އޮޑި ސްޕޯޓްސް ކްލަބްގެ ކޯޗަކަށް ޔުއެފާ ޕްރޯ ލައިސަންސް ހާސިލްކޮށްފައިވާ، ޕޯޗުގަލްގެ ރުއީ ގްރެގޯރިއޯ ހަމަޖައްސައިފި އެވެ.
އުމުރުން 57 އަހަރުގެ ރުއީ ގްރެގޯރިއޯ ޓީމާ ގުޅެންދެން، އޮޑީގެ ހެޑް ކޯޗެއްގެ ގޮތުގައި މަސައްކަތްކުރަމުން އަންނަނީ އެސިސްޓަންޓް ކޯޗު، އަހުމަދު ފައްރާހު (ފައްރަ) އެވެ.
އޮޑި ސްޕޯޓްސް ކްލަބުން ބުނީ، އާ ކޯޗު ވަރަށް އަވަހަށް ޓީމާ ގުޅޭނެ ކަމަށެވެ.
ރުއީ ގްރެގޯރިއޯ ވަނީ ކޯޗިންގެ އެކި ޕްރޮޖެކްޓްތަަކުގައި، ޕޯޗުގަލް، މިޔަންމާ، ލެބަނަން، ސައުދީ އަރަބިއްޔާ، އިންޑިއާ އަދި އެންގޯލާގައި މަސައްކަތްކޮށްފަ އެވެ.
އެ ގޮތުން، މިޔަންމާގެ ޑްރެގަން ސްޓާ ޔުނައިޓެޑްގެ ހެޑް ކޯޗަކަށް އެންމެ ފަހުން މަސައްކަތްކުރި ރުއީ ގްރެގޯރިއޯ ވަނީ ލެބަނަންގެ ސަލާމް ޒްގާތާގެ ކޯޗުކަން ކުރުމުގެ އިތުރުން، ގާނާގެ ބެރަކޫމް ޗެލްސީގެ ކޯޗަކަށް ވެސް މަސައްކަތްކޮށްފަ އެވެ. ސައުދީ ޕްރޯ ލީގުގައި އަލް ތާވޫން ވާދަކުރިއިރު އެސިސްޓަންޓް ކޯޗަކަށް ހުރި ރުއީ ގްރެގޯރިއޯ ވަނީ މީގެ ކުރިން ތިން ސީޒަނެއްގައި ބެންގަލޫރުގެ ޓެކްނިކަލް ޑިރެކްޓަރެއްގެ ގޮތުގައި ވެސް މަސައްކަތްކޮށްފަ އެވެ.
ޕޯޗުގަލްގެ އެކި ޑިވިޝަންތަކުގެ ކްލަބްތަކުގައި މަސައްކަތްކުރި ރުއީ ގްރެގޯރިއޯ ވަނީ އެންގޯލާގެ ރެކްރެޓީވޯ ޑަ ކާލާގައި ވެސް މަސައްކަތްކޮށްފަ އެވެ.
ދެ ވަނަ ޑިވިޝަނުގެ ޗެމްޕިއަންކަން ހޯދުމަށް ފަހު، މިދިޔަ ސީޒަނުގައި އަލަށް ފުރަތަމަ ޑިވީޝަނުގައި ވާދަކުރި އޮޑިން ފުރަތަމަ ހަމަޖެއްސި ކޯޗަކީ، އޮސްޓްރޭލިއާގެ އިއަން އެންޑްރޫ ގިލަން އެވެ. އެ ޓީމު ގޮވައިގެން އެންޑްރޫ ފަރިތަކުރުންތައް ކުރިއަށްގެންދިޔަ ނަމަވެސް، އަމިއްލަ ކަމެއްގައި ފުރަން ޖެހުމުން މިދިޔަ އަހަރު މެއި މަހު ޓީމާ ވަކިވި އެވެ. މެއި މަހު ބޭއްވި ޕްރީ ސީޒަން މުބާރާތް، އެފްއޭއެމް ލީގު ކަޕްގައި އޮޑި އަށް ކޯޗުކޮށްދިނީ، އެސިސްޓަންޓަކަށް ހުރި، ފަރުހާދު އިސްމާއިލް (ފަރޭ) އެވެ. އެ މުބާރާތުގެ ފައިނަލުގައި އޮޑި ކުޅުނެވެ.
އޭގެ ފަހުން، އޮޑިން ވަނީ ދިވެހި ޕްރިމިއާ ލީގު ފެށުމުގެ ކުރިން، ސްޕެއިން ފުޓްބޯޅަ ފެޑެރޭޝަނުގެ ގައުމީ ލެވަލްގެ ކޯޗެއްގެ ގޮތުގައި، 2013 ގައި ކޯޗިން އަށް ނުކުތް ގާސިއާ ގެނެސްފަ އެވެ. ގާސިއާގެ ކޯޗުކަމުގައި ލީގުގެ ދެ ވަނަ ހޯދައި، އޮޑިން ޕްރެޒިޑެންޓްސް ކަޕްގެ ޗެމްޕިއަންކަން ހޯދި އެވެ. އެކަމަކު، އެފްއޭ ކަޕްގެ ކުއާޓާ ފައިނަލުން ނިއު އަތުން ބަލިވީ އެވެ. އޮޑިން ވަކިވެ ގާސިއާ ހަވާލުވެފައިވަނީ، އޮމާން ލީގުގެ ސަހާމް ކްލަބާ އެވެ.
އަށާރަ އަހަރަށް ފަހު، ރާއްޖޭގެ ފުޓްބޯޅަ ސީޒަނަށް ކަޕް ވިނާސް ކަޕް އެނބުރި އައިސްފައިވާއިރު، އެ މުބާރާތުގެ ދެ މެޗެއް ވަނީ ކުޅެފަ އެވެ. އެ ގޮތުން، އެ މުބާރާތުގައި ކުޅޭ ހަތަރު ޓީމުން ވެސް މި ސީޒަނުގެ ކުރިއަށް އޮތްތަނުގައި ނުކުންނަނީ ބިދޭސީ ކޯޗުންނާ އެކު އެވެ.
އެ ގޮތުން، މާޒިޔާގައި ހުރީ، ޗެކް ރިޕަބްލިކްގެ ކޯޗު، ތޯމްސް ޓްރޫޗާ އެވެ. ނިއުގައި، ސްޕެއިނުގެ ފްރަންސިސްކޯ މެނުއަލް ކައިންޒޯސް (އަންދްރޭ) ހުރިއިރު، ބުރުގައި ހުރީ، ސްޕެއިނުގެ ކޯޗު، ކްރިސްޓިއަން ރޮޑްރިގޭޒް އެވެ. އޮޑީގެ ކޯޗު، ރުއީ ގްރެގޯރިއޯ ވެސް ވަރަށް އަވަހަށް އެ ޓީމާ ގުޅޭނެ އެވެ.
ކަޕް ވިނާސް ކަޕްގައި ކުޅުނު ފުރަތަމަ ދެ މެޗަށް ބަލާއިރު، ނިއު އިން ވަނީ 5-0 އިން ބުރު ބަލިކޮށްފަ އެވެ. އޮޑި އަތުން މާޒިޔާ މޮޅުވީ 2-1 އިންނެވެ.
މުބާާރާތުގެ ދެ ވަނަ މެޗުތައް މިއަދު ކުރިއަށްދާއިރު، ހަވީރު ކުޅޭ މެޗުގައި މާޒިޔާ އިން ބުރުއާ ބައްދަލުކުރާނެ އެވެ. އަދި، މިރޭ އޮޑިން ކުޅޭނީ ނިއުއާ އެވެ.
