ޑޮލަރުގެ އަގަށް ބަދަލު ނާންނަ ކަމަށާއި ސަރުކާރުން ތަންފީޒުކުރަމުންދާ ސިޔާސަތުތައް މަސައްކަތް ނުކުރާ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނަޝީދު ވިދާޅުވީ ޑޮލަރުގެ އަގު އަދިވެސް 20ރ. އާއި 21ރ. އަށް ހުރިއިރު، ސަރުކާރުން ހަދާ ގަވާއިދުތަކާއެކުވެސް ވިޔަފާރީގެ މުއާމަލާތްތަކަކަށް ބަދަލު އަންނަ ތަން ނުފެންނަ ކަމަށެވެ.
"ޑޮލަރުގެ އަގަކަށް ބަދަލެއް ނާދޭ. މިހާަރުވެސް ޑޮލަރުގެ އަގު ހުރީ 20 ރުފިޔާ، 21 ރުފިޔާގައި. ސަރުކާރުން ހަދާ ގަވާއިދަކާ ގުޅިގެން ވިޔަފާރީގެ މުއާމަލާތްތަކަކަށް ބަދަލު އަންނަ ތަނެއް އަޅުގަނޑުމެންނަކަށެއް ނުފެނޭ. މަނީ ޗޭންޖް ރަޖިސްޓްރީކޮށްފައިވާ ފައިސާ މާރުކޮށްދޭ ތަންތަނުން މިހާރު ގިނައިން ފައިސާ މާރުނުކޮށްދޭ،" ނަޝީދު ވިދާޅުވި އެވެ.
"އެއީ އެމީހުންނަށް ލާޒިމުކޮށްފައި އެއޮތް އަގު އެކަން ކުރުމަކީ ވިޔަފާރީގެ ގޮތުން އެމީހުންނަށް ދެކޮޅު ޖެހޭ ކަމަކަށް ނުވާތީ. އެކަން އެމީހުން ނުކޮށް މިހާރުވެސް ބްލެކް މާކެޓުގައި ޑޮލަރު ވިއްކަމުންދަނީ 20 ރުފިޔާއަށް، 21 ރުފިޔާއަށް."
ނަޝީދު ވިދާޅުވީ ޑޮލަރުގެ އަގު ބޮޑުވުމުގެ ސަބަބުން ތަކެތީގެ އަގު އުފުލުން ނުހުއްޓޭ ކަމަށާއި އޭގެ ސަބަބުން ރައްޔިތުން ބޮޑު ބުރަޔަކާ ކުރިމަތިލާން ޖެހިފައިވާ ކަމަށެވެ.
އޭގެއިތުރުން އެންމެ ފަހުން ގާނޫނާއި ގަވާއިދުތަކަށް ގެނައި ބަދަލުތަކާއެކު ޑޮލަރުގެ ތާށިކަމަށް ހައްލު ނުލިބޭނެ ކަމަށާއި އޭގެ ސަބަބުން ރާއްޖޭގެ ވިޔަފާރިތަކަށް ގެއްލުންވަމުންދާ ކަމަށް ނަޝީދު ވިދާޅުވި އެވެ.
ޑޮލަރު މައްސަލަ ހައްލުކުރުމުގެ ގޮތުން ސަރުކާރުގެ ތަންފީޒީ ކަންކަން ހަރުކަށި ކުރުމާއެކުއެކީ، ރިސޯޓުތަކާއި 25 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭ ވިޔަފާރިތަކުން މާރުކުރަން ޖެހޭ މިންވަރު ވަނީ އާމްދަނީގެ 40 ޕަސެންޓަށް އުފުލާފަ އެވެ.
ސަރުކާރުން ބުނަނީ މިއާ އެކީ، ބޭންކިން ނިޒާމަށް ވަންނަ ޑޮލަރު އިތުރުކުރުމުގެ ގޮތުން ރިސޯޓުތަކާއި ޑޮލަރު ތާށިކަމާއި ބޮޑު އަގުގައި ޑޮލަރު ގަންނަން ޖެހޭ މައްސަލަ ވެސް ހައްލުކުރެވޭނެ ކަމަށެވެ.
