ޓޫރިސްޓު ފެސިލިޓީތަކުން ރާއްޖޭގެ ބޭންކުތަކަށް ޑޮލަރު މާރު ކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލަށް އަމަލު ކުރެވެން ނެތް ކަމަށް، ރާއްޖޭގެ ގިނަ ރިސޯޓުތަކެއް ހިންގާ ޕަލްސް ކުންފުނިން އެންގި ކަމަށް އިއްޔެ ރިޕޯޓުކުރި އެވެ.
ޕަލްސްގެ މެނޭޖިން ޑިރެކްޓަރަކީ ރައީސް ޑރ. މުހައްމަދު މުއިއްޒުގެ ޓޫރިޒަމް އެޑްވައިޒަރު މުހައްމަދު ހަލީލު އެވެ.
އެ ކުންފުނީގެ މެނޭޖިން ޑިރެކްޓަރުގެ ހައިސިއްޔަތުން އޭނާ ސޮއިކުރައްވައި، އެމްއެމްއޭ އަށް ފޮނުވި ސިޓީގައި ވިދާޅުވީ ޑޮލަރު މާރުކުރެވެން ނެތް ކަމަށާއި މިއީ އިންޑަސްޓްރީގެ ހާލަތާ ނުބައްދަލު ގަވާއިދެއް ކަމަށެވެ.
ޕަލްސް ކުންފުނިން ހިންގާ ރިސޯޓުތަކަކީ ނޮޓިލަސް މޯލްޑިވްސް، ކަނޑިމަ މޯލްޑިވްސް، ނޯވާ މޯލްޑިވްސް އަދި އެވަލަން މޯލްޑިވްސް އެވެ.
ސިޓީގައި ފާހަގަކޮށްފައިވާ މުހިންމު ކަންކަން
- ރިސޯޓުތަކަށް ޑޮލަރުން ލިބޭ އާމްދަނީގެ ބޮޑު ބައެއް ހަރަދުތަކަށް ހޭދަވާކަން ނޮވެމްބަރު 2، ގައި އެމްއެމްއޭ އާއެކު ބޭއްވި ބައްދަލުވުމުގައި ބުނެފައިވާނެކަން
- އޭގެތެރޭގައި ސަޕްލަޔަރުންނަށް ދޭ ފައިސާ އާއި މުވައްޒަފުންނަށް ދޭ މުސާރަ އަދި ލޯނު ދެއްކުމަށް ޑޮލަރުން ކުރާ ހަރަދުތައް ހިމެނޭކަން
- މި ހަރަދުތައް ކޮށްފައިވާ ގަވާއިދުގެ ދަށުން މާރުކުރަން މަޖުބޫރުކުރާ އަދަދަށް ޑޮލަރު ނުހުންނަކަން
- ބޮލަކަށް ޑޮލަރު މާރުކުރަން ކަނޑައެޅި 500 ގެ ރޭޓަކީ ސަބަބުވެރި އަދަދެއް ނޫންކަން
- މިކަމުގެ ސަބަބުން އެ ކުންފުނީގެ ވިޔަފާރިތަކަށް ގެއްލުންވެ ސްޓޭބިލިޓީ ގެއްލޭނެކަން
"މި ސަބަބުތަކަށް ބިނާކޮށް އެމްއެމްއޭގެ ގަވާއިދުގެ ދަށުން ޑޮލަރު މާރުކުރެވެން ނެތްކަން ދަންނަވަން. އަދި، މި ކަންކަމަށް ރިއާޔަތްކޮށް ގަވާއިދާ ދޭތެރޭ ދެވަނަ ވިސްނުމަކަށް ދާނެ ކަމަށް އުންމީދުކުރަން،" ހަލީލުގެ ސިޓީ ނިންމާލަމުން ވިދާޅުވެފައިވެ އެވެ.
ހަލީލުގެ އިތުރުން، ޔުނިވާސަލް އެންޓަޕްރައިސަސްގެ ޗެއާމަން، މުހައްމަދު އުމަރު މަނިކު (އެމްޔޫ މަނިކު) އާއި ރާއްޖޭގައި ގިނަ ރިސޯޓުތަކެއް ހިންގާ މަހުޖަނު ޗަމްޕާ މުހައްމަދު މޫސާ (އުއްޗު) ވެސް ވަނީ އެ ބޭފުޅުންގެ ރިސޯޓުތަކުން ވެސް ޑޮލަރު މާރުކުރެވެން ނެތްކަން އެމްއެމްއޭއަށް ސިޓީއަކުން އަންގައިފަ އެވެ.
ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން އޮކްޓޯބަރު 1 ގެޒެޓުކުރި ގަވާއިދުގެ ދަށުން އެ ފަދަ ތަންތަން އެމްއެމްއޭގައި ރަޖިސްޓްރީވުމަށް ދީފައި އޮތް ސުންގަޑިއަކީ އޮކްޓޯބަރު 30 އެވެ.
"އަދަދު" އާ ވާހަކަ ދައްކަމުން ޓޫރިޒަމް އިންޑަސްޓްރީގެ އިސް ބޭފުޅަކު ރޭ ވިދާޅުވީ އެ ގަވާއިދަށް އަމަލު ނުކުރާނެ ކަމަށް ބުނެ މިހައިތަނަށް 50 އަށްވުރެ ގިނަ ރިސޯޓު އޮޕަރޭޓަރުން އެމްއެމްއޭއަށް ސިޓީ ފޮނުވާފައިވާ ކަމަށެވެ.
