ރިސޯޓުތަކަށް ޑޮލަރުން ލިބޭ އާމްދަނީގެ 40 ޕަސެންޓު މާރުކުރަން މަޖުބޫރުކުރުމުން ބައެއް ވިޔަފާރިތައް ބަނގުރޫޓުވެދާނެ ކަމަށް ކުރީގެ އިކޮނޮމިކް މިނިސްޓަރު، ފައްޔާޒް އިސްމާއިލް މިއަދު ވިދާޅުވެއްޖެ އެވެ.
އެކްސްގައި ފައްޔާޒް ކުރެއްވި ޕޯސްޓެއްގައި ފަތުރުވެރިކަމުގެ ދާއިރާގެ މީހުންނާ މަޝްވަރާ ކުރުމެއްނެތި ސަރުކާރުން ނިންމާފައިވާ ނިންމުންތަކަކީ ވަރަށް ނުރައްކާތެރި ނިންމުންތަކެއް ކަމަށެވެ.
ފަތުރުވެރިކަމަކީ ރާއްޖެއަށް ބޭރު ފައިސާ ވަންނަ މައިގަނޑު ވަސީލަތްކަމަށާއި ރާއްޖޭގެ އިގުތިސާދާއި ވަޒީފާގެ ބާޒާރު ބިނާވެފައިވަނީ އެ ދާއިރާގެ މައްޗަށްކަން ސަރުކާރުން ގަބޫލުކުރަންޖެހޭ ކަމަށް ވެސް އޭނާގެ ޕޯސްޓުގައި ވިދާޅުވި އެވެ.
"ގިނަ ރިސޯޓުތަކުން ނަގާފައިވާ ލީނުތަކާއި އެހެނިހެން މާލީ ޒިންމާތަކަކީ ޑޮލަރުން އަދާކުރަންޖެހޭ އެއްޗަކަށްވާއިރު، ލިބޭ ޑޮލަރުގެ ބޮޑު ބައެއް މާރުކުރަން މަޖުބޫރުކުރުމަކީ ފައިދާގައި ހިންގާ ވިޔަފާރިތައް ބަނގުރޫޓުވުމަށް މަގުފަހިވާނެ ކަމެއް،" ފައްޔާޒް ލިޔުއްވާފައިވެ އެވެ.
ޑޮލަރުގެ މައްސަލަ ހައްލު ކުރުމަށް ކަމަށް ބުނެ ސަރުކާރުން އަޅަން ނިންމާފައިވާ ފިޔަވަޅުތަކުގެ ނަތީޖާއެއްގެ ގޮތުން ދިވެހިރާއްޖޭގެ އިގުތިސާދު ހިފަހައްޓައިދޭ ހަމައެކަނި ސިނާއަތް ސުންނާފަތިވުމުގެ ބިރު އެބައޮތް ކަމަށް އޭނާ ވިދާޅުވި އެވެ.
ރައްޔިތުންގެ މަޖިލީހުން މިއަދު ފާސްކޮށްފައި ވަނީ ރިސޯޓުތަކަށް ލިބޭ ޑޮލަރު އާމްދަނީގެ 40 ޕަސެންޓު އަންނަ އޮކްޓޫބަރު މަހުން ފެށިގެން މާރުކުރަން ލާޒިމުވާ ގޮތަށް ބޭރު ފައިސާއާ ބެހޭ ގާނޫނު ބަދަލު ކުރުމަށެވެ.
އެ ގާނޫނު ބަދަލުކުރަން ފުރަތަމަ ހުށަހެޅިއިރު މިވަރަށް ފައިސާ މާރުކުރުމަށް ހިމަނާފައެއް ނުވެ އެވެ. މި ބަދަލުތައް މިއަދުގެ މަޖިލިސް ޖަލްސާގައި ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ. އޭނާ ހުށަހެޅުއްވި ބަދަލުތައް ބިލުގައި ހިމަނަން ވޯޓު ދިނީ 47 މެންބަރުންނެވެ. އެ ހުށަހެޅުމާ ދެކޮޅަށް 12 މެންބަރުން ވޯޓު ދެއްވި އެވެ.
ރިސޯޓުތަކަށް ލިބޭ އާމްދަނީގެ 40 ޕަސަންޓު މާރުކުރުމަކީ ކުރެވޭނެ ކަމެއް ނޫން ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ވަނީ ބުނެފަ އެވެ. ރާއްޖޭގައި ހިންގާ 200 ރިސޯޓުގެ ތެރެއިން 146 ރިސޯޓު ތަމްސީލުކުރަނީ އެ ޖަމިއްޔާއިންނެވެ.
މިހާރު އޮންނަ ތިން މަސް ދުވަހުގެ ބަދަލުގައި ޑޮލަރު މާރުކުރަން ޖެހޭ މުއްދަތު ވެސް 28 ދުވަހަށް ކުރު ކުރަން ވަނީ ފާސްކޮށްފަ އެވެ.
ފައްޔާޒް ވިދާޅުވީ މި ބަދަލުތަކުގެ ސަބަބުން އެންމެ ބޮޑު ނޭދެވޭ އަސަރެއް ކުރާނީ ރިސޯޓުތަކުގައި މަސައްކަތް ކުރާ 43 ޕަސެންޓު ދިވެހި މުވައްޒަފުންނަށް ކަމަށެވެ.
"[ރިސޯޓުތަކުގައި މަސައްކަތްކުރާ] މުވައްޒަފުންނަށް ލިބޭ އާމްދަނީ ބޮޑުތަނުން ދަށްވުމުގެ ސަބަބުން އާއިލާއާ ދުރުގައި ގިނަ ވަގުތު މަސައްކަތް ކުރުމުގެ ޝައުގުވެރިކަން ކުޑަވެ ބޭރުގެ މަސައްކަތްތެރިންނަށް ބަރޯސާވާޖެހޭ މިންވަރު އިތުރުވާނެ، ނަތީޖާއަކަށް ވާނީ ރާއްޖެއިން ބޭރުވާ ބޭރު ފައިސާގެ މިންވަރު އިތުރުވުން،" ފައްޔާޒްގެ ޕޯސްޓުގައި ލިޔުއްވާފައިވެ އެވެ.
ރާއްޖޭގެ އިގުތިސާދުގެ މައިބަދަ ކަމަށްވާ ފަތުރުވެރިކަމުގެ ސިނާއަތް ފުނޑުފުނޑުކޮށްނުލައި ޑޮލަރުގެ ތާށިކަމަށް ހައްލެއް ހޯދަންޖެހޭ ކަމަށް ފައްޔާޒް ވިދާޅުވި އެވެ.
މަޖުބޫރުން ޑޮލަރު މާރުކުރުވުމަކީ ޑޮލަރުގެ ތާށިކަމަށް އޮތް ހައްލެއް ނޫންކަން ފާހަގަކުރައްވައި އޭނާ ވިދާޅުވީ ރިސޯޓުތަކުން ބޭންކުތަކަށް މާރުކުރާ ޑޮލަރު ރަސްމީ ރޭޓުގައި ވިޔަފާރިތަކަށާއި އާންމު ރައްޔިތުންނަށް ދެފުށް ފެންނަ އުސޫލަކުން ނެތްނަމަ ކަޅު ބާޒާރު އަބަދުވެސް އޮންނާނެ ކަމަށެވެ.
ޑޮލަރުގެ މައްސަލަ ހައްލުކުރުމަށް ސަރުކާރުން ގެންގުޅޭ ސިޔާސަތަކީ ދޯދިޔާ ސިޔާސަތުތަކެއްކަމަށް ސިފަކުރައްވައި ފައްޔާޒް ވަނީ ރާއްޖޭގައި މިހާރު އޮތް ޑޮލަރުގެ ތާށިކަމުގެ އަސްލު ސަބަބުތަކަށް ހައްލެއް ހޯދުމަށް ސަރުކާރަށް ގޮވާލައިފަ އެވެ.
