ކުރީގެ ރައީސް، މުހައްމަދު ނަޝީދުގެ ވެރިކަން ބަދަލުވި ދުވަސްވަރު ކޯޓު އަމުރެއް ހޯދުމަކާ ނުލައި އެތައް ބައެއްގެ ފޯނު ކޯލުތައް ދިވެހި ފުލުހުންގެ ހިދުމަތުން އަޑުއަހަމުންދިޔަކަން ހާމަވެއްޖެ އެވެ.
އެކަން ހާމަވީ އަބްދުލް މުހީތު (ބޮބީ) އަށް ތޫނު އެއްޗަކުން ހަމަލާދީ މަރާލުމުގެ ކުށް ސާބިތުވެފައިވާ ޅ. ނައިފަރު ޒައިތޫނިގޭ މުހައްމަދު މައިމޫނާއި ގދ. ގައްދޫ އަބްލަޣީގޭ މުހުޖަތު އަހުމަދު ނާސިހުގެ އިސްތިއުނާފު އަޑުއެހުމުގަ އެވެ. މީގެ 12 އަހަރު ކުރިން ހިނގި މި ހާދިސާގައި، ބޮބީ މަރާލާފައި ވަނީ ފިނޭންސް މިނިސްޓްރީން ކުރިމަތިން އޮންނަ ގޯޅި ތެރޭގައި ސައިކަލެއް މަތީގައި ހުއްޓާ، އެހެން މީހެއް ކަމަށް ހީކޮށެވެ.
މުހުޖަތު އާއި މައިމޫންގެ ފަރާތުން ހައިކޯޓުގައި އިސްތިއުނާފުކޮށްފައިވާ މައްސަލައިގައި އިއްޔެ ކުރިއަށް ގެންދިޔަ އަޑުއެހުމުގައި ވާހަކަ ދެކެވުނީ އެ މައްސަލަ ސާބިތުކުރުމަށް ޓަކައި ހެކީގެ ގޮތުގައި ދައުލަތުން ހުށަހެޅި ކޯލް ރިކޯޑިންއާ ގުޅޭގޮތުންނެވެ. އެ މީހުންގެ ވަކީލުން ބުނީ ޖިނާއީ ކުށެއްގެ ތަހުގީގަށް ކޯޓު އަމުރެއް ނެތި މީހެއްގެ ފޯނު ކޯލެއް އަޑުއަހައި ރިކޯޑުކުރުމަކީ ގާނޫނާއި ގަވާއިދުތައް ތަންދޭ ކަމެއް ނޫން ކަމަށެވެ.
އެ ވާހަކަތަކަށް ރައްދު ދެމުން ދައުލަތުގެ ވަކީލު ބުނީ އެ ކޯލްތައް އަޑުއަހާފައި ވަނީ އެ މީހުންނަށް އެކަނި ޓާގެޓުކޮށްގެން ނޫން ކަމަށެވެ. އަދި، އެ މައުލޫގައި ވާހަކަދައްކާއިރު، އެ ހާދިސާ ހިނގައިދިޔަ ތާރީހަށް ބެލުން މުހިންމު ކަމަށް ދައުލަތުން ފާހަގަކުރި އެވެ.
"މި ހާދިސާ ހިނގައިދިޔައީ ފެބްރުއަރީ 19، 2012 ވަނަ ދުވަހުގެ 1:51 ހާއިރު، ދިވެހިރާއްޖޭގެ އޭރުގެ ހާލަތު އޮތީ އެހެން ހާލަތެއްގައި، އެހެންކަމަށްވާއިރު ފުލުހުންގެ ފަރާތުން މާލޭގައި އަދި، ދާހިލީ މި ދަންނަވާ އެއްވަނަ ނަންބަރުގައި މި ބަޔާންކުރާ ކަމެއް މާލޭގައި ހަރަކާތްތެރިވާ ގްރޫޕުތަކަކުން ހިންގަފާނެކަމަށް ގަބޫލުކުރެވިގެން ބަލަމުންދިޔައީ،" ދައުލަތުގެ ވަކީލު ވިދާޅުވި އެވެ.
"އެއްވެސް ހާލަތެއްގައި އިއްޒަތްތެރި ފަނޑިޔާރު، ލޮޖިކަލީ އަޅުގަނޑުމެން ވިސްނާއިރުވެސް އެބަ އެނގޭދެއްތޯ މި މީހުންގެ މައްޗަކަށް ތުހުމަތެއް އޮތީކީއެއް ވެސް ނޫން، މި މީހުން އެ އަމަލު ހިންގުމަށްފަހުގައި ފޯނުކޯލެއް ކޮށްފާނޭ ކަމަށް ފުލުހުންނަށް ގަބޫލުކުރެވޭނީއެއް ވެސް ނޫން، އެ އިލްހާމެއް ވާނީކީއެއް ވެސް ނޫން."
ކޯޓު އަމުރަކާ ނުލައި އިންޓެލިޖެންސް މައުލޫމާތު ހޯދައި އެއްކޮށް ދިރާސާކޮށް އެ މައްޗަށް އަޅަންޖެހޭ ފިޔަވަޅުތައް އެޅުމުގެ އިހުތިޔާރު ފުލުހުންނަށް ލިބެނީ ހަމައެކަނި ގައުމީ އަދި ދާހިލީ ސަލާމަތާއި ރައްކާތެރިކަމަށް ޓަކައި އެވެ. މި ކަން ބަޔާންކޮށްފައި އޮންނަނީ ފުލުހުންގެ ގާނޫނުގެ ދަށުން ހަދާފައިވާ، ފުލުހުންނަށް ލިބިދީފައިވާ އެންމެހާ ބާރުތަކާއި އިހުތިޔާރުގެ ބޭނުން ހިފުމާބެހޭ ގަވާއިދުގެ 49 ވަނަ މާއްދާގަ އެވެ.
ދައުލަތުގެ ވަކީލު އިއްޔެ ކޯޓުގައި ވިދާޅުވީ މުހުޖަތު އާއި މައިމޫންއާ ދެކޮޅަށް ހެކީގެ ގޮތުގައި ހުށާހަޅާފައިވާ ކޯލް ރިކޯޑިންއަކީ ކުރީގެ ރައީސް ނަޝީދުގެ ވެރިކަން ބަދަލުވެގެންދިޔަ ދުވަސްވަރު، ރާއްޖޭގެ "ގައުމީ ސަލާމަތަށް ޓަކައި" ފުލުހުން ކުރަމުންދިޔަ މަސައްކަތުގެ ތެރެއިން "އަޑު އިވުނު" ވާހަކަތަކެއް ކަމަށެވެ.
"ފެބްރުއަރީ 19، 2012 ގައި މި ހާދިސާ ހިނގައިދިޔައީމާ އޭރު ފުލުހުން ގައުމީ ސަލާމަތަށްޓަކައި ކުރަމުންދިޔަ މަސައްކަތުގެ ތެރެއިން އަޑުއިވުނީ މި މީހުން މީގައި، ކޯލް ރިކޯޑިންތަކުގެ ޑޮކިއުމެންޓުތަކުގައި އެ ބަޔާންކުރާ މިންވަރަށް ވާހަކަދައްކާފައި ހުރިކަން،" ދައުލަތުގެ ވަކީލު ވިދާޅުވި އެވެ.
އެ ވާހަކަތަކާ ގުޅިގެން އިސްތިއުނާފުކުރާ ފަރާތުން ވަނީ، ގިނަ ބައެއްގެ ކޯލް ރިކޯޑިންތައް ފުލުހުން އަޑުއެހި ވާހަކައަކީ ބިރުވެރިކަމެއްގެ ގޮތުގައި ސިފަކޮށްފަ އެވެ.
އައު ގާނޫނުއަސާސީގެ ދަށުން ދިވެހިރާއްޖޭގައި ބޭއްވި ފުރަތަމަ މިނިވަން އިންތިހާބު ކާމިޔާބުކޮށް އުފެދުނު އެމްޑީޕީގެ ފުރަތަމަ ވެރިކަން ބަދަލުކުރީ ފެބްރުއަރީ 7، 2012 ގަ އެވެ. އެ ވެރިކަން ބަދަލުވެގެންދިޔައީ އޭރު އިދިކޮޅުގައި ތިބި ޑީއާރުޕީ އާއި ޖުމްހޫރީ ޕާޓީ، އަދާލަތު ޕާޓީގެ އިތުރުން ވެސް ބައެއް އެހެން ސިޔާސީ ބޭފުޅުން މަގުތައް މައްޗަށް ނުކުމެ ހިންގި ހަމަނުޖެހުންތަކަށްފަހު އެވެ.
އޭގެ އެއް ދުވަސްފަހުން، ފެބްރުއަރީ 8، 2012 ގައި އެމްޑީޕީއަށް ތާއީދުކުރާ ގިނަ އަދަދެއްގެ ރައްޔިތުން މަގުމައްޗަށް ނުކުމެ މުޒާހަރާ ކުރަން ފެށުމުން ފުލުހުން ވަނީ ވަރަށް އަނިޔާވެރިކޮށް މުޒާހަރާގެ ބައިވެރިންނަށް ހަމަލާދީ އެތައް ބަޔަކު ޒަހަމުކޮށްލައިފަ އެވެ.
އެ ހަމަނުޖެހުންތަކާ ގުޅިގެން ރާއްޖޭގެ އެކި ކަންކޮޅުގައި ވެސް ހަމަނުޖެހުންތައް ހިނގި އެވެ.
ނަމަވެސް، އެ ދުވަސްވަރު ގިނަ އަދަދެއްގެ ދިވެހިންގެ ފޯނު ކޯލްތައް ފުލުހުން އަޑުއެހިކަން ހާމަވި މިއީ ފުރަތަމަ ފަހަރެވެ. ފުލުހުން އޭރު އަޑުއަހާފައި ވަނީ ކިތައް މީހުންގެ ކިތައް ކޯލް ކަމާއި އެއީ ކޮންބައެއްގެ ކޯލްތަކެއްކަމެއް އަދި ނޭނގެ އެވެ.
