އައްޑޫ ސިޓީގައި މަސައްކަތްކުރާ ފެނަކަ ކޯޕަރޭޝަންގެ 189 މުވައްޒަފުން ވަކިކުރުމާ ގުޅިގެން އެ މުވައްޒަފުންގެ ހައްގުގައި ވަކާލާތުކުރަން ސ. ހިތަދޫ ފެނަކަ ވައިބާ ކޮމިއުނިޓީ ގްރޫޕް ހާއްސަކޮށްފި އެވެ.
4،000 އަށްވުރެ ގިނަ މީހުން ތިބޭ އެ ވައިބާ ގްރޫޕްގެ ސުޕަ އެޑްމިންއަކު ވަނީ ގްރޫޕްގެ ނަން "ނާއިންސާފުން 189 މުވައްޒަފުން ވަކިކުރުމާ ދެކޮޅަށް" އަށް ބަދަލުކޮށް، ގްރޫޕްގެ އައިކަންވެސް ހައްގުތައް ހޯދުމަށް ހިތްވަރުދޭ ލިޔުމެއް ހިމެނޭ ފޮޓޯއަކަށް ބަދަލުކޮށްފަ އެވެ. އެ ގްރޫޕަކީ ކުރިން ހިތަދޫ ކޮމިއުނިޓީއަށް ބޭނުންވާ މެސެޖުތައް ފޯރުކޮށްދޭން ހިތަދޫ ފެނަކައިން ބޭނުން ކުރަމުންދިޔަ ގްރޫޕެކެވެ.
ގްރޫޕަށް ސުޕަ އެޑްމިންއަކު ފޮނުވި މެސެޖެއްގައި ބުނީ ކުންފުނި “ރައިޓް ސައިޒް” ކުރުމުގެ ނަމުގައި އެއްވެސް ހަމައެއް އިންސާފެއް ނެތި ހިތަދޫ އަދި މަދޫފޭދޫ ފެނަކަ އޮފީހުން 189 މުވައްޒަފުން ވަކިކޮށް މަގުމަތިކޮށްފައިވާ ކަމަށެވެ.
އޭނާ ބުނީ ވަޒީފާއިން ވަކިކުރި މުވައްޒަފުންގެ ތެރޭގައި ހިމެނެނީ އެންމެ ރަނގަޅަށް މަސައްކަތް ކުރަމުންދިޔަ މީހުން ކަމަށެވެ.
މީގެއިތުރުން ވަޒީފާއިން ވަކިކުރާނެ މުވައްޒަފުން ކަނޑައެޅީ ޕީއެންސީއަށް ނިސްބަތްވާ ތިން މަޖިލިސް މެންބަރުން ކަމަށްވާ ހިތަދޫ އުތުރު ދާއިރާގެ މެންބަރު އަޒާން މަރުޒޫގް އާއި ފޭދޫ ދެކުނު ދާއިރާގެ މެންބަރު އިބްރާހިމް ދީދީ އަދި ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ކަމަށް އޭނާ ބުންޏެވެ.
"މިއީ 3 މެމްބަރުންގެ ޒާތީ އެޖެންޑާއެއްގެ ތެރެއިން ހިންގާފައިވާ ބޮޑު ޖަރީމާއެއް. އަދި އައްޑޫގެ އެތައް ޢާއިލާއަކަށް ދިން ބޮޑު ދެރައެއް،" ގްރޫޕްގެ ސުޕަ އެޑްމިން ފޮނުވި މެސެޖުގައި އިތުރަށް ބުންޏެވެ.
އައްޑޫގެ އިތުރުން ވެސް ރާއްޖޭގެ އެކި ކަންކޮޅުގައި މަސައްކަތްކުރާ ސަރުކާރު ހިއްސާވާ ކުންފުނިތަކުގެ މުވައްޒަފުން ގެންދަނީ ވަޒީފާއިން ވަކިކުރަމުންނެވެ. އޭގެ ސަބަބެއްގެ ގޮތުގައި ކުންފުނިތަކުން ދައްކަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނެރެފައިވާ ސާކިއުލާ އެވެ.
ސަރުކާރު ހިއްސާވާ ކުންފުނިތަކުން 33 ޕަސެންޓު މުވައްޒަފުން ވަކިކުރަން ޕީސީބީން އެންގީ މިދިޔަ އޭޕްރިލް މަހު އެވެ. ޕީސީބީގެ އެ އެންގުމަކީ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރަށް ލިބުނު ނާކާމިޔާބީގެ ސަބަބުން، އެންެގި އެންގުމެއް ކަމަށް ގިނަ ބަޔަކު އަންނަނީ ބުނަމުންނެވެ.
އެ ސާކިއުލާއާ އެއްގޮތަށް، ސަރުކާރު ހިއްސާވާ ކުންފުނިތަކުން 33 ޕަސެންޓު މުވައްޒަފުން ތިން މަސްދުވަހުގެ ތެރޭގައި ވަކިކޮށް ނިންމުމަށް އަންގައި މިދިޔަ މަހުގެ 18، ގައި ޕީސީބީން ވަނީ އިތުރު ސާކިއުލާއެއް ނެރެފަ އެވެ. އެ ސާކިއުލާގައި އަންގާފައި ވަނީ ޖުލައި 13. އިން ފެށިގެން ތިން މަސްދުވަހުގެ ތެރޭގައި އެ މަސައްކަތްކޮށް ނިންމުމަށެވެ. އެ މުއްދަތު ހަމަވާނީ އަންނަ އޮކްޓޫބަރު މަހު އެވެ.
