އިންޑިއާގެ ޝިމްލާގައި މިހާރު ކުރިއަށްދާ ސައުތު އޭޝިއަން ޔޫތު ޓޭބަލް ޓެނިސް މުބާރާތުގެ ދެ އުމުރުފުރާއެއްގެ މިކްސް ޑަަބަލްސް އިވެންޓްތަކުން، ރާއްޖޭގެ މުހައްމަދު ހަލަފް ރާފިއު، ފާތިމަތު ދީމާ އަލީ އަދި އައިޝަތު އަލްސާ ނާފިޒު ފައިނަލަށް ދަތުރުކޮށްފި އެވެ.
މި ދެ އިވެންޓްގައި ވެސް ދެކުނު އޭޝިއާ ގައުމުތަކުގެ ފަސް ޕެއާ އަކުން ވަނީ ވާދަކޮށްފަ އެވެ.
އެ ގޮތުން، 15 އަހަރުން ދަށުގެ މިކްސް ޑަބަލްސް އިވެންޓްގެ ސެމީ ފައިނަލުގައި، ހަލަފް އާއި އަލްސާގެ ޕެއާ ފައިނަލަށް ދަތުރުކުރީ ސެމީ ފައިނަލުގައި 3-1 އިން ސްރީ ލަންކާގެ ސަނޮން މެނޮވެލްގޭ އާއި ޗަނޫކީ ކަރްޔަވަސަމްގެ ޕެއާ ބަލިކޮށްފަ އެވެ. ފަހަތުން އަރައި ހަލަފް އާއި އަލްސާ މޮޅުވި މި މެޗުގެ ސެޓުތައް ގޮސްފައިވަނީ، 11-07، -5-11، 8-11 އަދި 10-12 އިިންނެވެ. މިއަދު ކުޅޭ މި އިވެންޓްގެ ފައިނަލުގައި އަލްސާ އާއި ހަލަފްގެ ޕެއާ ކުޅޭނީ އިންޑިއާގެ އަދިތުޔާ ދާސް އާއި އަންކޮލިކާ ޗަކޮރަބޯތީގެ ޕެއާއާ އެވެ.
ނަވާރަ އަހަރުން ދަށުގެ މިކްސް ޑަބަލްސް އިވެންޓްގައި، ހަލަފް އާއި ދީމާގެ ޕެއާ ވަނީ، ސެމީ ފައިނަލުގައި ބަންގްލަދޭޝްގެ އަބުލް ހަސީބް އާއި ކޮއީ ސައިގެ ޕެއާ އަތުން 3-0 އިން މޮޅުވެފަ އެވެ. މި މެޗުގެ ސެޓުތައް، ހަލަފް އާއި ދީމާގެ ޕެއާ އިން ކާމިޔާބުކުރީ 11-2، 11-6 އަދި 11-9 އިންނެވެ. ފައިނަލުގައި ހަލަފް އާއި ދީމާ ވާދަކުރާނީ އިންޑިއާގެ ޕްރިޔަނޫޖް ބަޗާރިޔާ އާއި ޖެނިފާ ވަރްގީސްގެ ޕެއާއާ އެވެ.
މި މުބާރާތުގެ ޓީމު އިވެންޓުން ރާއްޖޭގެ 15 އަހަރުން ދަށުގެ އަންހެން ޓީމުން ވަނީ ރިހި މެޑަލް ހޯދައިފަ އެވެ. އަދި، މިކްސް ޑަބަލްސްގެ ދެ އިވެންޓުން ފައިނަަލަށް ދިއުމާ އެކު، އިތުރު ދެ މެޑަލް މި ވަނީ ޔަގީންވެފަ އެވެ.
މި މުބާރާތަކީ، އަންނަ ޖޫން މަހު އޮމާންގެ ވެރި ރަށް، މަސްކަޓްގައި އޮންނަ އޭޝިއަން ޗެމްޕިއަންޝިޕުގެ ކޮލިފިކޭޝަނެކެވެ.
