މޯލްޑިވިއަން ޑިމޮކްރެޓިކް ޕާޓީގެ އެންމެ އިސް ނިންމުންތައް ނިންމާ ގުނަވަން ކަމަށްވާ އެ ޕާޓީގެ ގައުމީ މަޖިލީހުގެ އިންތިހާބު، މިއަންނަ ނޮވެމްބަރު މަހުގެ ސަތާވީސް ވަނަ ދުވަހު ބޭއްވުމަށް އެ ޕާޓީން ނިންމައި އެކަން ރަސްމީކޮށް އިއުލާނު ކޮށްފި އެވެ.
މިކަން އިއުލާނު ކުރެއްވީ މިރޭ ބޭއްވި އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި އެ ޕާޓީގެ ޗެއާޕާސަން މުހައްމަދު ނަޝީދެވެ.
ކުރިން ރާއްޖޭގެ ރައީސް ކަމާއި ރައްޔިތުންގެ މަޖިލީހުގެ ރައީސްކަން ކުރެއްވި ނަޝީދު ވިދާޅުވި ގޮތުގައި، ގައުމީ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ ޕާޓީގެ އަސާސީ ގަވާއިދަށް ގެނެވުނު ހަތަރު ވަނަ އިސްލާހާ އެއްގޮތްވާ ގޮތުގެ މަތިންނެވެ.
މިއީ ޕާޓީގެ ހިންގުމުގެ އޮނިގަނޑަށް ގެނެވުނު ބޮޑެތި ބަދަލުތަކަކާއެކު ބޭއްވޭ ފުރަތަމަ އިންތިހާބެކެވެ.
އަލަށް އެކުލަވާލެވޭ ގައުމީ މަޖިލީހުގެ އޮނިގަނޑަށް ވަނީ ބޮޑެތި ބަދަލުތަކެއް ނިމިގެންދިޔަ ކޮންގްރެސްއިން ގެނެސްފަ އެވެ.
އެންމެ ފާހަގަކޮށްލެވޭ އެއް ބަދަލަކީ، ޕާޓީގެ ހިންގުމުގެ އެންމެ އިސް ގުނަވަން ކަމުގައިވާ ގައުމީ މަޖިލިސް އަލުން އެކުލަވާލާއިރު، އެ މަޖިލީހުގައި ޕާޓީގެ ރައީސް އަދި ނައިބު ރައީސްގެ މަގާމު އުވާލާފައިވުމެވެ. މީގެ ބަދަލުގައި އާ ގައުމީ މަޖިލިސް އެކުލެވިގެންވަނީ ޕާޓީގެ އެކި ދާއިރާތަކާއި ގޮފިތައް ތަމްސީލުވާނެ ފަދަ ފުޅާ ދާއިރާއެއްގަ އެވެ.
އާ ގަވާއިދުގެ ދަށުން ގައުމީ މަޖިލީހުގައި ހިމެނޭނީ ޗެއާޕާސަން އާއި ޗެއާޕާސަންގެ ނައިބުންގެ އިތުރުން، އެކި ދާއިރާތަކުން ގައުމީ މަޖިލީހަށް އިންތިހާބުކުރާ މެންބަރުންނެވެ.
މީގެ އިތުރުން އަންހެނުންގެ ރޫހުގެ ރައީސް އާއި އެ ރޫހުން އިންތިހާބުކުރާ ފަސް މެންބަރުންނާއި، ޔޫތު ވިންގުގެ ރައީސް އާއި އެ ގޮފިން އިންތިހާބުކުރާ ފަސް މެންބަރުންވެސް މި މަޖިލީހުގައި ހިމެނޭނެ އެވެ.
ޕާޓީގެ އެކި ގުނަވަންތަކުގެ ބައިވެރިވުން އިތުރުކުރުމުގެ ގޮތުން ކައުންސިލާސް އެސެމްބްލީގެ ރައީސް އާއި ތިން ނައިބު ރައީސުންނާއި، ޑަބްލިޔޫޑީސީ ވިންގުގެ ރައީސް އާއި އެ ވިންގުގެ ތިން މެންބަރުންވެސް ގައުމީ މަޖިލީހުގައި ތަމްސީލުވާނެ އެވެ. އަދި ޕާލިމެންޓްރީ ގްރޫޕްގެ ހުރިހާ މެންބަރުންނާއި، ޕާޓީގެ ސަރުކާރެއް އޮންނަ ހާލަތެއްގައި ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބުގެ އިތުރުން، އެމްޑީޕީއަށް ނިސްބަތްވާ ވަޒީރުންނާއި މޭޔަރުންނަށްވެސް ގައުމީ މަޖިލީހުގެ މެންބަރުކަން ލިބިގެންދާނެއެވެ.
