ނޭޕާލްގެ މަދޭޝް ޕްރޮވިންސްގައި އުމުރުން އެންމެ ތިން އަހަރުގެ އަންހެން ކުއްޖަކު ރޭޕްކޮށް، މަރާލި ކަމަށް ތުހުމަތު ކުރެވޭ މައްސަލައަކާ ގުޅިގެން ކަންބޮޑުވުން އުފެދިއްޖެ އެވެ.
މަދޭޝް ޕްރޮވިންސްއިން އެ ކުއްޖާ ގެއްލިގެން ހޯދާތާ ތިން ދުވަސް ފަހުން، މިދިޔަ ހަފުތާގައި އެ ކުއްޖާ މަރުވެފައި އޮއްވާ ފެނުނު ހާދިސާއާ ގުޅިގެން އެ ގައުމުގައުި ދަނީ މުޒާހަރާތައް ކުރަމުންނެވެ.
މި މައްސަލައާ ގުޅިގެން މިހާތަނަށް ނުވަ މީހަކު ހައްޔަރުކޮށްފައިވާ ކަމަށް އެ ސަރަހައްދުގެ ފުލުހުންގެ ތަރުޖަމާނަކު ބުނެފައިވެ އެވެ.
މި އަނިޔާވެރި އަމަލާ ގުޅިގެން ގާނޫނީ އިސްލާހުތަކަށް ގޮވާލާ އަޑުތައް ގަދަވެފައިވާއިރު، މި މައްސަލައިގައި ތުހުމަތު ކުރެވޭ ފުރާވަރުގެ ކުއްޖެއްގެ ވީޑިއޯ ސޯޝަލް މީޑިއާގައި ލީކުވުމާ ގުޅިގެން، ތަހުގީގުގެ ކުރީކޮޅު ފުލުހުން އިހުމާލުވެފައިވާ ކަމުގެ ތުހުމަތުތައް ވެސް ވަނީ އަމާޒުވެފަ އެވެ.
އެ ވީޑިއޯގައި ފެންނަނީ ފުލުހުންގެ ބަންދުގައި ހުރި ފުރާވަރު އުމުރުގެ ތުހުމަތު ކުރެވޭ ކުއްޖަކު ބަޔާން ދޭ މަންޒަރެވެ. ފުލުހުންގެ ބެލުމުގެ ދަށުގައި ހުރި މީހެއްގެ ވީޑިއޯ ލީކުވި ގޮތާ މެދު ގިނަ ބަޔަކު ދަނީ ސުވާލު އުފައްދަމުންނެވެ.
ނޭޕާލްގެ ސިމާރާ ސިޓީގައި ދުވަސްތަކެއް ވަންދެން ކުރިއަށްދިޔަ މުޒާހަރާތަކަށް ފަހު، އަނިޔާ ލިބުނު ކުއްޖާގެ އާއިލާއިން ސަރުކާރުގެ ވަޒީރުންނާ ބައްދަލުކޮށް، މިދިޔަ ހަފުތާ ބަންދުގައި ވަނީ ލިޔުމުން އެއްބަސްވުމެއް ގާއިމުކޮށްފަ އެވެ.
މި އެއްބަސްވުމުގެ ދަށުން، ސީރިއަސް ކުށްތަކާ ގުޅޭ ގާނޫނުތައް މުރާޖައާ ކުރުމަށާއި، މަރުވި ކުއްޖާގެ ހަނދާނުގައި ބިނާއެއް ބިނާކުރުމަށް ސަރުކާރުން ވަނީ ވައުދުވެފަ އެވެ.
މި ހާދިސާއާ ގުޅިގެން، ކުޑަކުދިން ކުރާ ކުށްތަކާމެދު ނޭޕާލުން އަމަލުކުރާ ގޮތާ މެދު ބޮޑު ބަހުސެއް ވަނީ އުފެދިފަ އެވެ. އެގޮތުން ރޭޕް ނުވަތަ މަރުގެ ކުށް ސާބިތުވާ ކުޑަކުދިންނަށް ވެސް މިހާރަށް ވުރެ ހަރުކަށި އަދަބު ދިނުމަށް ބައެއް ކެމްޕޭނަރުން ދަނީ ބާރުއަޅަމުންނެވެ.
ނޭޕާލް ފުލުހުންގެ ތަފާސްހިސާބުތަކުން ދައްކާ ގޮތުގައި، 2017 ވަނަ އަހަރުގެ ޖުލައި މަހުން ފެށިގެން 2025 ވަނަ އަހަރުގެ ޖުލައި މަހުގެ ނިޔަލަށް ރޭޕް ކުރުމާއި ޖިންސީ ގޯނާ ކުރުމުގެ 25،500 އަށްވުރެ ގިނަ މައްސަލަ ވަނީ ހުށަހަޅާފަ އެވެ.
މި މައްސަލަތަކުގެ ތެރެއިން 3،200 އަށްވުރެ ގިނަ މައްސަލައަކީ އުމުރުން 10 އަހަރުން ދަށުގެ އަންހެން ކުދިންނަށް ކުރި ޖިންސީ އަނިޔާގެ މައްސަލަތައް ކަމަށް ވެސް ފުލުހުން ބުނެފައިވެ އެވެ.
