މިއުނިކް (ޖުލައި 31) - އަންނަ އަހަރު ފުޓްބޯޅަ އިން ރިޓަޔާކުރުމުގެ ފުރުސަތު ބޮޑު ކަމަށް ބަޔާން މިއުނިކަށް ކުޅޭ ޖަރުމަނުގެ ގޯލްކީޕަރު، މެނުއަލް ނޯޔާ ބުނެފި އެވެ.
އުމުރުން 40 އަހަރުގެ ނޯޔާ މިދިޔަ ސީޒަނަށް ފަހު ބަޔާންގެ ކޮންޓްރެކްޓް އާ ކުރިއިރު، އޭނާ ވަނީ ގައުމީ ޓީމަށް ކުޅުން ހުއްޓާލަން ނިންމި ނިންމުން އުވާލައި، ދާދި ފަހުން އެމެރިކާ، މެކްސިކޯ އަދި ކެނަޑާގައި ބޭއްވި ވޯލްޑް ކަޕްގައި ޖަރުމަނު ޓީމަށް ކުޅެފަ އެވެ. ވޯލްޑް ކަޕްގެ ގަދަ 32 ބުރުގައި ޕެރަގުއޭ އަތުން ބަލިވެ، ޖަރުމަނު މުބާރާތުން ކެޓިއިރު، އެ މެޗަށް ފަހު، ނޯޔާ ވަނީ، ތިން އަހަރު ތެރޭ، ދެ ވަނަ ފަހަރަށް ގައުމީ ޓީމުން ރިޓަޔާކޮށްފަ އެވެ.
އަނިޔާގެ މައްސަލަތަކުގެ ސަބަބުން މިދިޔަ ދެ ސީޒަނުގައި ވެސް ގިނަ މެޗުތަކެއް ގެއްލުނު ނޯޔާ ބުނީ، ކުރިއަށް އޮތް ސީޒަނަކީ އޭނާގެ ފަހު އަހަރަށް ވުން ވަރަށް ގާތް ކަމަށެވެ.
"(މި ސީޒަނަށް ފަހު) އަހަރެން ރިޓަޔާކުރާނެ ކަމަށް ފެންނަނީ. 85 ޕަސެންޓް ކަންކަން ހިނގި ގޮތަށް ބަލާއިރު އަހަރެން ރިޓަޔާކުރުން އޮތް މިދިޔ ސީޒަނަށް ފަހު ވެސް. އެކަމަކު، ބަޔާންގައި މިހާރު އޮތް ސްކޮޑާއި ޓީމުގައި ތިބި ސްޓާފުންނާ އެކު މަސައްކަތް ކުރުން ވީ ވަރަށް ގަޔާވާ ކަމަކަށް،" ނޯޔާ ބުންޏެވެ.
މިދިޔަ ސީޒަނުގައި ބަޔާނުން ވަނީ ޖަރުމަނުގެ ހުރިހާ މުބާރާތެއް ކާމިޔާބުކޮށްފަ އެެވެ. ޗެމްޕިއަންސް ލީގުގެ ސެމީ ފައިނަލުން ބަޔާން ކެޓީ އެ މުބާރާތުގެ ޗެމްޕިއަންކަން ޖެހިޖެހިގެން ދެ ފަހަރު ހޯދި ޕީއެސްޖީ އަތުންނެވެ.
ނޯޔާ އަށް މިދިޔަ ސީޒަނުގެ ގިނަ މެޗުތަކެއް ގެއްލުނުއިރު، ބަދަލުގައި ކުޅެން އަރައި، ދެ ވަނަ ކީޕަރު، ޖޯނަސް އާބިގް ވަނީ ރަނގަޅު ކުޅުމެއް ދައްކައިފަ އެވެ. ނޯޔާ ބުނީ، މެޗުތަކުގައި ކުޅެނީ މިއީ އެންމެ ފަހު މެޗޭ ހިތަށް އަރުވައިގެން އެ ވިސްނުމުގައި ނޫން ކަމަށެެވެ.
"އެ ކަހަލަ ވިސްނުންތަކެއް ނުގެންގުޅެން. އަބަދުވެސް ޓީމު މޮޅުކޮށްދެވޭތޯ މަސައްކަތް ކުރަނީ. ކޮންމެ ވެސް ހިސާބަކުން ރިޓަޔަކުރަން ޖެހޭނެކަން އަބަދުވެސް ވިސްނަން،" ނޯޔާ ބުންޏެވެ.
ޝާލްކާ ދޫކޮށް ނޯޔާ، ބަޔާނަށް ސޮއިކުރީ 2011 ވަނަ އަހަރު އެވެ. ނޯޔާ، ބަޔާނާ އެކު މި ފަަހަރު ކޮންޓްރެކްޓް އާ މި ކުރީ އެމެރިކާ އާއި ސައުދީ އަރަބިއްޔާގެ ކްލަބްތަކުގެ ހުށަހެޅުންތަކެއް ދޫކޮށްލައިފަ އެވެ.
ހަމުގެ ކެންސަރަށް ތިން ފަހަރު ފަރުވާ ހޯދި ނޯޔާ ވަނީ، ބަޔާނާ އެކު، ދެ ޗެމްޕިއަންސް ލީގު ހޯދުމުގެ އިތުރުން 13 ފަހަރު ޖަރުމަނު ލީގު ތަށި ހޯދައިފަ އެވެ. އަދި، ބަޔާނާ އެކު، ނޯޔާ ހޯދި ތަށިތަކުގެ ޖުމްލަ އަކީ، 33 ޓްރޮފީ އެވެ.
