މަގު ބަލަހައްޓަން ހުރި ފުލުހެއް ގައިގައި ސައިކަލަކުން ޖެއްސުމަށްފަހު ފިލަން އުޅުނު ކަމުގެ ތުހުމަތުގައި ޒުވާނަކު ހައްޔަރުކޮށްފި އެވެ.
ފުލުހުން ބުނީ އެ މައްސަލައިގައި ހައްޔަރު ކުރީ ގދ. ފަރެސްމާތޮޑާ، ހަތި، ސާއިން އަބްދުލްގައްޔޫމް ކަމަށެވެ. އޭނާ ކޯޓަށް ހާޒިރު ކުރުމުން 15 ދުވަހު ބަންދުގައި ބަހައްޓަން ވަނީ އަމުރުކޮށްފަ އެވެ.
އެ ހާދިސާ ހިނގީ އިއްޔެ ހަވީރު 5:37 ހާއިރު، މަޖީދީ މަގާއި ޗާންދަނީ މަގާ ގުޅޭ ކަންމަތީގައި ކަމަށް ފުލުހުން ބުންޏެވެ. އެ ހާދިސާގައި ފުލުސް މީހާއަށް އަނިޔާވި ނަމަވެސް ސީރިއަސް އަނިޔާއެއް ނުލިބޭ ކަމަށް ފުލުހުންގެ ހިދުމަތުން ބުނެ އެވެ.
އެ މައްސަލައިގައި ހިމެނޭ ސައިކަލު ޓޯކޮށް، މައްސަލަ ތަހުގީގު ކުރަމުންދާ ކަމަށް ފުލުހުން ބުނެ އެވެ.
މިފަހުން ހިނގި މަގުމަތީގެ ނުރައްކާތެރި އެކްސިޑެންޓުތަކަކަށްފަހު މަގުމަތީގައި ޓްރެފިކް ބަލަހައްޓާ ފުލުހުންގެ އަދަދު ވަނީ ގިނަކޮށްފަ އެވެ. މާލޭގެ ބާރުބޮޑު ހުރިހާ މަގުތަކެއްގެ އެކި ހިސާބުގައި ފުލުހުން މިހާރު ޓްރެފިކް ބަލަހައްޓަ އެވެ.
