ރަސްމާލޭގެ 500 ހެކްޓަރު ޔޫނައިޓެޑް އަރަބް އެމިރޭޓްސް (ޔޫއޭއީ)ގެ އީގަލް ހިލްސްއަށް ދޭން އެއްބަސްވި މަޝްރޫއަކީ އުފެދުމުގައި ވެސް އޮޅުވާލުންތަކެއް އެކުލެވިގެންވާ މަޝްރޫއެއް ކަމަށާއި، މިކަމުގެ ސަބަބުން ޔޫއޭއީ ފަދަ އެކުވެރި ދައުލަތްތަކާ އޮންނަ ގުޅުން ކެނޑިދާނެ ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު އިންޒާރު ދެއްވައިފި އެވެ.
އެމްޑީޕީގެ ފަސް ވަނަ ކޮންގްރެސް ނިންމުމަށް ރޭ ބޭއްވި ޖަލްސާގައި އެ ޕާޓީގެ ރައީސްކަން ކުރިން ކުރެއްވި ޝާހިދު ވިދާޅުވީ ފުށިދިއްގަރުފަޅު ނުވަތަ ރަސްމާލެ އެއްބަސްވުމަކީ "ޑިސެޕްޓަސް އަބް އިނީޝިއޯ" ނުވަތަ އުފެދުމުގައި ވެސް އޮޅުވާލުން އޮތް އެއްބަސްވުމެއް ކަމަށެވެ.
ޝާހިދު ވިދާޅުވީ މި ސަރުކާރުން ބޭރުގެ ކުންފުނިތަކާއި ދައުލަތްތަކާއެކު ވާ އެއްބަސްވުންތަކުގައި އެއްވެސް ހާމަކަންބޮޑު ސިޔާސަތެއް ނެތް ކަމަށެވެ. ރަސްމާލެ މަޝްރޫއުގެ އެއްބަސްވުމުގައި އޮތް އެއްޗެއް ރައްޔިތުންނަށް ނޭނގޭއިރު، ފަޅު ހިއްކުމަށް ފައިސާ ހަރަދުކުރި ގޮތާއި، އަދި އީގަލް ހިލްސްއާއެކު އެއްބަސްވުން ގޮތުގައިވެސް އޮތީ އޮޅުވާލުން ކަމަށް އޭނާ ތުހުމަތުކުރެއްވި އެވެ.
"އެފަޅު ހިއްކުމުގައި ވެސް، ފައިސާ ހަރަދުކުރި ގޮތުގައި ވެސް އޮޅުވާލުން. ވެލި އެޅުމުގައި ވެސް ހުރިހާ ކަމެއްގައި ވެސް ބޮޑުތަނުން އޮޅުވާލުން،" އދ. އާންމު މަޖިލީހުގެ ރައީސްކަން ވެސް ކުރެއްވި ޝާހިދު ވިދާޅުވި އެވެ.
"ދިން ގޮތް ވެސް އެގްރިމެންޓް ވެސް އޮޅުވާލީ. ކުރިން ހަނދުމަފުޅު ހުންނާނެ އަޅުގަނޑުމެންގެ ތެރެއަށް ގެނެސްދެއްވި ވޮއިޑް އަބް އިނީޝިއޯ ކިޔާ ލަފުޒެއް. މިއީ އޭގެ އެއްމާބަނޑު ދެބޭން."
މިފަދަ ސިއްރު އެއްބަސްވުންތަކުގެ ސަބަބުން ރާއްޖޭގެ ބޭރުގެ ގުޅުންތަކަށް ބުރޫއަރައި، އިގުތިސާދީ ގޮތުން ނިކަމެތިކަން ލިބޭނެ ކަމަށް ޝާހިދު ފާހަގަކުރެއްވި އެވެ. މިކަމުގެ ނަތީޖާއަކަށް ވާނީ "ޑިޕްލޮމެޓިކް ހާލަތެއްގެ ހަތަރު އަނގޮޅިއަކަށް ދިވެހިން ގެންދާ ހިނދުކޮޅަކަށް" ވުމަށް ކަމަށް ވެސް ޝާހިދު ވިދާޅުވި އެވެ.
ޝާހިދު ވިދާޅުވީ ރާއްޖެއަކީ ކުޑަ ގައުމަކަށްވާއިރު، ބައިނަލްއަގުވާމީ ގުޅުންތައް ކެނޑުމަކީ އިގުތިސާދަށް ތަހައްމަލު ނުކުރެވޭނެ ވަރުގެ ބޮޑު ގެއްލުމެއް ކަމަށެވެ. ރާއްޖޭގެ މިނިވަންކަމާއި ސިޔާދަތު ރައްކާތެރިކުރެވޭނީ އަވަށްޓެރިންނާ ގާތް ގުޅުމެއް ބާއްވައިގެން ކަމަށް ވެސް އޭނާ ވިދާޅުވި އެވެ.
"ދުނިޔެ މިދަނީ ދުވަހެއް ދުވަހަކަށް ބަވަނަ ވަމުން. އިންޓަގްރޭޓް ވަމުން. އެކެއް އަނެކެއް ނުލައި މިދުނިޔޭގައި ނޫޅެވޭނެ. އެއް ގައުމެއް އަނެއް ގައުމެއްގެ ޑިޕްލޮމެޓިކް ގުޅުމަކީ މިއަދު ދުނިޔޭގެ އިގުތިސާދުގެ ކަންވާރު. އެކަންވާރު ބުރިވެއްޖެ ނަމަ ރާއްޖެފަދަ ކުޑަ ގައުމެއްގެ އިގުތިސާދަށް އަންނާނީ ހީވެސް ނުކުރާ ފަދަ ލޮޅުމެއް. އޭގެ ނިކަމެތިކަން ތަހައްމަލުކުރަންޖެހޭނީ ވިޔަފާރި ތަކަށާއި އާންމު ރައްޔިތުންނަށް،"
ދިވެހި ރައްޔިތުންނަށް ބޯހިޔާވަހިކަން ކަށަވަރުކުރުމުގެ ނަމުގައި ދައުލަތުގެ ބަޖެޓުން ހަރަދުކޮށްގެން ހިއްކަމުންދާ ރަސްމާލޭގެ 500 ހެކްޓަރު އީގަލް ހިލްސްއަށް ދޫކޮށްލަން ނިންމާފައި ވަނީ ނިމުމެއްނެއް 99 އަހަރަށެވެ. އެ ކުންފުންޏަށް ރަސްމާލެ ވިއްކާލުމަށް ޝަރުތުތަކަށް އެއްބަސްވުމަށް ފަހު، އެކަމާމެދު ރައްޔިތުންގެ ގިނަ ބަޔަކު ނުރުހުން ފާޅުކުރަން ފެށުމުން ސަރުކާރުން ބުނެފައި ވަނީ އަސްލު އެއްބަސްވުމުގައި ސޮއިކުރާނީ ގާނޫނުތަކަށް ގެންނަންޖެހޭ ބަދަލުތައް ގެނައުމަށް ފަހު އެވެ.
މިފަދަ ގޮތަކަށް ރަސްމާލެ ދޫކޮށްލުމަކީ ދިވެހިރާއްޖޭގެ އަސްލު ގެއްލިގެން ހިނގައިދާނެ ބިރުވެރި ކަމެއް ކަމަށް ބައެއް ފަރާތްތަކުން ފާހަގަ ކުރެ އެވެ.
މިހާރުގެ ސަރުކާރަކީ ނާގާބިލު އަދި އޮޅުވާލުންތަކެއްގެ މައްޗަށް ބިނާވެފައިވާ ސަރުކާރެއްގެ ގޮތުގައި ސިފަކުރައްވައި، ރައްޔިތުން މި އަނދިރި ހާލަތުން ސަލާމަތްކޮށްދޭނެ ކަމަށް ޝާހިދު ވިދާޅުވި އެވެ. އެމްޑީޕީގެ އަމާޒަކީ ދޮގު ނުހަދާ، އޯގާތެރި އަދި ރައްޔިތުންގެ ފުދުންތެރިކަން އިތުރުކޮށްދޭނެ ވެރިކަމެއް ގާއިމްކުރުން ކަމަށްވެސް އޭނާ ވިދާޅުވި އެވެ.
ގައުމުގެ މިހާރުގެ ހާލަތަށް އަލިއަޅުވާލައްވަމުން ޝާހިދު ވިދާޅުވީ، ރާއްޖޭގެ އިގުތިސާދު މިއަދު އޮތީ ފޫގޮސްފައި ކަމަށާއި، ސިއްހީ ނިޒާމާއި ބޯހިޔާވެހިކަމުގެ ސިޔާސަތުތައް ބޮއްސުންލާފައިވާ ކަމަށެވެ. ވަޒީފާގެ ފުރުސަތުތައް ބަންދުވެ، އާންމު ރައްޔިތުންގެ ދިރިއުޅުމުގެ ފުދުންތެރިކަން ދަށްވެފައިވާކަން ފާހަގަކުރައްވަމުން އޭނާ ވިދާޅުވީ، އެމްޑީޕީން ރައްޔިތުންނަށް ގެނެސްދިން އުންމީދުގެ ހުޅުކޮޅު މި ސަރުކާރުން ނިއްވާލާފައިވާ ކަމަށެވެ.
ވަކިން ހާއްސަކޮށް، ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ޑޮލަރު މާރުކުރުމުގެ ނަމުގައި ދަންތުރަ ޖައްސާފައިވާ ކަމަށް ވެސް ވިދާޅުވި އެވެ.
