ތިލަފުށީ ވިޔަފާރި ބަނދަރުގެ ވެއާހައުސްތަކާއި އިދާރީ އިމާރާތްތައް ހިމެނޭހެން އެ ބަނދަރަށް ބޭނުންވާ ތަންތަން ތަރައްގީކުރަން ޝައުގުވެރިކަން ހުރި ވިޔަފާރިތަކަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު އެ ފުރުސަތު ހުޅުވާލައިފި އެވެ.
އެމްޕީއެލްއިން އިއުލާންކޮށްފައިވާ އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ދައުވަތުގައި ވަނީ ބަނދަރަށް ބޭނުންވާ 24 އިމާރާތެއް ތަރައްގީކުރަން ބޭނުންވާ ވިޔަފާރިތަކަށް އެ ފުރުސަތު އެބައޮތް ކަމަށް ބުނެފަ އެވެ.
ތިލަފުށީ ބަނދަރުގައި ތަރައްގީކުރަން ބޭނުންވާ އިމާރާތްތަކުގެ ތެރޭގައި އަށް ފަންގިފިލާގެ އެޑްމިނިސްޓްރޭޓިވް އިމާރާތެއް ހިމެނެ އެވެ. ގާތްގަނޑަކަށް 7000 އަކަފޫޓުގެ ބިމެއްގައި އަޅާ މި އިމާރާތް ތަރައްގީކުރަނީ އަށް ފަންގިފިލާއަށެވެ. އެ ތަނުގައި ތަރައްގީކުރާ އެންމެ ބޮޑެތި އިމާރާތްތަކަކީ 78،000 އަކަފޫޓުގެ ސީއެފްއެސް ވެއާހައުސް އާއި 44،000 އަކަފޫޓުގެ ވާކްޝޮޕް ކޮމްޕްލެކްސް އާއި 40،000 އަކަފޫޓުގެ ޖެނެރަލް ކާގޯ ވެއާހައުސް ހިމެނެ އެވެ.
އޭގެ އިތުރުން، 200 މީހުންގެ ޖާގައިގެ އެކޮމޮޑޭޝަން އިމާރާތަކާއި ބޮންޑަޑް ވެއާހައުސްތަކާއި ވެހިކަލްތަކަަަށް ހިދުމަތްދޭ އިމާރާތްތަަކާއި ބަނދަރުގެ ސަލާމާތާއި ރައްކާތެރިކަމާއި ހިދުމަތްތަކާއި ވަސީލަތްތައް ގާއިމުކުރަން ބޭނުންވާ ހުރިހާ އިމާރާތްތަކެއް އެތަނުގައި ހުރެ އެވެ.
އެމްޕީއެލްއިން ވަނީ މި ތަންތަން ތަރައްގީކުރަން ބޭނުންވާ ވިޔަފާރިތަކުން އަމިއްލައަށް ނޫނީ އެހެން ކުންފުނިތަކާ ގުޅިގެން ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 10 ވަނަ ދުވަހާ ހަމައަށް ހުޅުވާލާފަ އެވެ.
އެމްޕީއެލްއިން ބުނަނީ ތިލަފުށީ ބަނދަރުގެ މަސައްކަތް ނިމޭއިރު، އެ ބަނދަރުގައި 1000 މީޓަރަށް ވުރެ ދިގު އިންޓަނޭޝަނަލް ކީ ވޯލްއަކާއި މާލޭގެ ނޯތު ހާބަރާއި ސައުތު ވެސްޓު ހާބަރު ބޭނުންކުރާ އުޅަނދުފަހަރަށް ހާއްސަކޮށްގެން 2000 މީޓަރަށް ވުރެން ދިގު ކީވޯލް ހިމެނޭ ގޮތަށް ޑޮމެސްޓިކް ޓާމިނަލެއް ހުންނާނެ ކަމަށެވެ.
ތިލަފުށީ ވިޔަފާރި ބަނދަރުގެ އުސްއަލިތައް
- 225 މިލިއަން ޑޮލަރު (3.4 ބިލިއަން ރުފިޔާ) ގެ ޕްރޮޖެކްޓެއް
- ބަނދަރު ތަރައްގީކުރަނީ 10 ހެކްޓަރުގެ ސަރަހައްދެއްގައި
- އެންމެ ބޮޑެތި އާގުބޯޓުފަހަރަށް ވެސް މަގަތުފާލަމާ ކައިރިކުރެވޭނެ
- ބޭރު އެންކަރުގައި ބާއްްވައިގެން ކޮންޓޭނަރު ބޭލުން ހުއްޓާލާނެ
- ބޯޓު ހުސްކުރަން ނަގާ ވަގުތު ހަތް ދުވަހުން ދެ ދުވަހަށް މަދު ކުރެވޭނެ
- ގެންޓްރީ ކެރޭނާއި މޮބައިލް ހާބާ ކެރޭނު ފަދަ ޒަމާނީ ވަސީލަތްތައް ހުންނާނެ
ތިލަފުއްޓަށް ވިޔަފާރި ބަނދަރު ކުރުމުން މިހާރު ބޭނުންކުރަމުން އަންނަ 40 އަހަރު ވާން ގާތްވެފައިވާ މާލޭ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ދާއިމީ ހައްލެއް ލިބޭނެ ކަމަށް އެމްޕީއެލްއިން ބުންޏެވެ.
މި ބަނދަރު ފަރުމާކުރުމާއި ކީވޯލް ތަރައްގީކުރުން ފަަދަ މަސައްކަތްތައް ހަވާލުކޮށްފައި ވަނީ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ) އާ އެވެ. އޭގެ އިތުރުން އެމްޓީސީސީއާ ވެސް ބައެއް މަސައްކަތްތައް ވަނީ ހަވާލުކޮށްފަ އެވެ.
ސަރުކާރުން އަމާޒު ހިފާފައި ވަނީ އަންނަ އަހަރުގެ ނޮވެމްބަރު 11 ގައި ތިލަފުށީ ބަނދަރުގެ އޮޕަރޭޝަންތައް ފެށުމެވެ. ސަރުކާރުން މިހެން ބުނި ނަމަވެސް ކުރަން ހުރިހާ މަސައްކަތްތަކަށް ބަލާއިރު، އެ ތާރީހަށް ޕޯޓުގެ ބައެއް މަސައްކަތްތައް ނިންމުނަސް، މުޅި ޕޯޓު ނިމޭނެ ކަމަކަށް ނުބެލެވެ އެވެ.
