އިންޑިއާގެ ޝިމްލާގައި ކުރިއަށްދިޔަ ސައުތު އޭޝިއަން ޔޫތު ޓޭބަލް ޓެނިސް މުބާރާތުގައި ވާދަކުރި ރާއްޖޭގެ ޒުވާން ގައުމީ ޓީޓީ ޓީމުން ހަތް މެޑަލާ އެކު ބޮޑު ކާމިޔާބެއް ހޯދައިފި އެވެ.
ރާއްޖޭ ޓީމުން ޖުމްލަ އެކު، ތިން ރިހި މެޑަލާއި ހަތަރު ލޯ މެޑަލް ވަނީ ހޯދައިފަ އެވެ.
ދެކުނު އޭޝިއާ ޔޫތު/ޖޫނިއާ މުބާރާތުގައި ރާއްޖޭން ވާދަކުރީ، 15 އަހަރުން ދަށުގެ ކެޑޭޓް ކެޓަގަރީ އާއި 19 އަހަރުން ދަށުގެ ޖޫނިއާ ކެޓަގަރީގަ އެވެ. މި ދެ ކެޓަގަރީން ވެސް އަންހެން އަދި ފިރިހެން ޓީމު ވާދަކޮށްފައިވެ އެވެ. މި މުބާރާތުގައި ރާއްޖޭން ވާދަކުރި ފިރިހެން ޓީމުގައި ހިމެނެނީ މުހައްމަދު ހަލަފް ރާފިއު، އައްޔޫބު އިޒްކާން ސަލީމު، ފާޒް އިމްޔާޒް ލަތީފް، އަވުން އިބްރާހިމް ލަތީފް، މުހައްމަދު އާލް އިމްރާން އެވެ. އަދި، އަންހެން ޓީމުގައި ހިމެނެނީ ފާތިމަތު ދީމާ އަލީ، އައިޝަތު އަލްސާ ނާފިޒު، މިޝްކާ މުޙައްމަދު އިބްރާހިމް، ސާރާ މޫސާ ޖަމީލު އަދި އައިޝަތު މަލަކް ތާސީން އެވެ.
ސައުތު އޭޝިއާ ޖޫނިއާ މުބާރާތުގައި ރާއްޖެ އަށް ތާރީހީ ރިހި މެޑަލެއް
އިންޑިއާގެ ޝިމްލާގައި މިހާރު ކުރިއަށްދާ ސައުތު އޭޝިއަން ޔޫތު ޓޭބަލް ޓެނިސް މުބާރާތުގެ 15 އަހަރުން ދަށުގެ އަންހެން ޓީމު އިވެންޓުން ރާއްޖޭން ތާރީހީ ރިހި މެޑަލެއް ވަނީ ހޯދައިފައި.
ރިހި މެޑަލް ހޯދާފައިވަނީ، 15 އަހަރުން ދަށުގެ އަންހެން ޓީމާއި 19 އަހަރުން ދަށުގެ މިކްސް ޑަަބަލްސް ޕެއާ، ހަލަފް އާއި ދީމާ އަދި 15 އަހަރުން ދަށުގެ މިކްސް ޑަބަލްސް ޕެއާ، ހަލަފް އާއި އަލްސާ އެވެ.
ލޯ މެޑަލް ހޯދާފައިވަނީ، 19 އަހަރުން ދަށުގެ ފިރިހެން ޓީމާއި އަންހެން ޓީމުގެ އިތުރުން 19 އަހަރުން ދަށުގެ އަންހެން ސިންގަލްސް އިން ދީމާ، 19 އަހަރުން ދަށުގެ އަންހެން ޑަބަލްސް އިން ދީމާ އާއި މިޝްކާ އެވެ.
މި މުބާރާތަށް ތައްޔާރުވުމަށް ގައުމީ ޓީޓީ ޓީމުގެ ކޯޗު، އީރާނުގެ މަހްދީ ހޮޝްމަރަމް ވަނީ، އެސޯސިއޭޝަންގެ އެހީތެރިކަމާ އެކު، އީރާނުގެ ޕެއަރިން ދެ ކުޅުންތެރިންނާ އެކު ރާއްޖޭގެ ސީނިއާ ޤައުމީ ޓީމުގެ ކުޅުންތެރިންގެ ވެސް އެހީ ހޯދައިގެން މި މުބާރާތަށް ތައްޔާރުވެފަ އެވެ.
ފަނަރަ އަހަރުން ދަށުގެ މިކްސް ޑަބަލްސް އިވެންޓްގެ ސެމީ ފައިނަލުގައި، ހަލަފް އާއި އަލްސާގެ ޕެއާ ފައިނަލަށް ދަތުރުކުރީ ސެމީ ފައިނަލުގައި 3-1 އިން ސްރީ ލަންކާގެ ސަނޮން މެނޮވެލްގޭ އާއި ޗަނޫކީ ކަރްޔަވަސަމްގެ ޕެއާ ބަލިކޮށްފަ އެވެ. ފަހަތުން އަރައި ހަލަފް އާއި އަލްސާ މޮޅުވި މި މެޗުގެ ސެޓުތައް ގޮސްފައިވަނީ، 11-07، -5-11، 8-11 އަދި 10-12 އިިންނެވެ. މިއަދު ކުޅޭ މި އިވެންޓްގެ ފައިނަލުގައި އަލްސާ އާއި ހަލަފްގެ ޕެއާ ބަލިވީ އިންޑިއާގެ އަދިތުޔާ ދާސް އާއި އަންކޮލިކާ ޗަކޮރަބޯތީގެ ޕެއާއާ ކުޅެގެން ބަލިވުމުންނެވެ.އެ ގޮތުން 3-0 އިން މެޗު ދިޔައިރު، ސެޓުތައް ގެންގޮސްފައިވަނީ 11-5، 11-4 އަދި 11-9 އިންނެވެ.
ނަވާރަ އަހަރުން ދަށުގެ މިކްސް ޑަބަލްސް އިވެންޓްގައި، ހަލަފް އާއި ދީމާގެ ޕެއާ ވަނީ، ސެމީ ފައިނަލުގައި ބަންގްލަދޭޝްގެ އަބުލް ހަސީބް އާއި ކޮއީ ސައިގެ ޕެއާ އަތުން 3-0 އިން މޮޅުވެފަ އެވެ. މި މެޗުގެ ސެޓުތައް، ހަލަފް އާއި ދީމާގެ ޕެއާ އިން ކާމިޔާބުކުރީ 11-2، 11-6 އަދި 11-9 އިންނެވެ. ފައިނަލުގައި ހަލަފް އާއި ދީމާ ވަނީ އިންޑިއާގެ ޕްރިޔަނޫޖް ބަޗާރިޔާ އާއި ޖެނިފާ ވަރްގީސްގެ ޕެއާއާ ކުޅެގެން 3-0 އިން ބަލިވެފަ އެވެ. ސެޓުތައް ދިޔައީ 12-10، 11-2 އަދި 11-5 އިންނެވެ .
