މިދިޔަ ޖުލައި 9، ގައި އިއްޒުއްދީން ފާލަމާ ދިމާ ބޭރުން "ލީޖަން 1" ނަމަކަށް ކިޔާ ލޯންޗަކާއި ދޯންޏެއް ޖެހި ހިނގި އެކްސިޑެންޓުގައި ހިމެނޭ ދޯނި ހޯދައި އެ ދޯނީގެ ކެޕްޓަންގެ ސައިސަންސް ހިފަހައްޓައިފި އެވެ.
ފުލުހުން ބުނީ މި މައްސަލައިގައި ހިމެނޭ ދޯނި މިދިޔަ ހޮނިހިރު ދުވަހު ހުޅުމާލޭ ފަޅުގައި އަޅާފައި އޮއްވައި ފެނުމުން، އެ ދޯނި ބަލައި ފާސްކޮށް ތަހުގީގަށް ބޭނުންވާ މައުލޫމާތު އެއްކޮށްފައިވާ ކަމަށެވެ.
"ކަށަވަރުކުރަންޖެހޭ ކަންކަން ކަށަވަރުކުރުމަށްފަހު، މި ހާދިސާއާ ގުޅިގެން ދޯނީގެ ކެޕްޓަންއާ ވަނީ ސުވާލުކޮށްފައި. މީގެއިތުރުން، ތަހުގީގީ މަރުހަލާގެ ތެރެއިން މިހާރު ވަނީ ކެޕްޓަންގެ ލައިސަންސްވެސް ހިފަހައްޓާފައި،" ފުލުހުން ބުންޏެވެ.
އެކްސިޑެންޓުވުމުން ފިލި ލޯންޗު ހޯދަން އާންމުންގެ އެހީތެރިކަމަށް ފުލުހުން އެދެފި
"މިހާތަނަށް ލިބިފައިވާ މައުލޫމާތަށް ބަލާއިރު، ކަނޑުމަތިން ދެ އުޅަނދެއް ޖެހި ހިނގި މި އެކްސިޑެންޓްގައި ހިމެނޭ އަނެއް ކަނޑުއުޅަނދު ވަނީ އެކްސިޑެންޓަށްފަހު މަޑުނުކޮށް ގޮސްފަ،" ފުލުހުން ބުރާސްފަތި ދުވަހުގެ ރޭ ބުނެފައިވެ އެވެ.
މި އެކްސިޑެންޓުގައި ލޯންޗުގައި ތިބި ފަސް މީހަކަށް އަނިޔާވެގެން ފަރުވާ ދިނެވެ. އެއީ ހަތަރު ބިދޭސީއަކާއި ދިވެއްސެކެވެ.
އެކްސިޑެންޓުގައި ހިމެނޭ ދޯނި ނުފެނިގެން ފުލުހުން އޭރު އާންމުންގެ އެހީތެރިކަމަށްވެސް އެދުނެވެ. މި މައްސަލަ ފުލުހުން ދަނީ ތަހުގީގުކުރަމުންނެވެ.
