ޕާކިސްތާނުގެ ވެރިރަށް އިސްލާމްއާބާދުގައި ހުންނަ ސަރުކާރުގެ މައި ހޮސްޕިޓަލެއްގައި ބުދަ ދުވަހު ހިނގި އަލިފާނުގެ ހާދިސާއެއްގައި މަދުވެގެން 15 ތުއްތު ކުދިން މަރުވެއްޖެ އެވެ.
މި ހާދިސާ ހިނގަން މެދުވެރިވީ އެއާކޮންޑިޝަން ސިސްޓަމަށް ދިމާވި މައްސަލައަކުން ކަމަށް އެ ގައުމުގެ މީޑިއާތަކުން ރިޕޯޓްކުރެ އެވެ.
ޕާކިސްތާން އިންސްޓިޓިއުޓް އޮފް މެޑިކަލް ސައިންސަސް (ޕިމްސް) ގެ ތުއްތު ކުދިންގެ ވޯޑުގެ ތިންވަނަ ފަންގިފިލާގައި މި އަލިފާން ރޯވީ ބުދަ ދުވަހުގެ ހެނދުނު 7:00 ހާއިރު ކަމަށް ޖިއޯ ޓީވީން ރިޕޯޓްކުރެ އެވެ.
މިއީ ފަހުގެ ތާރީހެއްގައި ޕާކިސްތާނުގެ ހޮސްޕިޓަލެއްގައި ހިނގި އެންމެ ނުރައްކާތެރި އެއް އަލިފާނުގެ ހާދިސާ އެވެ. ޕާކިސްތާނުގެ ސަރުކާރު ހޮސްޕިޓަލްތަކަކީ ސަބްސިޑީ ދީގެން ހިންގާ ތަންތަން ކަމަށް ވިޔަސް، އެ ތަންތަނަކީ ވަސީލަތްތައް މަދު އަދި ބާރުބޮޑު ތަންތަނެވެ. އަދި ސަރުކާރުގެ މިފަދަ މަރުކަޒުތައް ހިންގުމުގައި އިހުމާލުވާ ކަމަށް ބުނެ މޮނިޓަރިން އިދާރާތަކުން އަބަދުވެސް ފާޑުކިޔަ އެވެ.
ޖިއޯ ޓީވީން ރިޕޯޓްކޮށްފައިވާ ގޮތުގައި އަލިފާން ރޯވި ވަގުތު އެ ވޯޑުގައި 16 ތުއްތު ކުދިން ތިއްބެވެ. އޭގެ ތެރެއިން ސަލާމަތް ކުރެވުނީ އެންމެ ކުއްޖެކެވެ. ބޮޑުވަޒީރު ޝެހްބާޒް ޝަރީފްގެ އޮފީހުން ބުނީ މި ހާދިސާ ވަގުތުން ތަހުގީގު ކުރުމަށް ކަމާބެހޭ ފަރާތްތަކަށް އަންގާފައިވާ ކަމަށެވެ.
ރޮއިޓާސްގެ ނޫސްވެރިއަކު ބުނި ގޮތުގައި އަލިފާން ރޯވި ވޯޑު މިހާރު އޮތީ ބަންދުކޮށް، ސަލާމަތީ ބާރުތަކުގެ ބެލުމުގެ ދަށުގަ އެވެ.
މި ހާދިސާއާ ގުޅިގެން ހޮސްޕިޓަލުން ނުވަތަ ސަރުކާރުގެ އިދާރާތަކުން އަދި ރަސްމީކޮށް އެއްޗެއް ބުނެފައެއް ނުވެ އެވެ.
އިސްލާމްއާބާދުގެ މެދުތެރޭގައި ހުންނަ ޕިމްސް ހޮސްޕިޓަލަކީ ގާތްގަނޑަކަށް 1.1 މިލިއަން މީހުންގެ އާބާދީއަކަށް ހިދުމަތްދޭ އެ ސިޓީގެ މައި ސަރުކާރު ހޮސްޕިޓަލެވެ. މިއީ މިދިޔަ ހަފުތާގައި ކުރީގެ ބޮޑުވަޒީރު އިމްރާން ހާނަށް ވެސް ކުޑަދުވަސްކޮޅަކަށް ފަރުވާ ދިން ހޮސްޕިޓަލެވެ.
