ރިސޯޓުތަކަށް ލިބޭ އާމްދަނީގެ 40 ޕަސެންޓު ދިވެހި ރުފިޔާއަށް މާރުކުރަން މަޖުބޫރު ކުރުމުން ރިސޯޓުތައް ބަނގުރޫޓުވެ، މަސައްކަތްތެރިން މަގުމަތިވެދާނެ ކަމަށް އިދިކޮޅު އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ، އާމްދަނީގެ 40 ޕަސެންޓު މާރު ކުރަންޖެހުމުން ރިސޯޓުތައް ބަނގުރޫޓުވެ، ވަޒީފާތައް ގެއްލި، ރިސޯޓު ވިޔަފާރިއާ ގުޅިފައިވާ އެހެން ވިޔަފާރިތައް ބަނގުރޫޓުވުމުގެ ފުރުސަތު އެބަ އޮތް ކަމަށެވެ.
"ވިޔަފާރިވެރިޔާއަށް ލިބޭ ބޭރު ފައިސާގެ 40 ޕަސެންޓު ދިވެހި ރުފިޔާއަށް މާރުކުރުމަށް މަޖުބޫރު ކުރުމުން އެ ވިޔަފާރިތައް ދެކޮޅު ނުޖެހި ބަނގުރޫޓުވެދާނެ. ވިޔަފާރިވެރިޔާ ބަނގުރޫޓުވީމާ މީހުންގެ ވަޒީފާތައް ގެއްލޭނެ. ރިސޯޓު ވިޔަފާރިއާ ގުޅުންހުރި ދެން ހުރި ހުރިހާ ވިޔަފާރިއަކަށް އަސަރު ކުރާނެ. މި ސަރުކާރު މި ގެންދަނީ ރާއްޖެ ބަނގުރޫޓު ކުރަމުން،" ނަޝީދު ވިދާޅުވެފައިވެ އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު މާރު ކުރަންޖެހުމުން އިންވެނސްޓަރުންގެ އިތުބާރު ގެއްލޭނެ ކަމަށް ވެސް ނަޝީދު މީގެ ކުރިން ވިދާޅުވެފައިވެ އެވެ.
"ރާއްޖޭގައި ހިންގާ ގިނަ ރިސޯޓުތަކަކީ ޑޮލަރުން ލޯނު އަދާ ކުރާ ބައެއް. އަދި ގިނަ ރިސޯޓުތަކަކީ ބޭރުގެ ބޭންކުތަކުން ލޯނު ހޯދައިގެން ތަރައްގީކޮށްފައިވާ ބޭރުގެ އިންވެސްޓްމެންޓުތައް. ބޭރުގެ އިންވެސްޓަރުން ރާއްޖޭގައި އިންވެސްޓު ކުރަނީ އެކަށީގެންވާ ފައިދާއެއް ލިބޭތީ. އެކަން ބަދަލުވެއްޖެ ނަމަ އިންވެސްޓަރުންގެ އިތުބާރު ގެއްލުމުގެ އިތުރުން ފަތުރުވެރިކަމުގެ މުސްތަގްބަލު ނުރައްކަލަކަށް ހުށަހެޅޭނެ،" އެމްޑީޕީއިން ނެރުނު އެ ބަޔާނެއްގައި ނަޝީދު ވިދާޅުވެފައިވެ އެވެ.
ރިސޯޓުތަކަށް ލިބޭ އާމްދަނީގެ 40 ޕަސެންޓު މާރުކުރަން މަޖޫބުރު މި ކުރީ، ކަޅު ބާޒާރުގައި ޑޮލަރުގެ އަގު 23 ރުފިޔާއަށް އަރައި ދިވެހި ރުފިޔާގެ އަގު ވަރަށް ބޮޑަށް ވެއްޓިފައިވާ ދަނޑިވަޅެއްގަ އެވެ. ސަރުކާރުން ތުހުމަތު ކުރަނީ ޑޮލަރުގެ ކަޅު ބާޒާރު ކޮންޓްރޯލް ކުރަނީ ރިސޯޓުތަކުން ކަމަށެވެ.
ނިމިދިޔަ ހަފުތާގައި އިއުލާނު ކުރީ ފިޔަވަޅުތަކެއްގައި، ސަރުކާރުން ވަނީ ރިސޯޓުތަކާއި އާންމުން ހިމެނޭ ގޮތަށް ކަޅު ބާޒާރާގުގައި ޑޮލަރު ވިއްކާ ވިޔަފާރިތަކަށް ހަރުކަށި ފިޔަވަޅު އަޅާނެ ކަމަށް ބުނެފަ އެވެ. ހޯމް މިނިސްޓަރު އަލީ އިހުސާން ވަނީ، ކަޅު ބާޒާރުގައި ޑޮލަރު ވިއްކުމުގައި ޝާމިލްވާ މީހުންގެ މައްޗަށް މަނީ ލޯންޑާ ކުރުމުގެ ތުހުމަތު އަމާޒުކުރައްވައިފަ އެވެ.
"ރާއްޖޭގެ ގާނޫނުގައި ބުނާ ގޮތުން ހުއްދަ ނަގައިގެން ކުރަންޖެހޭ ކަމެއް، ހުއްދަ ނުނަގައި ކުރުމަކީ ޖިނާއީ ކުށެއް. މާނައަކީ ހުއްދަ ނުނަގައި މަނީ އެކްސްޗޭންޖް ކުރުމަކީ ޖިނާއީ ކުށެކޭ. އެ ޖިނާއީ ކުށް ކޮށްގެން ހޯދާ ފައިސާ އަމިއްލަ ގޮތުގައި ބޭނުން ކުރުމާއި ވިޔަފާރީގެ ގޮތުގައި ބޭނުން ކުރުމާއި އޭގެ އިތުރު ފައިދާ ހޯދުމަކީ ރާއްޖޭގެ ގާނޫނުގައި މިވަގުތު ބުނާ ގޮތުން މަނީ ލޯންޑަރިން،" އޭނާ ވިދާޅުވި އެވެ.
ޑޮލަރުން އާމްދަނީ ލިބޭ މީހުންނަށް ވެސް ހުއްދަ ނުނަގައި ޑޮލަރު މާރު ނުކުރެވޭނެ ކަމަށް އިއްޔެ ސަރުކާރުން ވަނީ ބުނެފަ އެވެ.
"ހުއްދަ ނުނަގާ ޑޮލަރު އެކްސްޗޭންޖް ކުރުމަކީ ރާއްޖޭގެ ގާނޫނުގައި ޖިނާއީ ކުށެއް އެއީ. ވަކިވަކި ފަރުދުން ވެސް އެބަ ހިމެނޭ މީގެ ތެރޭގައި އިނގޭތޯ؟ މިސާލަކަށް އަޅުގަނޑަށް މުސާރަ ލިބެނީ ޑޮލަރުން އަޅުގަނޑު އަނެއްކާ ކަޅު ބާޒާރަށް ޑޮލަރު ވިއްކަނީ. އެއީ ހުއްދަ ނުނަގާ މަނީ ޗޭންޖް ކުރުން އެނގޭތޯ؟ ބައި ޑެފެނިޝަން،" އިހުސާން ވިދާޅުވި އެވެ.
