ސައުދީ، ތުރުކީ އަދި ޕާކިސްތާނުން ދިފާއީ އިއްތިހާދެއް އުފައްދައިފި

ސައުދީ އަރަބިއްޔާ އާއި ތުރުކީގެ އިތުރުން ޕާކިސްތާނުން ގުޅިގެން ދިފާއީ އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގެ ދަށުން އެ ތިން ގައުމުގެ ތެރެއިން ކޮންމެ ގައުމަކަށް ދޭ ހަމަލާއަކީ ވެސް، ތިން ގައުމަށް ގުޅިގެން ދޭ ހަމަލާއެއްގެ ގޮތުގައި ބަލާނެ ކަމަށް ވަނީ ކަނޑައަޅާފަ އެވެ.

މި އެއްބަސްވުން އިއުލާންކޮށްފައިވަނީ ސައުދީ އަރަބިއްޔާގެ މައްކާގައި، ސައުދީ ވަލީއަހުދު މުހައްމަދު ބިން ސަލްމާން އާއި ތުރުކީގެ ރައީސް ރަޖަބު ތައްޔިބު އުރުދުޣާން އަދި ޕާކިސްތާނުގެ ބޮޑުވަޒީރު ޝެހްބާޒް ޝަރީފް ބޭއްވި ބައްދަލުވުމެއްގަ އެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިޒްރޭލުން އީރާނަށް ދިން ހަމަލާތަކާ ގުޅިގެން، އީރާނާއި އެ ގައުމަށް ތާއީދުކުރާ ފަރާތްތަކުން ވަނީ ސައުދީ އަރަބިއްޔާ އާއި ގަލްފުގެ އެހެން ގައުމުތަކުގެ އެކި ތަންތަނަށް ހަމަލާދީފަ އެވެ. 

މައްކާގައި ސޮއިކުރި މި އެއްބަސްވުމާ ގުޅިގެން އީރާނުން ވަނީ ވަރަށް ބޮޑަށް ފާޑުކިޔާފަ އެވެ. އެގޮތުން އީރާނު ޕާލަމެންޓުގެ އިސް މެންބަރަކު ވިދާޅުވީ، މި އެއްބަސްވުމުގެ ސަބަބުން ސައުދީ އަރަބިއްޔާއަށް އެއްވެސް ފައިދާއެއް ނުކުރާނެ ކަމަށެވެ.

އީރާނުގެ ނޭޝަނަލް ސެކިއުރިޓީ ކޮމިޝަނުގެ މެންބަރު އިބްރާހިމް ރެޒާއީ އޭނާގެ އެކްސް އެކައުންޓުގައި ލިޔުއްވާފައިވަނީ، ތުރުކީ އާއި ޕާކިސްތާނާއެކު ކަރުދާހުގައި ސޮއިކުރާ އެއްބަސްވުމަކުން ސައުދީއަށް ސަލާމަތްތެރިކަން ނުލިބޭނެ ކަމަށެވެ. އަދި އެތައް އަހަރެއް ވަންދެން އެމެރިކާއިން ސައުދީގެ މަންފާ ނެގި ނަމަވެސް، އެމެރިކާގެ ފަރާތުން ވެސް ސައުދީއަށް ރައްކާތެރިކަން ލިބިފައިނުވާކަން ސައުދީން ދަންނަންޖެހޭނެ ކަމަށް އޭނާ ވިދާޅުވި އެވެ.

ސައުދީ އަރަބިއްޔާ އާއި ޕާކިސްތާނުން ވަނީ މިދިޔަ އަހަރުގެ ތެރޭގައި ވެސް ދިފާއީ އެއްބަސްވުމެއް އިއުލާންކޮށްފަ އެވެ.

މައްކާގައި އަލަށް ސޮއިކުރި މި ދިފާއީ އެއްބަސްވުމާއެކު، އިސްލާމީ ދުނިޔޭގެ އެންމެ ބާރުގަދަ ތިން ގައުމު ވަނީ އެއް ގައުމު އަނެއް ގައުމަށް ދިފާއީ ގޮތުން އެހީތެރިކަން ފޯރުކޮށްދިނުމުގެ ޔަގީންކަން ދީފަ އެވެ.

މި ތިން ގައުމުން ނެރުނު ގުޅިފައިވާ ބަޔާނެއްގައި ބުނެފައިވަނީ، މި އެއްބަސްވުމުގެ ބޭނުމަކީ ކުރިމަތިވެދާނެ އުދުވާނީ ހަމަލާތަކުން ގުޅިގެން ދިފާއުވުން ވަރުގަދަކުރުން ކަމަށެވެ. އަދި މި ތިން ގައުމުގެ ތެރެއިން ކޮންމެ ގައުމަކަށް ހަތިޔާރު ބޭނުންކޮށްގެން ދޭ ހަމަލާއަކީ، ތިން ގައުމަށް ދޭ ހަމަލާއެއްގެ ގޮތުގައި ބަލާނެ ކަމަށް ވެސް އެ ބަޔާނުގައި ބުނެފައިވެ އެވެ.