މި ސަރުކާރުން އައްޑޫގެ ތަރައްގީއަށް ހުރަސްއަޅައި، އެ ސިޓީގެ ރައްޔިތުންނަށް އަނިޔާވެރިވަމުން ދާތީ އެކަމާ ދެކޮޅަށް އައްޑޫ ރައްޔިތުން މުޒާހަރާކުރަން މޭޔަރު އަލީ ނިޒާރު ގޮވައިލައްވައިފި އެވެ.
އައްޑޫ ސިޓީގެ މޭޔަރު، ނިޒާރު އެކްސްގައި ކުރެއްވި ޕޯސްޓެއްގައި ވިދާޅުވީ އެ ސިޓީގެ ފެނަކައަށް ނިސްބަތްވާ 100 އަށްވުރެ ގިނަ ރައްޔިތުން ވަޒީފާއިން ވަކިކުރުމަކީ އެތަކެއް އާއިލާއެއް ބިކަވެ، އައްޑޫގެ އިގުތިސާދަށް ބޮޑެތި ގެއްލުނެ ލިބޭނެ ނިންމުމެއް ކަމަށެވެ.
އަދި، އެ މުވައްޒަފުން ވަކިކުރީ ސީދާ އެ މީހުންގެ ސިޔާސީ ފިކުރަށް ބަލައިގެންކަން ޔަގީން ކުރެވޭ ކަމަށް ނިޒާރު ވިދާޅުވި އެވެ.
"މި އަނިޔާ އާއި ތަފާތުކުރުމާއި ދެކޮޅު ހަދަންޖެހޭ، އައްޑޫ ސިޓީގެ ތަރައްގީއަށް ހުރަސްއެޅުމާއި ރައްޔިތުންނަށް އަނިޔާވެރިވުމާއި އަދި އޮޅުވައިލުން އިތުރުކޮށްފައިވުމާ އެކުއައްޑޫ ސިޓީގެ ރައްޔިތުން ސަރުކާރުގެ އަނިޔާވެރި ސިޔާސަތުތަކާ ދެކޮޅަށް ގާނޫނުއަސާސީން ކަށަވަރުވާ ހައްގުތަކުގެ ތެރެއިންނާއި ގާނޫނީ އިންތަކުގެ ތެރެއިން އިހުތިޖާޖަށް ނިކުތުމަށް ގޮވައިލަން،" ނިޒާރު ކުރެއްވި ޕޯސްޓުގައި ލިޔުއްވާފައިވެ އެވެ.
އެ ޕޯސްޓު ނިންމަވައިލައްވަމުން ނިޒާރު ލިޔުއްވާފައި ވަނީ، މުޒާހަރާއަށް ނުކުންނަ ރައްޔިތުންނާއެކު އޭނާ ހުންނަވާނެ ކަމަށެވެ.
އައްޑޫ ފެނަކަ ބްރާންޗުން މުވައްޒަފުންތަކެއް ވަކިކުރީ މި މަހުގެ 13 ވަނަ ދުވަހު އެވެ. އެ މުވައްޒަފުން ވަޒީފާއިން ވަކިކޮށްފައި ވަނީ އައްޑޫ ސިޓީގެ ތިން ދާއިރާ ތަމްސީލުކުރައްވާ، އަހުމަދު އަޒާން މަރުޒޫގު އާއި އިބްރާހިމް ދީދީ(އައިބީ) އަދި އިސްމާއިލް ނިޒާރުގެ އިރުޝާދުގެ ދަށުން ކަމަށް އައްޑޫ ސިޓީގެ މޭޔަރު، އަލީ ނިޒާރު ތުހުމަތު ކުރައްވަ އެވެ.
އެކަމާ ބެހޭގޮތުން މީގެކުރިން އަދަދުއާ ވާހަކަދައްކަވަމުން ނިޒާރު ވިދާޅުވީ ވަޒީފާއިން ކަނޑާލާފައި ވަނީ އައްޑޫ ފެނަކައިގައި މަސައްކަތްކުރާ ސުޕަވައިޒަރު ލެވެލްއަށް ވުރެ ދަން ފަންތީގެ މުވައްޒަފުން ކަމަށެވެ.
ސަރުކާރުގެ ސިޔާސަތުތަކާ ދެކޮޅަށް މުޒާހަރާކުރަން ނިޒާރު ގޮވާލައްވައިފައިވާއިރު، ކައުންސިލްތަކުގެ އިހުތިސާސްގައި ހިމެނޭ ބިންތައް ސަރުކާރަށް ނެގޭ ބިލާ ދެކޮޅަށް މުޅި ރާއްޖޭގެ ހުރިހާ ކައުންސިލެއް ގުޅިގެން އިހުތިޖާޖު ކުރަން މާލެ ސިޓީ ކައުންސިލުން ވެސް ވަނީ ނިންމައިފަ އެވެ.
