ރައްޔިތުންގެ ހައްގުތަކަށްވުރެ ބޮޑަށް ވެރިމީހާގެ ހައްގުތައް ގިނަވީމާ މިހާރު ރާއްޖޭގައި އޮތް ނިޒާމާމެދު ވިސްނަން ޖެހޭ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެވެ.
އެމްޑީޕީން ކުރިއަށްގެންދާ ކޮންގްރެސްއަށް ބޮޑުބަދަލު ސިޔާސަތު ހުށަހަޅުއްވަމުން ފައްޔާޒް ވިދާޅުވީ ރައްޔިތުންގެ މަޖިލީހުގެ ސުޕަ މެޖޯރިޓީ ޕީއެންސީން ނަގައި ގާނޫނުއަސާސީގެ ހުރިހާ ޗެކްސް އެންޑް ބެލެންސެސްގެ މަހްފޫމްތައް ދުއްވާލާފައިވާ ކަމަށެވެ.
"ރައްޔިތުންގެ މަޖިލީހުގެ ސުޕަ މެޖޯރިޓީ ޕީއެންސީގެ ސަރުކާރުން ނަގައި ގާނޫނުއަސާސީގައި އެހެރަ ހުރިހާ ޗެކްސް އެންޑް ބެލެންސެސްގެ މަހްފޫމްތައް ދުއްވާލާ ވެރިމީހާގެ ހައްގުތައް މި އޮންނަނީ. ރައްޔިތުންގެ ހައްގުތަކެއް ނޫން. އެހެންވީމަ މި ނިޒާމާމެދު އަޅުގަނޑުމެން ވިސްނަން ޖެހެނީ،" ފައްޔާޒް ވިދާޅުވި އެވެ.
ފައްޔާޒް ވިދާޅުވީ ތިން ބާރު ވަކިކުރިއިރު އެންމެ ބޮޑަށް އުންމީދުކުރީ ގާނޫނުއަސާސީ އާއި ރައްޔިތުންގެ ހައްގުތައް ހިމާޔަތް ކުރާނީ ރައްޔިތުންގެ މަޖިލީހުން ކަމަށެވެ. ނަމަވެސް އޭނާ ވިދާޅުވީ ޑިމޮކްރަސީ ގަބޫލުނުކުރާ ބަޔަކަށް ވެރިކަން ލިބޭ ކޮންމެ ފަހަރު މުޅި ނިޒާމު އެއްކޮށް ގަނޑުބަނޑު ކުރާތަން ފެންނަމުންދާ ކަމަށެވެ.
"މިއުޅެނީ ނިޒާމީ އިންތިޒާމާމެދު އަލުން ވިސްނަން. މިހާރު އޮތްގޮތުން ވެއްޖެއްޔާ އަޅުގަނޑުމެންނަކަށް ދައުލަތުގައި މިހިރަ ޗެކްސް އެންޑް ބެލެންސެސްއެއް މަސައްކަތެއް ނުކުރޭ. އެންމެ ބޮޑު މައްސަލައަކަށް ދިމާވެފައި މިއޮތީ އަޅުގަނޑު ދެކޭ ގޮތުގައި އަޅުގަނޑުމެން ތިން ބާރު ވަކި ކުރިއިރުގައި އުންމީދުކުރީ ރައްޔިތުންގެ މަޖިލިސްއަކީ މި ގާނޫނުއަސާސީ ހިފަހައްޓާނެ ފަރާތްތައް ކަމަށް،" ފައްޔާޒް ވިދާޅުވި އެވެ.
"ރައްޔިތުންގެ ހައްގުތައް ހިމާޔަތްކުރާނީ ރައްޔިތުންގެ މަޖިލިސް އިން ކަމަށް. ސަރުކާރު އޮބަހައްޓާ ހިފަހައްޓާނީ ރައްޔިތުންގެ މަޖިލީހުން ކަމަށް. އެހެންނަމަވެސް އާހިރުގައި ކަން މިވާ ގޮތަކީ ޑިމޮކްރަސީ ގަބޫލުނުކުރާ ބަޔަކަށް ވެރިކަން އެބަ ލިބޭ އެކިއެކި ސަބަބުތަކަށްޓަކައި. އެ ލިބޭ ކޮންމެ ފަހަރަކު އަޅުގަނޑުމެންނަށް މި ދިމާވަނީ މުޅި ނިޒާމު އެއްކޮށް ގަނޑުބަނޑު ކޮށްލާތަން މި ފެންނަނީ."
ބޮޑު ބަދަލުގެ ބޭނުމަކީ ސަރުކާރުގެ ބާރު ކުޑަކުރުންކަން ފާހަގަކުރައްވާ ފައްޔާޒް ވިދާޅުވީ އެ ސިޔާސަތުގެ ދަށުން ދައުލަތާއި ސަރުކާރު ވަކިކޮށް ވެރިން ކަނޑައެޅޭނެ ކަމަށެވެ. އެއީ ބަރުލަމާނީ ނިޒާމު ނޫން ކަމަށާއި އެ ސިޔާސަތުގެ ދަށުން ސަރުކާރު އިންތިހާބު ކުރާއިރު، ދައުލަތުގެ ވެރިޔާ ކަނޑައަޅާނީ މަޖިލީހުން ކަމަށް އޭނާ ވިދާޅުވި އެވެ.
ބޮޑު ބަދަލު ސިޔާސަތުގެ ތެރޭގައި ސުޕްރީމް ކޯޓުގެ ފަނޑިޔާރުންނާއި މިނިވަން ކޮމިޝަންތަކުގެ މެންބަރުން ވަކި ކުރަން ރައްޔިތުންގެ ރުހުން ހޯދަންޖެހޭ ގޮތަށް ބަދަލު ކުރުން ހިމެނެ. އަދި ރައްޔިތުންގެ މަޖިލީހުގައި އަތޮޅުތައް ތަމްސީލު ކުރެވޭނެ ގޮތެއް ހަދައި، މަޖިލިސް މެންބަރުން ރިކޯލް ކުރެވޭނެ މަގު ފަހި ކުރުން ވެސް އެ ބަދަލުތަކުގެ ތެރޭގައި ހިމެނެ އެވެ.
