ނޭޕާލާއި ޗައިނާގެ ޓިބެޓް ގުޅޭ ހިމަލަޔަން ބޯޑަރު ސަރަހައްދުގައި ބުދަ ދުވަހު ފަރުބަދައަކުން ބޮޑު ބައެއް ކަނޑައިގެން ގޮސް ކޯރަކަށް ފޭބުމުގެ ސަބަބުން ކުރިމަތިވި ނުރައްކާތެރި ފެންބޮޑުވުމުގެ ހާދިސާގައި، މަދުވެގެން 95 މީހުން މަރުވެ، ސަތޭކައަށްވުރެ ގިނަ ފަތުރުވެރިން ގެއްލިއްޖެ އެވެ.
މި ކާރިސާއާ ގުޅިގެން އާންމުވެފައިވާ ވީޑިއޯތަކުން ފެންނަ ގޮތުގައި، ބޯޑަރު ސަރަހައްދުން ގިނަ އަދަދެއްގެ ބަޔަކު ވަނީ ފެނާ އެކު އޮޔާ ގޮސްފަ އެވެ. ދެ ގައުމުގެ ކަމާބެހޭ އިދާރާތަކުން ލަފާކުރާ ގޮތުގައި މަރުވި މީހުންގެ އަދަދު މިއަށްވުރެ މާ މަތިވުމަކީ އެކަށީގެންވާ ކަމެކެވެ.
މި ހާދިސާގައި ނޭޕާލްގެ ގިނަ އަދަދެއްގެ ގެދޮރާއި، މަގުތަކާއި ކަރަންޓު އުފައްދާ މަރުކަޒުތައް ފެނާ އެކު ގޮސްފައިވާއިރު، ޓިބެޓުގެ އޮފިޝަލުން ވިދާޅުވީ ގީރޮންގް ކައުންޓީގެ ބޯޑަރު ސަރަހައްދަށް ކުރިމަތިވި ބިންގަނޑު ކަނޑައިގެން ދިއުމުގެ ހާދިސާގައި ގިނަ ބަޔަކު މަރުވެފައިވާނެ ކަމަށް ބެލެވޭ ކަމަށެވެ.
ނޭޕާލްގެ ފޮރިން މިނިސްޓަރު ޝިޝިރު ޚާނާލް އެ ގައުމުގެ ގާނޫނު ހަދާ މަޖިލީހުގައި ބުދަ ދުވަހު ވިދާޅުވި ގޮތުގައި، މި ފެންބޮޑުވުން މެދުވެރިވީ އެ ސަރަހައްދަށް އައި ބިންހެލުމެއްގެ ސަބަބުން ސުނޯގަނޑެއް ކަނޑައިގެން ދިއުމާ ގުޅިގެން ކަމަށް ބައެއް ރިޕޯޓުތައް ބުނާ ކަމަށެވެ.
ނޭޕާލާއި ޓިބެޓުގެ ބޯޑަރުގެ ޗައިނާ ފަޅީގައި ހަރުކޮށްފައިވާ ސަލާމަތީ ކެމެރާތަކުން ފެންނަ ގޮތުގައި، ހިލަޔާއި ޗަކަ އާއި ފެންގަނޑު އައިސް އިމާރާތްތަކާއި އުޅަނދުތައް ސުންނާފަތިކޮށްލުމުގެ ކުރިން ގިނަ ބަޔަކު އެ ސަރަހައްދުން ސަލާމަތްވާން ދުވަމުން ދިޔަ އެވެ.
ބިމުގެ 2،000 މީޓަރު (6،560 ފޫޓު) މަތިން އޮހިގެން އައި މި ކަޅު ފެންގަނޑާ ގުޅިގެން، ނޭޕާލާ ބޯޑަރު ހިއްސާކުރާ އިންޑިއާގެ އުއްތަރު ޕްރަދޭޝް އަދި ބިހާރު ސްޓޭޓަށް ވަނީ ފެންބޮޑުވެދާނެ ކަމުގެ އިންޒާރު ނެރެފަ އެވެ.
ބިހާރުގެ ކަމާބެހޭ އިދާރާތަކުން ބުނި ގޮތުގައި ހަ ޑިސްޓްރިކްޓަކުން މިހާތަނަށް 5،000 މީހުން ރައްކާތެރި ހިސާބުތަކަށް ބަދަލުކޮށްފައިވާއިރު، ޖުމްލަ 10،000 އާއި 12،000 އާ ދެމެދުގެ އަދަދަކަށް މީހުން ބަދަލުކުރުމަށް ވަނީ ރޭވިފަ އެވެ.
ނޭޕާލްގެ ޓޫރިޒަމް މިނިސްޓްރީން ބުނި ގޮތުގައި އެ ސަރަހައްދުން ގެއްލުނު މީހުންގެ ތެރޭގައި ބޭރު ގައުމުތަކަށް ނިސްބަތްވާ 341 ފަތުރުވެރިން ހިމެނެ އެވެ. މީގެ ތެރޭގައި އިންޑިއާގެ 100 އަށްވުރެ ގިނަ މީހުންނާއި، އެމެރިކާގެ ތިން މީހަކާއި އިނގިރޭސިވިލާތުގެ 12 މީހަކު ހިމެނެ އެވެ. މީގެ އިތުރުން އެ ސަރަހައްދުގެ ގިނަ އަދަދެއްގެ ރައްޔިތުން ވެސް ވަނީ ގެއްލިފަ އެވެ.
ނޭޕާލް ފުލުހުން ބުނި ގޮތުގައި ރެސްކިއު ޓީމުތަކުން މިހާތަނަށް 95 މީހެއްގެ ހަށިގަނޑު ވަނީ ހޯދާފަ އެވެ. އަދި ޒަޚަމްވި 65 މީހަކަށް އެ ސަރަހައްދުގެ ހޮސްޕިޓަލްތަކާއި ވެރިރަށް ކަތަމަންޑޫގެ ހޮސްޕިޓަލްތަކުގައި ފަރުވާ ދެމުންދާ ކަމަށް މީޑިއާތަކުން ރިޕޯޓުކުރެ އެވެ.
ދެކުނު ކޮރެއާއިން ބުނި ގޮތުގައި އެ ގައުމުގެ ހައިޑްރޯޕަވަރު ޕްލާންޓެއްގައި މަސައްކަތް ކުރަމުންދިޔަ އަށް މީހަކު ވެސް ވަނީ ގެއްލިފަ އެވެ.
ބިންގަނޑު ކަނޑައިގެން ދިޔަ ސީދާ ސަބަބު އަދި ކަށަވަރު ނުވި ނަމަވެސް، ޖަރުމަނުގެ ރިސާޗް ސެންޓަރު ފޯ ޖިއޯސައިންސަސް (ޖީއެފްޒެޑް) އިން ބުނީ ސީސީޓީވީ ފޫޓޭޖުން ފެންނަ ވަގުތުގެ ހަތް މިނެޓު ކުރިން އެ ސަރަހައްދަށް 4.4 މެގްނިޓިއުޑްގެ ބިންހެލުމެއް އައިސްފައިވާ ކަމަށެވެ.
