ރާއްޖޭގެ ކައުންސިލްތަކުން ވަކި ސަރުކާރުތަކެއް ގޮތަށް އޮޕަރޭޓުކޮށް، މައި ސަރުކާރުން ހިންގަން ނިންމާ ތަރައްގީގެ މަޝްރޫއުތަކަށް ހުރަސްއަޅާ ކަމަށް ވެރިކަން ކުރާ ޕީއެންސީގެ މެންބަރުން ވިދާޅުވެއްޖެ އެވެ.
ކައުންސިލްތަކުން ބަލަހައްޓާ ބިންތައް ބޭނުންއިރަކު، ސަރުކާރަށް ނެގޭ ގޮތަށް އޮތް އިސްލާހު ފާސްކުރުމަށް ގޮވާލައި ސަރުކާރު އަޑީގައި އޮވެގެން މަޖިލީހަށް ހުށަހެޅި ޕެޓިޝަނަށް ބަހުސްކުރައްވަމުން ޕީއެންސީ މެންބަރުން ވަނީ ކައުންސިލްތަކަށް ވަރަށް ބޮޑަށް ފާޑުވިދާޅުވެފަ އެވެ.
މަޖިލީހުގައި މިއަދު ބަހުސްކުރައްވަމުން އޭދަދުށީ ދާއިރާގެ މަޖިލިސް މެންބަރު، އަހުމަދު ސަލީމް ވިދާޅުވީ ރާއްޖޭގައި އޮންނަނީ ޔުނިޓަރީ ދައުލަތެއްކަން ބައެއް ކައުންސިލްތަކުން ހަނދާން ނައްތާލައިފައިވާ ކަމަށެވެ.
"އެ ޔުނިޓަރީ ދައުލަތް ބަދަލުވާ ކަހަލަ ގޮތަކަށް ބައެއް ކައުންސިލްތަކަށް ހީވާކަހަލަ ތިމަންނަމެން މިއީ ވަކި ސަރުކާރެކޭ އިއްޒަތްތެރި ރައީސް، ތިމަންނަމެންނަކީ ވަކި ސަރުކާރެކޭ،" ސަލީމް ވިދާޅުވި އެވެ.
ކައުންސިލްތަކުގެ ނުފޫޒުން ރަށްރަށުގެ މެދުގައި ބައިބައިވުން އުފައްދާ ކަމަށް ވެސް އޭނާ ތުހުމަތުކުރެއްވި އެވެ. ގައުމު އިސްލާހުކުރުމަށްޓަކައި އަޅަންޖެހޭ ހުރިހާ ފިޔަވަޅެއް އެޅުމުގެ ބާރު ރައީސުލްޖުމްހޫރިއްޔާއަށް ލިބިގެންވާ ކަމަށް އޭނާ ވިދާޅުވި އެވެ.
"އަޅުގަނޑުމެން ކަންބޮޑުވަނީ މިހެން ދަމުންދަމުން ގޮސް ކުރިއަށް އޮތް 10 އަހަރުދުވަހުގެ ތެރޭގައި ކޮންމެ އަތޮޅެއް ވަކީން، ތިމަންނަމެންނަކީ ވަކި އަތޮޅެކޭ، ތިމަންނަމެންނަށް މައި ސަރުކާރުން ބާރެއް ނުފޯރުވޭނެޔޭ، މި ހިސާބަށް މި ކަންކަން ހިނގައިދާނެ،" ސަލީމް ވިދާޅުވި އެވެ.
އެ މައުލޫގައި ވާހަކަދައްކަވަމުން ދިއްދޫ ދާއިރާގެ މަޖިލިސް މެންބަރު، އަބްދުލްލަތީފް މުހައްމަދު ވިދާޅުވީ ރާއްޖޭގެ ވަރަށް ގިނަ ރަށްރަށުގެ ކައުންސިލްތަކާ ހެދި ސަރުކާރުން ހިންގަން ބޭނުންވާ ތަރައްގީގެ މަޝްރޫއުތައް ނުހިންގިފައި އެބަހުރި ކަމަށެވެ.
"ސަރުކާރުން ކުރަންޖެހޭ ވަރަށް ގިނަ މަސައްކަތްތައް، ތަރައްގީއަށްޓަކައި ކުރަންޖެހޭ ވަރަށް ގިން ކަންތައްތައް ނުކުރެވިފައި އެބަހުރި އެ ރަށްރަށުގެ ބިންތައް ނުދީގެން، ނުވަތަ ހަމަޖައްސައިނުދީގެން." ލަތީފް ވިދާޅުވި އެވެ.
ކައުންސިލްތަކުން ބަލަހައްޓާ ބިންތައް ސަރުކާރަށް ނެގޭގޮތަށް ހުށަހެޅި ބިލު ޕީއެންސީގެ ފުރިހަމަ ތާއީދާއެކު ބަލައިގެންފި
ސަރުކާރުގެ މަޝްރޫއުތައް ހިންގުމަށްޓަކައި ކައުންސިލްތަކުގެ އިހުތިސާސުން ބިންތައް ވަކިކޮށް ސަރުކާރަށް ނެގޭގޮތަށް ލާމަރުކަޒީ ގާނޫނަށް ހުށަހެޅި އިސްލާހު މަޖިލީހުން މިއަދު ބަލައިގެންފިއެވެ.
ސަރުކާރަށް ތާއީދުނުކުރާ ކައުންސިލަރުންގެ މެޖޯރިޓީ އޮތް ކައުންސިލްތަކުން ސަރުކާރަށް ޖެއްސުންކޮށް ފުރައްސާރަ ކުރަމުންދާ ކަމަށް ވެސް ލަތީފް ވިދާޅުވި އެވެ.
ރަށްރަށުގެ ބިންތައް ސަރުކާރަށް ނެގޭ ބިލާ އެއްކޮޅަށް ސަރުކާރު އަޑީގައި އޮވެގެން މަޖިލީހަށް ދެވަނަ ޕެޓިޝަނެއް ހުށަހެޅީ އެއް ކަމެއްގައި އެއް ފިޔަވަޅެއް އަޅަން ގޮވާލައި ކިތަންމެ ގިނަ ޕެޓިޝަނެއް ވެސް ހުށަހެޅޭ ގޮތަށް ރައްޔިތުންގެ މަޖިލީހުގެ ގަވާއިދު ބަދަލުކުރުމަށްފަހު އެވެ.
މަޖިލިސް ގަވާއިދަށް އެ ބަދަލު ގެނައީ ރަށްރަށުގެ ބިންތައް ސަރުކާރަށް ނެގޭ ބިލާ އެއްކޮޅަށް ސަރުކާރު އަޑީގައި އޮވެގެން ފުރަތަމަ ހުށަހެޅި ޕެޓިޝަނަށް 855 މީހުންގެ ސޮއި ހަމަވުމާއެކު، އެ ޕެޓިޝަން ހުށަހެޅި ބޭފުޅާއަށް އޮޅިގެން ވަނީ އެ ޕެޓިޝަން ކޮމިޓީއަށް ފޮނުވުމުންނެވެ.
ރަށްރަށުގެ ބިންތައް ސަރުކާރަށް ނެގޭ ގޮތަށް މަޖިލީހަށް ހުށަހަޅާފައިވާ ބިލު އޮތް ގޮތަށް ފާސްކުރުމަށް ގޮވާލައި މަޖިލީހަށް ޕެޓިޝަނެއް ހުށަހެޅުމުގެ މަސައްކަތް ސަރުކާރުން ފެށީ، އެ ބިލާ ދެކޮޅަށް ހުށަހެޅި ޕެޓިޝަނެއްގައި ސޮއި ހަމަކޮށް މަޖިލީހުގެ ތަޅުމާ ހަމައަށް މައްސަލަ ގޮސްފައި ވަނިކޮށެވެ. ސޯޝަލް މީޑިއާ އެކްޓިވިސްޓު މިދުއަމް ސައުދު ހުށަހެޅި ޕެޓިޝަނުގައި އޮތީ އެ ބިލަކީ ލާމަޒުކަޒީ ގާނޫނޫގެ ރޫހާ ހިލާފު ބިލެއް ކަމަށް ބުނެ އެ ބިލު އަނބުރާ ގެންދިޔުމަށް ގޮވާލައިފަ އެވެ.
