އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގައި އެ ޕާޓީގެ ޗެއާޕާސަން ކުރީގެ ރައީސް މުހައްމަދު ނަޝީދު ވާދަކުރައްވާނެ ކަމަށް ގަބޫލުކުރައްވާ ކަމަށް ކެނދިކުޅުދޫ ދާއިރާގެ ކުރީގެ މެންބަރު އަހްމަދު އީސާ ވިދާޅުވެއްޖެ އެވެ.
އަދަދު ނޫހުން ގެނެސްދޭ އެތެރެފުށް ޕްރޮގްރާމުގައި އީސަ ވިދާޅުވީ ރިޔާސީ ޕްރައިމަރީގައި ނަޝީދު ވާދަނުކުރެއްވުމަކީ ވުމަށްވުރެ ނުވުން ގާތް ކަމެއް ކަމަށެވެ. އެގޮތުން ރިޔާސީ ރޭހުގައި ނަޝީދު ވާދަކުރައްވާނެ ކަމަށް އީސަ ވިދާޅުވި އެވެ.
"އަޅުގަނޑު އަމިއްލަ ހައިސިއްޔަތުން އަޅުގަނޑު ގަބޫލުކުރަނީ މި ރިޔާސީ ރޭހުގައި ރައީސް ނަޝީދު ވާދަ ނުކުރުން އެއީ ވުމަށްވުރެ ނުވުން ގާތް ކަމެކޭ. ނުކުރުން އެއީ ވުމަށްވުރެ ނުވުން ގާތް ކަމެކޭ. އެނގޭތޯ. އަދި އެއަށްވުރެ މީހުންނަށް އަޑުއަހަން ފަސޭހަގޮތަކަށް ބަދަލުކޮށްލާނަން. ރައީސް ނަޝީދު ވާދަނުކުރުން އެއީ ނުވެ ނުދާނެ ކަމެއް ކަމަށް އަޅުގަނޑު ގަބޫލުކުރަނީ،" އީސަ ވިދާޅުވި އެވެ.
ސިޔާސީ މަސައްކަތަކީ ވަރަށް ޕްރޮފެޝަނަލް ހަމަތަކެއްގެ ތެރޭގައި ހިފަހައްޓައިގެން އޭނާ ކުރަމުންދާ މަސައްކަތެއްކަން ފާހަގަކުރައްވާ އީސަ ވިދާޅުވީ ހިތްހަމަނުޖެހޭ ކޮންމެފަހަރަކު އެއީ އެމީހަކާ ދެކޮޅަށް މަސައްކަތްކުރަން ޖެހޭ ކަމެއް ކަމަށް ދެކިގެން ނޫޅުއްވާ ކަމަށެވެ.
މިގޮތުން ޕާޓީގެ ލީޑާޝިޕަށް ގެންނަން މަސައްކަތްކުރާ މީހަކީ އެމީހެއްގެ ސަބަބުން ގައުމަށާއި އެމްޑީޕީއަށް ފައިދާކުރާނެ ގާބިލު މީހަކަށްވާން ޖެހޭ ކަމަށާއި ރިޔާސީ ޕްރައިމަރީގައި ކުރީގެ ރައީސް އިބްރާހިމް މުހައްމަދު ސޯލިހު ވާދަކުރައްވާނެ ކަމަށް އުންމީދުކުރައްވާ ކަމަށެވެ.
"އަޅުގަނޑު ވަރަށް އުންމީދުކޮށްގެން މިހުންނަނީ އިބްރާހިމް މުހައްމަދު ސޯލިހު ރިޔާސީ ޕްރައިމަރީއަށް ނުކުމެވަޑައިގަންނަވާނެ ކަމަށް. ވަރަށް އުންމީދުކޮށްގެން އަޅުގަނޑު މިހުންނަނީ. އެނގޭތޯ. އަޅުގަނޑު މަސައްކަތްކުރަން ގައުމު މިއޮތް ހާލަތުން ގައުމަށް އަރައިގަނެވޭނީ، މި ހާލަތު ބަދަލުކުރެވޭނީ މިހާރު އެމްޑީޕީގެ ޕްރައިމަރީއަށް ވާދަކުރައްވަން ތިއްބެވި ބޭފުޅުންނަށް ބަލާއިރު ތަޖުރިބާކާރު އެންމެ ބޮޑު ބޭފުޅަކީ އަޅުގަނޑު ގަބޫލުކުރަނީ އިބްރާހިމް މުހައްމަދު ސޯލިހު،" އީސަ ވިދާޅުވި އެވެ.
އީސަ ވިދާޅުވީ ސިޔާސީ ދާއިރާގައި ކުރިއަށްދިޔުމަށް ނަޝީދު އާއި ސޯލިހުގެ އިތުރުން އެމްޑީޕީގެ ލީޑާޝިޕްގެ ބޭފުޅުން ވަރަށް ބޮޑަށް އެހީތެރިވެދެއްވި ކަމަށާއި އެކަމަށް އެ ހުރިހާ ބޭފުޅުންނަށް ޝުކުރު އަދާކުރާ ކަމަށެވެ.
އީސަ މިހެން ވިދާޅުވި ނަމަވެސް ރިޔާސީ ޕްރައިމަރީގައި ވާދަނުކުރައްވާނެކަން ނަޝީދު ވަނީ މީގެ މާ ކުރިން އިއުލާންކުރައްވާފަ އެވެ. އެމަނިކުފާނު ވިދާޅުވީ ރިޔާސީ ޕްރައިމަރީގައި އެމަނިކުފާނު ތާއީދު ކުރައްވާނީ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލްއަށް ކަމަށެވެ.
