ރާއްޖޭގައި ބާއްވާ އެންމެ ބޮޑު އޯޕަން ވޯޓަރ ފެތުމުގެ މުބާރާތް ކަމުގައިވާ 'ދިރާގު މާލޭ އޯޕަން 2026' ގެ ރޭސް ކިޓްތައް ދިރާގު ހެޑް އޮފީހުން ދޫކުރަން ފަށައިފި އެވެ.
ދިރާގުން މައުލޫމާތު ދޭ ގޮތުގައި، ރަޖިސްޓްރީވެފައިވާ ފަރާތްތަކަށްކިޓް ދޫކުރުން ކުރިއަށްދާނީ 18 އިން 20 އޮގަސްޓް ގެ ނިޔަލަށެވެ. ކިޓް ދޫކުރާނީ ކޮންމެ ދުވަހަކު ހަވީރު 5:00 އިން ރޭގަނޑު 10:00 އަށް ދިރާގު ހެޑް އޮފީހުގައި ބާއްވާ 'ޑީއެމްއޯ އެކްސްޕޯ' ގައެވެ.
ރޭސް ކިޓުގައި ހިމެނޭ ތަކެތި:
- މުބާރާތުގެ ރަސްމީ ޓީޝާޓް
- ސްވިމް ކެޕް
މުބާރާތުގެ މުހިންމު މައުލޫމާތު:
- ތާރީހު: 21 އަދި 22 އޮގަސްޓް 2026
- ސަރަހައްދު: މާލޭ ރަސްފަންނު ސަރަހައްދު
- އިންތިޒާމު ކުރަނީ: ސްވިމް މޯލްޑިވްސް
މި މުބާރާތުގެ މައިގަނޑު މަގުސަދަކީ ރާއްޖޭގައި އޯޕަން ވޯޓަރ ސްވިމިން ކުރިއަރުވައި، މި ކުޅިވަރަށް އާންމުންގެ ޝައުގުވެރިކަން އުފެއްދުމުގެ އިތުރުން، ރާއްޖޭގެ ކަނޑުތައް ރައްކާތެރިކުރުމަށް ހޭލުންތެރިކަން އިތުރުކުރުމެވެ.
ވާދަކުރާ ކެޓެގަރީތައް:
- ވަކިވަކި ފެތުންތެރިންގެ ކެޓެގަރީ: 1 ކިލޯމީޓަރު، 500 މީޓަރު، އަދި 250 މީޓަރު
- ޓީމު ކެޓެގަރީ : 500 މީޓަރުގެ ޓީމް ރިލޭ
މިއަހަރު އަލަށް ތައާރަފްކުރި 500 މީޓަރުގެ ޓީމް ރިލޭ ކެޓެގަރީއަކީ ރައްޓެހިންނާއި، އާއިލާ، ނުވަތަ ފަތާ ކްލަބުތަކަށް ނިސްބަތްވާ ފެތުންތެރިން އެކުގައި ޓީމެއްގެ ގޮތުގައި ބައިވެރިވުމަށް ލިބިގެންދާނެ ރަނގަޅު ފުރުސަތެކެވެ. ދިރާގުން އަބަދުވެސް ދަނީ ދުޅަހެޔޮ ދިރިއުޅުމަކަށް ބާރުއަޅައި، އިޖުތިމާއީ ގުޅުން ބަދަހިކުރުމަށް އެހީތެރިވެދޭ، އަދި ގިނަ ބަޔަކަށް ބައިވެރިވެވޭގޮތަށް ބާއްވާ މިފަދަ ކުޅިވަރު އަދި އިޖުތިމާއީ ހަރަކާތްތަކަށް އެއްބާރުލުމާއި އެހީތެރިކަން ފޯރުކޮށްދެމުންނެވެ.
