ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ ސިއްހީ ހާލަތު ގޯސްވުމާ ގުޅިގެން، ފަރުވާ ދިނުމަށްޓަކައި ވެރިރަށް އިސްލާމްއާބާދުގެ ހޮސްޕިޓަލަކަށް ބަދަލުކޮށްފިއެވެ.
އިމްރާން ޚާން މިހާތަނަށް ހުންނެވި އަދިއާލާ ޖަލުން ޝިފާ އިންޓަނޭޝަނަލް ހޮސްޕިޓަލަށް ގެންގޮސްފައިވަނީ ވަރުގަދަ ސަލާމަތީ ފިޔަވަޅުތަކަކާއެކުގަ އެވެ. އިމްރާން ޚާންގެ ޕާޓީން މިކަން ކަށަވަރުކޮށްދީފައިވީ ނަމަވެސް، ސަރުކާރުގެ ރަސްމީ އިދާރާއަކުން އަދި މިކަމާ ގުޅޭގޮތުން ވަކި އެއްޗެއް ހާމަކޮށްފައެއް ނުވެއެވެ.
އިމްރާން ޚާން ހޮސްޕިޓަލަށް ބަދަލުކުރުމަށް ނިންމާފައިވަނީ ޕާކިސްތާނުގެ ސުޕްރީމް ކޯޓުގެ ތިން ފަނޑިޔާރުންގެ ބެންޗަކުން ކުރި އަމުރަކާ ގުޅިގެންނެވެ. އެ ކޯޓުން ވަނީ 48 ގަޑިއިރުގެ ތެރޭގައި އިމްރާން ޚާން ހޮސްޕިޓަލަށް ގެންގޮސް ޑޮކްޓަރުންގެ ހާއްސަ ޓީމަކުން އޭނާގެ ބަލިތައް ތަހުލީލު އަމުރުކޮށްފަ އެވެ.
މިއީ 2023 ވަނަ އަހަރު ކޮރަޕްޝަނުގެ ތުހުމަތުގައި އިމްރާން ޚާން ޖަލަށްލީ ފަހުން ކޯޓަކުން އޭނާއަށް ލިބުނު އެންމެ ބޮޑު ލުޔެވެ. އިމްރާން ޚާން އަބަދުވެސް ވިދާޅުވަމުން ގެންދަވަނީ އޭނާގެ މައްޗަށް އުފުލާފައިވާ ދައުވާތަކަކީ ސިޔާސީ މަގުސަދެއްގައި އުފުލާފައިވާ ދޮގު ދައުވާތަކެއް ކަމަށެވެ.
ކޯޓުގެ އަމުރުގައި އިމްރާން ޚާންގެ އާއިލާއާ ބައްދަލުކުރުމުގެ ފުރުސަތު ދިނުމަށްވެސް ވަނީ އަންގާފަ އެވެ. މިއީ އެތައް މަސްތަކެއްގެ މެދުކެނޑުމަކަށްފަހު އޭނާއަށް ލިބުނު ފުރުސަތެކެވެ. މިގޮތުން އަންގާރަ ދުވަހުގެ ރޭ އޭނާގެ އަންހެން ކޮއްކޮ ވަނީ ޖަލަށް ޒިޔާރަތްކޮށް އޭނާއާ ބައްދަލުކޮށްފަ އެވެ. އިމްރާން ޚާންގެ ޕާޓީ ކަމަށްވާ ތަހްރީީކޭ އިންސާފުން އާންމުކޮށް ކޯޓުތަކުގެ ނިންމުންތަކަށް ފާޑުކީ ނަމަވެސް، މި ނިންމުމުގެ ފަހަތުގައި ސިޔާސީ ކުޅިގަނޑެއް އޮތް ކަމަށް ބުނެ އެއްވެސް ވާހަކައެއް އަދި ދައްކާފައެއް ނުވެއެވެ.
ޝިފާ އިންޓަނޭޝަނަލް ހޮސްޕިޓަލް ހިމެނޭ ސަރަހައްދު މިހާރު ވަނީ ފުލުހުން ބަންދުކޮށްފަ އެވެ. އެ ސަރަހައްދުގައި ގިނަ އަދަދެއްގެ ފުލުހުންނާއި ސަލާމަތީ ބާރުތަކުގެ އުޅަނދުތައް ދަނީ ހަރަކާތްތެރިވަމުންނެވެ. ސުޕްރީމް ކޯޓުން ވަނީ ހޮސްޕިޓަލް ސަރަހައްދުގައި އެއްވެސް ސިޔާސީ ހަރަކާތެއް ނުހިންގުމަށާއި، ނޫސްވެރިންގެ ބައްދަލުވުންތައް ނުބޭއްވުމަށް އިމްރާން ޚާންގެ ޕާޓީއަށް އަންގާފަ އެވެ. މިއީ އޭނާގެ ބަލިހާލަތު ސިޔާސީ ކަމަކަށް ހެދިޔަ ނުދިނުމަށް އެޅި ފިޔަވަޅެކެވެ.
އުމުރުން 73 އަހަރުގެ އިމްރާން ޚާންގެ ވަކީލުން ވިދާޅުވާ ގޮތުގައި އޭނާ ގެންދަވަނީ ސިއްހީ ގިނަ މައްސަލަތަކެއް ތަހައްމަލު ކުރައްވަމުންނެވެ. އޭގެ ތެރޭގައި ލޮލުގެ ފެނުން ދަށްވުމުގެ މައްސަލަ ހިމެނެއެވެ. މިދިޔަ ފެބްރުއަރީ މަހު ވަކީލުން ބުނެފައިވަނީ ޖަލުން އެކަށީގެންވާ ފަރުވާ ނުލިބުމުގެ ސަބަބުން އިމްރާން ޚާންގެ ކަނާތު ލޮލުގެ ފެނުން ސަތޭކައަކުން ފަނަރަ ޕަސެންޓަށް ދަށްވެފައިވާ ކަމަށެވެ. ނަމަވެސް ސަރުކާރުން މި ވާހަކަތައް ދޮގުކުރެއެވެ.
ސުޕްރީމް ކޯޓުގެ އަމުރުގައި ފާހަގަކޮށްފައިވަނީ ކޮންމެ ގައިދީއެއްގެވެސް ފުރާނައާއި، ސިއްހަތާއި، ކަރާމާތް އަދި ރައްކާތެރިކަން ކަށަވަރުކޮށްދިނުމަކީ ގާނޫނީ އަދި ދުސްތޫރީ ވާޖިބެއް ކަމަށެވެ. އަދި ހޮސްޕިޓަލުގައި ފަރުވާ ދޭއިރު ލޮލުގެ ހާއްސަ ޑޮކްޓަރަކު ބައިވެރިކުރުމަށްވެސް ފަނޑިޔާރުން ވަނީ އަންގާފަ އެވެ. މީގެ އިތުރުން، އިމްރާން ޚާންގެ ސަޕޯޓަރުން ހޮސްޕިޓަލް ދޮށަށް އެއްނުވުމަށް ޕާޓީގެ އިސްވެރިންނާއި ކޯޓުން ވަނީ އިލްތިމާސްކޮށްފަ އެވެ.
ޕާކިސްތާނުގެ ގައުމީ ކްރިކެޓް ޓީމުގެ ކުރީގެ ކެޕްޓަން އިމްރާން ޚާން ބޮޑުވަޒީރުކަން ކުރެއްވީ 2018 އިން 2022 އަށެވެ. އޭނާ ޖަލަށްލެވުނީ 2023 ވަނަ އަހަރުގެ އޮގަސްޓް މަހުގައެވެ. އޭނާގެ މައްޗަށް ސަތޭކައަށްވުރެ ގިނަ މައްސަލަ ހުށަހެޅިފައިވާއިރު، އޭގެ ތެރޭގައި ދައުލަތުގެ ސިއްރުތައް ހާމަކުރުމާއި ދައުލަތަށް ލިބުނު ހަދިޔާތައް ވިއްކުމުގެ ތުހުމަތު ހިމެނެއެވެ.
އިމްރާން ޚާންއާއި އޭނާގެ އަނބިކަނބަލުން ބުޝްރާ ބީބީގެ މައްޗަށް އިއްވީ 17 އަހަރުގެ ޖަލު ހުކުމެކެވެ. އިމްރާން ޚާން ޖަލަށްލުމާ ގުޅިގެން އޭނާގެ ސަޕޯޓަރުން ބޮޑެތި މުޒާހަރާތަކެއް ކޮށްފައިވާއިރު، އޭނާއަކީ އަދިވެސް ޕާކިސްތާނުގެ ސިޔާސީ މަސްރަހުގައި ވަރަށް ނުފޫޒުގަދަ ބޭފުޅެކެވެ.
