ސޯޝަލްމީޑިއާ އެކްޓިވިސްޓު، އަދި އެޓޯލް ޕްރެސްގެ އެޑިޓަރު، ތޮއްޔިބު ޝަހީމް ސޯޝަލްމީޑިއާގައި ކުރި ޕޯސްޓަކާ ގުޅިގެން ފުލުސް އޮފީހަށް ހާޒިރުވާން އަނެއްކާ ވެސް އަންގައިފި އެވެ.
އެކްސްގައި ތޮއްޔިބު ކުރި ޕޯސްޓަކާ ގުޅިގެން އޭނާ ފުލުހަށް ހާޒިރުވާން އަންގާފައި ވަނީ މާދަމާ މެންދުރުފަހު 2:00 ޖަހާއިރަށެވެ. މިއީ އެ މައްސަލައިގައި އޭނާ ފުލުހަށް ހާޒިރުކުރާ ދެވަނަ ފަހަރެވެ. މީގެ ކުރިން އޭނާ ފުލުހަށް ހާޒިރުކުރީ ސެޕްޓެމްބަރު 26، 2024، ގަ އެވެ.
އޯގަސްޓު 21، 2024، ގައި އެކްސްގައި ތޮއްޔިބު ޕޯސްޓުކޮށްފައި ވަނީ ކުރީގެ ރައީސް ޔާމީންގެ ވެރިކަމުގައި، އެމަނިކުފާނު ހައްޔަރުކުރުމަށް އަސްލު ނޫން ކޯޓު އަމުރެއްގެ ދަށުން ހިންގި ހަރަކާތްތައް ތަހުގީގުކޮށް ތައްޔާރުކޮށްފައިވާ ކަމަށް ބުނާ ރިޕޯޓެއްގެ ހަތަރު ސަފުހާ އެވެ.
ތޮއްޔިބުގެ ފޯނު 17 ދުވަހަށް ހިފެހެއްޓުމަށްފަހު ދޫކޮށްލައިފި
ތައްޔިބު ވިދާޅުވީ މިޒަމާނުގައި ދިރިއުޅުމުގެ ހުރިހާކަމެއް ބިނާވެފައި އޮންނަނީ ފޯނާއި އެހެނިހެން އޮންލައިން އަދި އޮފްލައިން އެޕްލިކޭޝަންތަކަށް ކަމަށް. ނަމަވެސް އެނާގެ ފޯން ހިފެހެއްޓުމުން ދިރިއުޅުމަށް ކުރާ ހުރިހާ ކަމަކާއި ގުޅުންތައް ހުއްޓުނުކަމަށް.
އެ މައްސަލައިގައި ތޮއްޔިބުގެ މައްޗަށް ފުލުހުން ތުހުމަތު ކުރަނީ ސައްހަ ލިޔުމަކަށް ބަދަލު ގެނައުމާއި އެ ހަދާ ލިޔުން ނަކަލު ކުރުމުގެ އިތުރުން އަގުހުރި އެއްޗެހި ނަކަލުކޮށް އަސްލުގެ ގޮތުގައި ދެއްކުމުގެ ކުށް ކުރި ކަމަށެވެ. އެ ކުށަކީ ދިވެހިރާއްޖޭގެ ގާނޫނުލްއުގޫބާތުގެ 310 ވަނަ މާއްދާގައި ކުށެއް ކަމަށް ކަނޑައަޅާފައިވާ އަމަލެކެވެ.
އެ ތުހުމަތުގައި މީގެ ކުރިން ތޮއްޔިބު ފުލުހަށް ހާޒިރުކޮށް ބަޔާން ނެގުމަށްފަހު، އަނެއްކާ ފުލުހަށް ހާޒިރުކުރަނީ ޕްރޮސެކިއުޓާ ޖެނެރަލްގެ އޮފީހުން އެދިގެން އިތުރު ތުހުމަތުކޮށް ބަޔާން ނެގުމަށް ކަމަށް ތޮއްޔިބު މި ނޫހަށް ބުންޏެވެ.
ސޯޝަލްމީޑިއާގައި ކުރި ޕޯސްޓަކާ ގުޅިގެން ތޮއްޔިބުގެ ފޯނާއި އިލެކްޓްރޯނިކް ވަސީލަތްތައް ވެސް މީގެ ކުރިން ކޯޓު އަމުރެއްގެ ދަށުން ފުލުހުން ހިފެހެއްޓި އެވެ. އެ ތަކެތި ފުލުހުން ދޫކޮށްލީ 17 ދުވަސްފަހުންނެވެ.
