ޕާކިސްތާނުގެ ބްރޯޑް ޕީކް ފަރުބަދައިގައި ކުރިމަތިވި އެވަލާންޗް ހާދިސާގައި މަރުވި 10 މީހުންގެ ތެރޭގައި އިނގިރޭސިވިލާތާއި ނޭޕާލަށް ނިސްބަތްވާ މަޝްހޫރު ނިރްމަލް ޕުރުޖާ ހިމެނޭ ކަމަށް އޭނާގެ ކުންފުނިން ބުނެފި އެވެ.
އެލީޓް އެކްސްޕެޑިޝަންސް ކުންފުނިން ބުނީ، އުމުރުން 43 އަހަރުގެ ޕުރުޖާ މިދިޔަ ބުރާސްފަތި ދުވަހު ހިނގި މި ހާދިސާގައި މަރުވެފައިވާކަން ކަށަވަރުވެފައިވާ ކަމަށެވެ.
ނޭޕާލަށް އުފަންވެ، ފަހުން އިނގިރޭސި ސިފައިންގެ ތެރޭގައި ހިދުމަތް ކުރި ޕުރުޖާ މަޝްހޫރުވެފައިވަނީ 2019 ވަނަ އަހަރު ދުނިޔޭގެ އެންމެ އުސް 14 ފަރުބަދައަށް އެންމެ ހަ މަސް ދުވަހުގެ ތެރޭގައި އަރައި ނިންމާލުމުންނެވެ.
ޕާކިސްތާނުގެ އޮފިޝަލުން މީގެ ކުރިން ބުނީ، ޕުރުޖާގެ ޓީމުގައި ހިމެނޭ ތިން މީހެއްގެ ހަށިގަނޑު ފެނިފައިވާ ކަމަށެވެ. އޭގެ ތެރޭގައި ހިމެނެނީ އެމެރިކާގެ މެލޮރީ ގެއިސް އާއި، އޮމާންގެ ނަދީރާ އަހުމަދު އަބްދުﷲ އަލް ހާތީގެ އިތުރުން ނޭޕާލްގެ ޕޫރް ބަހާދުރު ގުރުންގް އެވެ.
ޕުރުޖާގެ މަރުގެ ހަބަރު ނޭޕާލްގެ ބޮޑުވަޒީރު ބަލެންދްރަ ޝާހު ވެސް ވަނީ ކަށަވަރުކޮށްދެއްވާފަ އެވެ. ބޮޑުވަޒީރު ވިދާޅުވީ، ޕާކިސްތާނުގެ ކަރަކޯރަމް ފަރުބަދަ ރޭންޖުގައި ހިނގި މި ހާދިސާގައި ދުނިޔޭގެ ރެކޯޑް އޮތް ނިރްމަލް ޕުރުޖާ ހިމެނޭހެން ނޭޕާލްގެ ހަ މީހަކާއި ބޭރުގެ ހަތަރު މީހަކު މަރުވުމަކީ ލިބުނު ވަރަށް ބޮޑު ސިހުމެއް ކަމަށެވެ.
ކަރަކޯރަމް ރޭންޖުގައި ހިމެނޭ، އުސްމިނުގައި 8،047 މީޓަރު (26،400 ފޫޓު) ހުންނަ ދުނިޔޭގެ 12 ވަނައަށް އެންމެ އުސް ފަރުބަދަ ކަމަށްވާ ބްރޯޑް ޕީކަށް ކުރިމަތިވި އެވަލާންޗްގެ (ކުއްލިއަކަށް ބިންގަނޑާއެކު ސްނޯ ފޭބުން) ސަބަބުން ގެއްލުނު މީހުން ހޯދުމުގެ މަސައްކަތް ޕާކިސްތާނުގެ ޓީމުތަކުން ދަނީ ކުރަމުންނެވެ.
އެކި ގައުމުތަކުގެ މީހުން ހިމެނޭ މި ޓީމުގެ އިސްވެރިއަކީ ޕުރުޖާ އެވެ. "ނިމްސް" ގެ ނަމުން މަޝްހޫރުވި ޕުރުޖާ ދުނިޔޭގެ ސަމާލުކަމަށް އައީ 2019 ވަނަ އަހަރު، ދުނިޔޭގައި 8،000 މީޓަރަށް ވުރެ އުސް 14 ފަރުބަދައަށް އެންމެ 189 ދުވަހުގެ ތެރޭގައި އަރައި، ކުރީގެ ރެކޯޑަށް ވުރެ ހަތް އަހަރު އަވަހަށް އެ މަސައްކަތް ނިންމާލުމުންނެވެ.
އޭނާގެ މި ދަތުރާ ގުޅޭ ގޮތުން ނެޓްފްލިކްސް އިން އުފެއްދި ޑޮކިއުމެންޓްރީ "14 ޕީކްސް: ނަތިން އިޒް އިމްޕޮސިބަލް" އޭގެ ދެ އަހަރު ފަހުން ރިލީޒްކުރުމާއެކު، އޭނާއަކީ ދުނިޔޭގެ ފެންވަރުގައި ބޮޑު މަގުބޫލުކަމެއް ހޯދި ފަރާތެކެވެ.
