ވެރި ރަށް މާލެ އާއި ހުޅުމާލޭގައި މިއަދު ހިނގި ތިން އެކްސިޑެންޓެއްގައި ފަސް މީހަކަށް އަނިޔާވެފައިވާ ކަމަށް ފުލުހުން ބުނެފި އެވެ.
މިއަދުގެ ފުރަތަމަ އެކްސިޑެންޓު ހިނގީ ހެނދުނު 8:00 ގައި ވިނަރެސް ހައެއް ފްލެޓު ކައިރިން ސައިކަލެއް ކޮންޓްރޯލުން ނެއްޓި ވެއްޓިގެންނެވެ. ފުލުހުން ބުނީ ސައިކަލު ކޮންޓްރޯލުން ނެއްޓީ، ކުއްލިއަކަށް މަގު ހުރަސް ކުރަން ކުރި ކުޑަކުއްޖެއްގެ ގައިން ނެއްޓެން އުޅުމުގެ ތެރޭގައި ކަމަށެވެ
"މި އެކްސިޑެންޓާ ގުޅިގެން އިތުރަށް ބެލިބެލުމުން، ސައިކަލުގެ ކުރިމަތިން ކުއްލިއަކަށް ކުޑަކުއްޖަކު މަގު ހުރަސްކުރުމުން، ކުއްޖާ ގައިން ނެއްޓެން އުޅުމުގެ ތެރޭގައި ސައިކަލު ކޮންޓްރޯލުން ނެއްޓި ވަނީ ވެއްޓިފައެވެ. އަދި މި ހާދިސާގައި ކުއްޖާގެ ގައިގައި ސައިކަލުން ޖެހިފައިނުވޭ،" ފުލުހުން ބުންޏެވެ.
އޭގެ ފަހުން މިއަދު ހަވީރު 5:10 ގައި އެކްސިޑެންޓެއް ހިނގީ ބަހަކާއި ސައިކަލެއް ޖެހި އެވެ. އެ އެކްސިޑެންޓުގައި ސައިކަލު ދުއްވަން އިން 69 އަހަރުގެ ފިރިހެން މީހާ އަދި ފަހަތުގައި އިން އުމުރުން 72 އަހަރުގެ އަންހެން މީހަކަށް ވަނީ އަނިޔާވެފަ އެވެ.
"ނަމަވެސް އެމީހުންނަށް ސީރިއަސް އަނިޔާއެއް ވެފައި ނުވޭ. މި މައްސަލަ ފުލުހުން ގެންދަނީ ތަހުގީގު ކުރަމުން،" ފުލުހުން ބުނެފައިވެ އެވެ.
މިއަދުގެ ތިން ވަނަ އެކްސިޑެންޓު ހިނގީ ރޭގަނޑު 8:11 ހާއިރު ހުޅުމާލޭ ފޭސް ދޭއްގައި ދެ ސައިކަލު ޖެހިގެންނެވެ. އެ އެކްސިޑެންޓުގައި ވެސް މީހަކަށް ސީރިއަސް އަނިޔާއެއް ނުވާ ކަމަށް ފުލުހުން ބުނެ އެވެ.
"މި އެކްސިޑެންޓުގައި އެކަކުގެ ކަނާތު ފައިތިލަ މަތިން ކަނޑައިގެންގޮސް އަނިޔާވީ ނަމަވެސް، ސީރިއަސް އަނިޔާއެއް ލިބިފައި ނުވޭ،" ފުލުހުން ބުންޏެވެ.
މިއަދު އެކްސިޑެންޓުތަކެއް ހިނގިއިރު، މިދިޔަ ހޮނިހިރު ދުވަހު ހިނގި ނުރައްކާތެރި އެކްސިޑެންޓެއްގައި އުމުރުން އެންމެ ނުވަ އަހަރުގެ ޒީވާ ސިނާން އަހުމަދު ވަނީ ނިޔާވެފަ އެވެ. އެ އެކްސިޑެންޓު ހިނގަން މެދުވެރިވީ ސައިކަލެއް މީހެއްގެ ގައިގައި އަޅައިގަނެ ވެއްޓިގެންނެވެ. ޒީވާ އިނީ ސައިކަލު ފަހަތުގަ އެވެ.
ބެލެވެނީ ސައިކަލު ވެއްޓުމުގެ ތެރޭގައި، ފަހަތުން އައި ކާރެއްގައި ޒީވާ ޖެހުނު ކަމަށް ނުވަތަ ވެހިކަލް ޒީވާގެ ގައި މަތިން ދިޔަ ކަމަށެވެ. އެކްސިޑެންޓު ހިނގައިދިޔަ ގޮތް ހޯދަން ފުލުހުން އަންނަނީ ފޮރެންސިކް ތަހުލީލެއް ހަދަމުންނެވެ.
