ރާއްޖެއިން ގޭހާއި ގުދުރަތީ އެހެނިހެން މައުދަން ހޯދަން މަސައްކަތް ކުރުމުގެ ހުއްދަ ދޭން ސަރުކާރުން އާދީއްތަ ދުވަހު ނިންމައިފި އެވެ.
ރައީސް އޮފީހުން މިއަދު އާންމު ކުރި ލިޔުމެއްގައި ބުނެފައި ވަނީ، ގޭހާއި އެހެނިހެން މައުދަން ނެގުމުގެ ހުއްދަ ދޭނީ އަދި އެ މަސައްކަތް ކުރިއަށްގެންދާނީ ގާނޫނީ އޮނިގަނޑެއްގެ ތެރެއިން ކަމަށެވެ.
"ދިވެހިރާއްޖޭގެ ކަނޑުގެ ސަރަހައްދުގައިވާ ތެލާއި، ގޭހާއި، މައުދަނުގެ އިތުރުން ދިރުންނެތް ކަނޑުގެ އެހެނިހެން ގުދުރަތީ ވަސީލަތްތައް ހޯދައި ނެގުމާ ގުޅޭ ހާއްސަ ގާނޫނީ އޮނިގަނޑެއް އެކުލަވާލުމަށް ވަޒީރުންގެ މަޖިލީހުން ނިންމަވައިފި،" ރައީސް އޮފީހުން ބުންޏެވެ.
ރައީސް އޮފީހުން ބުނީ ކަނޑުން ނަގާ ތަކެތީގެ މިލްކުވެރިކަން ކަނޑައެޅުމުގެ އުސޫލުތައް ވެސް ފަރުމާ ކުރާ ގާނޫނުގައި ބަޔާން ކުރާނެ ކަމަށެވެ.
"ދިރުންނެތް ކަނޑުގެ ގުދުރަތީ ވަސީލަތްތައް ހޯދައި ނެގުމަށް ހުއްދަ ދިނުމާއި، ނަގާ ވަސީލަތްތަކުގެ މިލްކުވެރިކަން ކަނޑައެޅުމުގެ އިތުރުން، މި ސިނާއަތް ހަރުދަނާކޮށް ރާވައި ހިންގުމާ ގުޅޭ ހާއްސަ ބިލެއް ފަރުމާކުރުމަށް ވެސް ވަޒީރުންގެ މަޖިލީހުގެ މި ޖަލްސާގައި ވަނީ ނިންމަވާފަ،" ރައީސް އޮފީހުން ބުނެފައިވެ އެވެ.
ރައީސް އޮފީހުން އިތުރަށް ބުނީ، ކަނޑުގެ ސަރަހައްދުގައިވާ އިގްތިސާދީ މުއްސަނދިކަން ދެނެގަތުމާއި އެ ވަސީލަތްތަކުގެ ފައިދާ ހޯދައިދިނުމަށްޓަކައި ކުރަންޖެހޭ ގާނޫނީ އަދި އިދާރީ މަސައްކަތް މިހާރު ފަށާފައިވާ ކަމަށެވެ.
ގޭހާއި ގުދުރަތީ އެހެނިގެން މައުދަން ނެގުމުގެ ގާބިލްކަމެއް ދިވެހި ދައުލަތުގައި އަދި ކުންފުންޏެއްގެ ކިބައިގައި ވެސް ނެތެވެ. އެހެންކަމުން އެ މަސައްކަތް ކުރަންޖެހޭނީ ބޭރުގެ ކުންފުންޏަކުންނެވެ.
