އަދަދު ނޫހުން ގެނެސްދިން "އައިޝާ" ޑޮކިއުމެންޓްރީއާ ގުޅިގެން ފުލުހުން ތަހުގީގުކުރަމުން އަންނަ ޖިނާއީ މައްސަލައިގެ ތުހުމަތުގައި ރައީސް އޮފީހުގެ މުވައްޒަފެއްގެ ޕާސްޕޯޓު ކޯޓު އަމުރެއްގެ ދަށުން ހިފަހައްޓައިފި އެވެ.
އަދަދު އަށް އެނގިފައިވާ ގޮތުގައި ރައީސް އޮފީހުގައި ކުރިން މަސައްކަތްކުރި އެ މުވައްޒަފުގެ ޕާސްޕޯޓް އަދި ޓްރެވަލް ޑޮކިއުމަންޓްތައް ހިފެހެއްޓީ އިއްޔެ އިން ފެށިގެން ޖުލައި 26، ގެ ނިޔަލަށެވެ.
އޭނާ ފުރުން މަނާކުރީ ފުލުހުންގެ އިންޓެލިޖެންސް ރިޕޯޓެއްގެ މައްޗަށް ބިނާކޮށެވެ. މައްސަލައިގެ ހަމައެކަނި ހެއްކަކަށް އޮތީ ވެސް ފުލުހުންގެ އިންޓެލިޖެންސް ރިޕޯޓެކެވެ.
ޑޮކިއުމަންޓްރީ މައްސަލައިގައި އަދަދު ނޫހުގެ ސީއީއޯ ހުސެއިން ފިޔާޒު މޫސާ އާއި އަދަދުގެ އެޑިޓަރު ހަސަން މުހައްމަދު ޕާސްޕޯޓު ވެސް ތިން މަސް ދުވަހަށް ވަނީ ހިފަހައްޓާފަ އެވެ.
އަދަދު އިން އައިޝާ ޑޮކިއުމެންޓްރީ ގެނެސްދިންތާ މަސް ދުވަސް ފަހުން، މި މައްސަލައިގައި ޖިނާއީ ތަހުގީގެއް ފެށީ އެ ޑޮކިއުމެންޓްރީގައި ރައީސްއަށް ކުރި ތުހުމަތުތަކާ ގުޅިގެން އިއްޔެ ރައީސް މުހައްމަދު މުއިއްޒުއާ ސުވާލުކުރި ހިސާބުންނެވެ. އެމަނިކުފާނު ދެއްވި ޖަވާބުގައި އެ ތުހުމަތުތައް ދޮގުކުރަމުން، އެ މައްސަލައިގައި ދައުވާކުރާނެކަމުގެ އިންޒާރު މުއިއްޒު ދެއްވި އެވެ.
ފުލުހުން ތުހުމަތުކުރަނީ އެ ޑޮކިއުމެންޓްރީގައި އަދަދު ނޫހުން މުއިއްޒުއަށް ގަޒްފުގެ ތުހުމަތުކޮށްފައިވާ ކަމަށެވެ. ކޯޓު އަމުރު ހޯދަމުން ފުލުހުން ބުނެފައި ވަނީ އެ ޑޮކިއުމެންޓްރީ ތައްޔާރުކުރުމުގައި އަދި ޕަބްލިޝްކުރުމުގައި ހަރަކާތްތެރިވި އެންމެންނަކީ ގަޒްފު ކުރުމުގެ ކުށުގެ ތުހުމަތުކުރެވޭ މީހުން ކަމަށެވެ.
މި މައްސަލައިގައި ކޯޓު އަމުރެއްގެ ދަށުން ފުލުހުން ވަނީ ރޭގެ ވަގުތެއްގައި އަދަދުގެ އޮފީސް ބަލައިފާސްކޮށް ގިނަ އަދަދެއްގެ އިލެކްޓްރޯނިކް ސާމާނު ގެންގޮސްފަ އެވެ.
ފުލުހުން އެތަކެތި ގެންދިޔައީ ގާނޫނާ ހިލާފަށް ކަމަށާއި ކޯޓު އަމުރުގައި އަދަދު ނޫހުގެ މުދާ ގެންދިޔުމުގެ އަމުރު ދީފައި ނެތް ކަމަށް އަދަދުގެ ގާނޫނީ ވަކީލުން ބުނެ އެވެ.
އައިޝާ ޑޮކިއުމަންޓްރީގައި ކޮށްފައިވާ ތުހުމަތުތައް މުއިއްޒު ވަނީ އިއްޔެ ދޮގު ކުރައްވާފަ އެވެ. މި ޑޮކިއުމެންޓްރީ ގެނެސްދީފައިވަނީ ވާހަކަތައް ކިޔައިދޭ މީހާއަކީ ކާކުކަން ނޭނގޭ ގޮތަށް އަޑު ބަދަލުކޮށްގެނެވެ.
