ނޭޕާލް/ޓިބެޓް ބޯޑަރު ސަރަހައްދުގައި ފެން ބޮޑުވެ ހިނގި ހާދިސާގައި އެ ގައުމަށް އެހީވާން މޯލްޑިވިއަން ރެޑް ކްރެސެންޓް (އެމްއާރްސީ) އިން ފަންޑެއް ހުޅުވާލައިފި އެވެ.
މިދިޔަ ބުދަ ދުވަހު އެ ސަރަހައްދުގައި ފެން ބޮޑުވީ ފަރުބަދައަކުން ފޭބި ގާތަކެއް ކޯރަކަށް އެޅި، ކޯރު ބަންޑުންވުމުގެ ސަބަބުންނެވެ. އެ ހާދިސާގައި މިހާތަނަށް 626 މީހުން ވަނީ މަރުވެފަ އެވެ. އަދި ގެއްލުނު މީހުންގެ އަދަު 2500 އަށް ވުރެ މައްޗަށް ގޮސްފި އެވެ.
"އެމްއާރްސީ ނޭޕާލް ސޮލިޑަޓަރީ ފަންޑު" ގެ ބޭނުމަކީ ކޯރު ބަންޑުންވުމުގެ ކާރިސާގައި އަސަރުކޮށްފައިވާ މީހުންނަށް ބޭނުންވާ ކުއްލި އެހީތެރިކަން ފޯރުކޮށްދިނުން ކަމަށް ރެޑް ކްރެސެންޓުން ބުނެ އެވެ.
އެ ފަންޑުން ލިބޭ ހުރިހާ ފައިސާއެއް، އިންޓަނޭޝަނަލް ފެޑެރޭޝަން ފޯ ރެޑް ކްރޮސް މެދުވެރިކޮށް ދޭނީ ނޭޕާލް ރެޑް ކްރޮސް ސޮސައިޓީއަށް ކަަމަށް އެމްއާރްސީ އިން ބުނެ އެވެ.
ކޯރު ބަންޑުންވުމުގެ ހާދިސާގައި 93،000 މީހުންނަށް އެކި ގޮތްގޮތުން އަސަރުކޮށްފައިވާ ކަމަށް ނޭޕާލުގެ ސަރުކާރުން ބުނެ އެވެ. އޭގެ ތެރޭގައި ގެދޮރު ސުންނާފަތިވި މީހުންގެ އަދަދު ވެސް އެތައް ހާހަކަށް އަރަ އެވެ.
އެ ހާދިސާގައި މީހުން ސަލާމަތް ކުރުމުގެ މަސައްކަތް ޗައިނާ އާއި އިންޑިއާ ސަރުކާރުން ވެސް ދަނީ ކުރިއަށް ގެންދަމުންނެވެ. ރެސްކިއު ޓީމުތަކުން މިހާތަނަށް 3700 މީހުން ސަލާމަތްކޮށްފައިވާ ކަމަށްވެ އެވެ.
ގެއްލުނު މީހުންގެ ތެރޭގައި، ޓިބެޓުގެ ކައިލާޝް ފަރުބަދައަށް އަޅުކަން ކުރަން ދިޔަ ހިންދޫ ދީނުގެ މީހުން ވަރަށް ގިނަ ކަމަށް ރިޕޯޓުތަކުން ބުނެ އެވެ. ގެއްލުނު ފަތުރުވެރިންގެ އަދަދު 777 އަށް އަރާ ކަމަށް ބައެއް ރިޕޯޓުތަކުން ބުނެ އެވެ.
