ރައީސް އޮފީހުގެ ކުރީގެ މުވައްޒަފުގެ ޕާސްޕޯޓު ދޫކޮށްލުމަށްފަހު އަނެއްކާވެސް ހިފަހައްޓައިފި

އަދަދު ނޫހުން ގެނެސްދިން "އައިޝާ" ޑޮކިއުމެންޓްރީއާ ގުޅިގެން ކަމަށް ބުނެ ފުރުން މަނާކުރި ރައީސް އޮފީހުގެ ކުރީގެ މުވައްޒަފުގެ ޕާސްޕޯޓު ދޫކޮށްލުމަށްފަހު އަނެއްކާވެސް ކޯޓު އަމުރެއްގެ ދަށުން ހިފަހައްޓައިފި އެވެ.

އަދަދު އަށް އެނގިފައިވާ ގޮތުގައި ރައީސް އޮފީހުގައި ކުރިން މަސައްކަތްކުރި  އެ މުވައްޒަފުގެ ޕާސްޕޯޓް އަދި ޓްރެވަލް ޑޮކިއުމަންޓްތައް ހިފަހައްޓާފައި ވަނީ މިއަދުން ފެށިގެން ނޮވެމްބަރު 26، ގެ ނިޔަލަށެވެ.

މިފަހަރު ވެސް އޭނާ ފުރުން މަނާކުރީ ފުލުހުންގެ އިންޓެލިޖެންސް ރިޕޯޓެއްގެ މައްޗަށް ބިނާކޮށެވެ. މީގެ ކުރިއެކޭ އެއްގޮތަށް މިފަހަރު ވެސް މައްސަލައިގެ ހަމައެކަނި ހެއްކަކަށް އޮތީ ފުލުހުންގެ އިންޓެލިޖެންސް ރިޕޯޓެކެވެ.

ރައީސް އޮފީހުގެ ކުރީގެ މުވައްޒަފަކު ފުރުން މަނާކޮށްފި

"އައިޝާ" ޑޮކިއުމެންޓްރީއާ ގުޅިގެން ފުލުހުން ކުރިއަށްގެންދާ ޖިނާއީ ތަހުގީގަކަށް، ރައީސް އޮފީހުގެ ކުރީގެ މުވައްޒަފަކާއި "އަދަދު" ނޫހުގެ އިސްވެރިންގެ ޕާސްޕޯޓު ކޯޓު އަމުރެއްގެ ދަށުން ވަނީ ހިފަހައްޓާފައި. މި މައްސަލައިގައި ފުލުހުން ވަނީ އެ ނޫހުގެ އޮފީސް ބަލައި ފާސްކޮށް ބައެއް ތަކެތި ގެންގޮސްފައި.

އަދަދު އިން އައިޝާ ޑޮކިއުމެންޓްރީ ގެނެސްދިންތާ މަސް ދުވަސް ފަހުން، މި މައްސަލައިގައި ޖިނާއީ ތަހުގީގެއް ފެށީ އެ ޑޮކިއުމެންޓްރީގައި ރައީސްއަށް ކުރި ތުހުމަތުތަކާ ގުޅިގެން ރައީސުލްޖުމްހޫރިއްޔާ މުހައްމަދު މުއިއްޒުއާ ސުވާލުކުރި ދުވަހު އެވެ. އެމަނިކުފާނު ދެއްވި ޖަވާބުގައި އެ ތުހުމަތުތައް ދޮގުކުރަމުން، އެ މައްސަލައިގައި ދައުވާކުރާނެކަމުގެ އިންޒާރު މުއިއްޒު ދެއްވި އެވެ.

ފުލުހުން ތުހުމަތުކުރަނީ އެ ޑޮކިއުމެންޓްރީގައި އަދަދު ނޫހުން މުއިއްޒުއަށް ގަޒްފުގެ ތުހުމަތުކޮށްފައިވާ ކަމަށެވެ. ކޯޓު އަމުރު ހޯދަމުން ފުލުހުން ބުނެފައި ވަނީ އެ ޑޮކިއުމެންޓްރީ ތައްޔާރުކުރުމުގައި އަދި ޕަބްލިޝްކުރުމުގައި ހަރަކާތްތެރިވި އެންމެންނަކީ ގަޒްފު ކުރުމުގެ ކުށުގެ ތުހުމަތުކުރެވޭ މީހުން ކަމަށެވެ.

 މި މައްސަލައިގައި ކޯޓު އަމުރެއްގެ ދަށުން ފުލުހުން ވަނީ އަދަދު ނޫހަށް ރެއިޑުކޮށް މި އޮފީހުގައި ނޫސްވެެރިކަން ކުރުމަށް ބޭނުންކުރާ ގިނަ އަދަދެއްގެ އިލެކްޓްރޯނިކް ސާމާނު ގެންގޮސްފަ އެވެ. އަދިވެސް، އެ ތަކެތި ވީ ފުލުހުންގެ ބެލުމުގެ ދަށުގަ އެވެ.

އައިޝާ ޑޮކިއުމަންޓްރީގައި ކޮށްފައިވާ ތުހުމަތުތައް މުއިއްޒު ވަނީ އިއްޔެ ދޮގު ކުރައްވާފަ އެވެ. މި ޑޮކިއުމެންޓްރީ ގެނެސްދީފައިވަނީ ވާހަކަތައް ކިޔައިދޭ މީހާއަކީ ކާކުކަން ނޭނގޭ ގޮތަށް އަޑު ބަދަލުކޮށްގެނެވެ.