ނިއު ޔޯކް، ޔުނައިޓެޑް ސްޓޭޓްސް (ޖުލައި 23) - އެމެރިކާގެ ފުޓްބޯޅަ ލީގުތަކުގައި ކުޅޭ މަޝްހޫރު ހުރިހާ ކުޅުންތެރިން ހިމަނައިގެން ކޮންމެ އަހަރަކު ކުރިއަށްދާ މޭޖަ ލީގު ސޮކާ (އެމްއެލްއެސް) އޯލް ސްޓާ މެޗުގައި މި ފަަހަރު ވެސް އިންޓަ މިއާމީ އާއި އާޖެންޓީނާ ޓީމުގެ ކެޕްޓަން، ލިއޮނަލް މެސީ ނުފެންނާނެ އެވެ.
ވޯލްޑް ކަޕްގެ ފައިނަލުން ސްޕެއިން އަތުން 1-0 އިން ބަލިވި އާޖެންޓީނާގެ ކެޕްޓަން، މެސީ، މިދިޔަ އަހަރު ވެސް އެމްއެލްއެސް އޯލް ސްޓާ މެޗުގައި ކުޅެފައިނުވެ އެެވެ. މެސީ، 39، މިދިޔަ އަހަރު އެ މެޗުގައި ކުޅެފައިނުވަނީ ވަރުބަލިކޮށް ހުރުމުން ކަމަށް އޭރު ވަނީ ބުނެފަ އެވެ.
އެ ގޮތުން، މިދިޔަ އަހަރު، މެސީ އާއި އިންޓަ މިއާމީގެ ސްޕެނިޝް ފުލްބެކް، ޖޯޑީ އަލްބާގެ ނަން އެމްއެލްއެސް އޯލްސްޓާސް ޓީމުގައި ހިމެނި ނަމަވެސް، އެ ދެ ކުޅުންތެރިން ބައިވެރިވެފައިނުވެ އެވެ. އެމްއެލްއެސް އިން ނެރުނު ބަޔާނުގައި ބުނެފައިވަނީ، އޯލް ސްޓާ މެޗަށް ނަގާފައިވާ ކުޅުންތެރިއަކު، އެމްއެލްއެސްގެ ހުއްދަ ނުހޯދައި، އެ މެޗު ނުކުޅެން ނިންމައިފިނަަމަ، އެ ކްލަބުން ދެން އެންމެ އަވަހަށް ކުޅޭ މެޗެއްގައި އެ ކުޅުންތެރިއަކަށް ނުކުޅެވޭނެ ކަމަށެވެ. އެ ގޮތަށް ބަލައި، މި ގަވާއިދުގެ ދަށުން، މެސީ އާއި އަލްބާ ވަނީ އިންޓަ މިއާމީން ސިންސިނާޓީއާ ކުޅުނު މެޗަށް ސަސްޕެންޑްވެފަ އެވެ.
މެސީ، އޯލް ސްޓާ މެޗު ނުކުޅުނީ ވަރުބަލިވެފައި ހުރުމުން
ދާދި ފަހުން ކުރިއަށްދިޔަ، އެމްއެލްއެސް އޯލް ސްޓާސް އާއި ލީގާ އެމްއެކްސް އޯލް ސްޓާ މެޗުގައި، އިންޓަ މިއާމީގެ ކެޕްޓަން، ލިއޮނަލް މެސީ ނުކުޅުނީ، ވަރުބަލިވެފައި ހުރުމުން ކަމަށް ވަނީ ބުނެފައި
މި ފަހަރުގެ އޯލް ސްޓާ މެޗުގައި މެސީ އަށް ކުޅެވެން ނެތީ، ފީފާ އިން ވޯލްޑް ކަޕަށް ފަހު ކުޅުންތެރިންނަށް ދޭން ލާޒިމްކޮށްފައިވާ ބްރޭކަުގައި އޭނާ ހުންނާނެތީ އެވެ.
އެ ގޮތުން، ފީފާ އިން ވަނީ ވޯލްޑް ކަޕްގައި ކުޅޭ ކުޅުންތެރިއަކުގެ ޓީމެއް ކުޅޭ ފަހު މެޗަށް ފަހު، ކޮންމެ ކުޅުންތެރިއަކަށް 21 ދުވަހުގެ ރެސްޓް މުއްދަތެއް ލިބެން ޖެހޭނެ ކަމަށެވެ. އެކަމަކު، މި ރެސްޓް މުއްދަތު ކުރުކޮށްލައި އަވަހަށް ކްލަބް ޕްރެކްޓިހާ ގުޅެން ބޭނުންވާ ކުޅުންތެރިއަކަށް އެކަން އޮންނަނީ އިހުތިޔާރީ ކަމެއްގެ ގޮތުގައި ދޫކޮށްލައިފަ އެވެ.
މެސީ ވަނީ، މި މަހު 19 ވަނަ ދުވަހު، ސްޕެއިނާ ދެކޮޅަށް އާޖެންޓީނާ އިން ކުޅުނު ފައިނަލުގެ 120 މިނިޓް އެއްކޮށް ކުޅެފަ އެވެ. ރެސްޓް މުއްދަތުގައި ހުންނައިރު، މެސީ އަށް އިންޓަ މިއާމީގެ މެޗުތަކެއް ވެސް ގެއްލޭނެ އެވެ. އެމްއެލްއެސް އޯލް ސްޓާ މެޗު ތާވަލުކޮށްފައި އޮތީ، މި މަހު 29 ވަނަ ދުވަހު އެވެ.
ވޯލްޑް ކަޕްގެ ފައިނަލް މެޗަށް ފަހު، މެސީ، އެނބުރި އާޖެންޓީނާ އަށް ދިޔައީ ޓީމާ ވަކިންނެވެ. އަދި، މިކަމުގެ ސަބަބުން އާޖެންޓީނާގެ ބައެއް މީޑިއާތަކުގައި އޭނާ އަށް ފާޑުކިޔުން އަމާޒުވި އެވެ.
