ލަންޑަން (އޮގަސްޓް 29) - މިދިޔަ ތިން އަހަރު ޖަލުގައި ހުންނެވި ޕާކިސްތާންގެ ކުރީގެ ބޮޑުވަޒީރު އަދި ކާމިޔާބު ކްރިކެޓް ކެޕްޓަން، އިމްރާން ހާންގެ ދެ ފިރިހެން ދަރިން ކަމަށްވާ ސުލެއިމާން ހާން އާއި ކާސިމް ހާންގެ އިންޓަވިއުއެއް ސްކައި ސްޕޯޓްސް އިން ދައްކައިފިނަމަ މިހާރު ޕާކިސްތާނުން އިނގިރޭސިވިލާތުގައި ކުރިއަށްގެންދާ ޓެސްޓް ކްރިކެޓް ޓުއާ ކެންސަލް ކޮށްލާނެ ކަމުގެ އިންޒާރު ޕާކިސްތާން ކްރިކެޓް ބޯޑް (ޕީސީބީ) އިން ދީފި އެވެ.
ކްރިކެޓް ކުޅުންތެރިއެއްގެ ގޮތުގައި މަޝްހޫރުވެވަޑައިގަތުމަށް ފަހު ސިޔާސީ ދާއިރާއަށް ނުކުމެވަޑައިގެންނެވި އިމްރާން ހާން، ކޮރަޕްޝަންގެ ތުހުމަތުތަކުގައި ޖަލަށްލާފައިވަނީ 2023 ވަނަ އަހަރުން ފެށިގެންނެވެ. ނަމަވެސް އެމަނިކުފާނު ގެންދަވަނީ އެ ހުރިހާ ތުހުމަތުތަކަކަށް އިންކާރު ކުރައްވަމުންނެވެ. ޖަލުގައި ހުންނެވި ޕާކިސްތާނުގެ ކުރީގެ ބޮޑުވަޒީރު އިމްރާން ހާނަށް އެކަށީގެންވާ ސިއްހީ ފަރުވާ ފޯރުކޮށްދިނުމަށް ދުނިޔޭގެ މަޝްހޫރު ކުރީގެ ކްރިކެޓް ކެޕްޓަނުންތަކެއް ޕާކިސްތާނު ސަރުކާރަށް އަންނަނީ ގޮވާލަމުންނެވެ.
ޕާކިސްތާން އާއި އިންގްލެންޑްގެ ޓެސްޓް ސީރީސްގެ ފުރަތަމަ ދުވަހުގެ ލަންޗް ބްރޭކް ވަގުުތުގައި ސްކައި ސްޕޯޓްސް އިން ވަނީ ސުލެއިމާން އާއި ކާސިމްގެ އިންޓަވިއު ދައްކައިފަ އެެވެ. އެ އިންޓަވިއު ދައްކާފައިވާއިރު، ޕާކިސްތާންގެ ކްރިކެޓް ބޯޑުން ވަނީ ބާކީ ތިން މެޗު ކެންސަލްކުރަން ޖެހިދާނެ ކަމުގެ އިންޒާރު ދީފަ އެވެ.
ޕާކިސްތާންގެ ކްރިކެޓް ޓީމުގެ ކޯޗު، ސަރްފަރާޒް އަހުމަދު ބުނެފައިވަނީ، ޕާކިސްތާންގެ ކްރިކެޓް ބޯޑުގެ އެ ފަދަ ކަމެއްގެ މައުލޫމާތު އޭނާ އަށް ލިބިފައިނުވާ ކަމަށެވެ.
"ތި ވާހަކަ ދައްކާ އިންޓަވިއުއެއްގެ މައުލޫމާތު އަހަރެމެންނަށް ލިބިފައި ނެތް،" ސަރްފަރާޒް ބުންޏެވެ.
ޕާކިސްތާންގެ ކްރިކެޓް ބޯޑުގެ ޗެއާމަން، މޮހްސިން ނާގްވީ އަކީ އެ ގައުމުގެ އިންޓީރިއާ މިނިސްޓަރެވެ.
ކާސިމް އާއި ސުލެއިމާންގެ އިންޓަވިއު ނަގާފައިވަނީ އިންގްލެންޑްގެ ކުރީގެ ކެޕްޓަން، މައިކަލް އެތާޓަން އެވެ. އެ އިންޓަވިއުގައި ކާސިމް އާއި ސުލެއިމާން ވަނީ ބައްޕަ، އިމްރާން އަށް ޖަލުގައި ކަންކަން ވަމުން އަންނަ ގޮތާ މެދު ނުތަނަވަސްކަން ހުރި ކަމަށާއި އެކަމާ މެދު އިނގިރޭސި ސަރުކާރުން ގެންގުޅޭ ސިޔާސަތާ މެދު ވެސް ކަންބޮޑުވާ ކަމަށް ބުނެފަ އެވެ.
ސްކައި އަށް މި އިންޓަވިއުގެ ޝަކުވާ ލިބުމާ ގުޅިގެން އިނގިރޭސި ސަރުކާރުގެ ލަފާ ހޯދި އެވެ. އަދި، އިންޓަވިއު ދެއްކީ ވެސް އިނގިރޭސި ސަރުކާރަށް އަންގާފައި ކަމަށް ރިޕޯޓްތައް ބުނެ އެވެ. އެކަމަކު، ޕާކިސްތާނުން ސްކައި އިން ރައިޓްސް ނަގައިގެން މި ޓުއާގެ މެޗުތައް ދައްކަމުން އަންނަ ޕީޓީވީ އިން ސުލެއިމާން އާއި ކާސިމްގެ އިންޓަވިއު ދައްކާފައިނުވެ އެވެ.
ލެޖެންޑަރީ އޯލްރައުންޑަރު، އިމްރާން ހާން 73، ވަނީ 21 އަހަރު އިންޓަނޭޝަަނަލް ކްރިކެޓް ކުޅެފަ އެވެ. އަދި، 1992 ވަނަ އަހަރު ޕާކިސްތާނަށް އައިސީސީ ކްރިކެޓް ވޯލްޑް ކަޕް ކާމިޔާބުކޮށްދިނީ އިމްރާން ހާންގެ ކެޕްޓަންކަމުގަ އެވެ. ޕާކިސްތާންގެ ބޮޑު ވަޒީރު ކަމުގައި އިމްރާން ހާން ހުންނެވީ 2018 އިން 2022 އަށެވެ.
ކާސިމް އާއި ސުލެއިމާން ދިރިއުޅެނީ އިނގިރޭސިވިލާތުގަ އެވެ. އެކި ފަހަރު މަތިން އިމްރާން ހާންއާ ބައްދަލުކުރެވޭތޯ ކާސިމް އާއި ސުލެއިމާން އަންނަނީ މަސައްކަތް ކުރަމުންނެވެ.
