުގެ ކެޕްޓަންކަން ކުރެއްވި އިމްރާން ހާން، އެ ގައުމުގެ ބޮޑުވަޒީރުކަން ކުރެއްވީ 2018 އިން 2022 އަށެވެ.
އޮގަސްޓް 2023 ގައި އެމަނިކުފާނު ޖަލަށްލެވުނީ، ދައުލަތުގެ ސިއްރުތައް ހާމަކުރުމާއި ދައުލަތަށް ލިބުނު ހަދިޔާތައް ވިއްކާލުން ފަދަ 100 އަށްވުރެ ގިނަ މައްސަލައިގެ ތުހުމަތުގަ އެވެ. ނަމަވެސް އިމްރާން ހާން އާއި އެމަނިކުފާނުގެ ޕާޓީ، ޕާކިސްތާން ތަހްރީކޭ އިންސާފް (ޕީޓީއައި) އިން ބުނަމުންދަނީ އެއީ ސިޔާސީ މަގްސަދެއްގައި ކުރާ ތުހުމަތުތަކެއް ކަމަށެވެ.
