އިންފޮމޭޝަން ކޮމިޝަނަރުގެ މަގާމަށް އައްޔަނުކުރަން މަސައްކަތް ކުރަމުން އަންނަ އަބްދުލްއަޒީޒް ޖަމާލު އަބޫބަކުރު އެ މަގާމަށް އައްޔަންކުރުމާ މެދު އާންމުންގެ ހުރި ޝަކުވާތައް ހުށަހަޅަން އިތުރު ވަގުތު ދިނުމަށް ޓްރާންސްޕޭރެންސީ މޯލްޑިވްސްއިން ގޮވާލައިފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ފުރަތަމަ އިންފޮމޭޝަން ކޮމިޝަނަރުގެ މަގާމު އަދާކުރެއްވި އަބްދުލްއަޒީޒްގެ ޝަކުވާއެއް އޮތްނަމަ، ހުށަހެޅުމަށް މަޖިލީހުގެ އިދާރާއިން ދިނީ އެންމެ ހަ ގަޑިއިރެވެ. އެ މުހުލަތު މިއަދުގެ އިރުއޮއްސި 6:00 އަށް ހަމަވާނެ އެވެ.
ޓްރާންސްޕޭރެންސީން އެކްސްގައި ކުރި ޕޯސްޓެއްގައި ބުނީ ހަ ގަޑިއިއަކީ ޝަކުވާ ހުށަހެޅުމުގެ އޮންނަ މަރުހަލާގައި އާންމު ރައްޔިތުން ބައިވެރިވުމަށް އެކަށީގެންވާ ވަގުތެއް ނޫން ކަމަށެވެ.
ޝަކުވާ ހުށަހެޅުމަށް އެންމެ ހަ ގަޑިއިރު ދޭން ނިންމި ނިންމުން، ބަދަލުކޮށް އެކަމަށް އިތުރު ވަގުތު ދިނުމަށް އެ ޖަމިއްޔާއިން ގޮވާލައިފައިވެ އެވެ.
އިންފޮމޭޝަން ކޮމިޝަނަރަކަށް ގެންނަ އަބްދުލްއަޒީޒުގެ ޝަކުވާތައް ހުށަހަޅަން މަޖިލީހުން ދިނީ ހަ ގަޑިއިރު
އިންފޮމޭޝަން ކޮމިޝަނަރުގެ މަގާމަށް އަބްދުލްއަޒީޒް ޖަމާލު އަބޫބަކުރު އައްޔަންކުރުމާ މެދު އާންމުންގެ ޝަކުވާ ހުށަހަަޅަން މިހާ ކުޑަ ވަގުތުކޮޅެއް ދިނުމުން އާންމުންގެ ހައްގުތަކަށް ހުރަސްއެޅޭ ކަމުގެ ކަންބޮޑުވުން ވަނީ އުފެދިފަ. އަބްދުލްއަޒީޒަކީ މީގެ ކުރިން ވެސް އެ މަގާމު ފުރުއްވާފައިވާ ބޭފުޅެއް.
މިހާ ކުޑަ ވަގުތުކޮޅެއް ޝަކުވާ ހުށަހަޅަން ދިންއިރު، މީގެ ކުރިން ވެސް 20 ވަނަ މަޖިލީހުން ވަނީ އެހެން މައްސަލަތަކުގައި ވެސް މި ގޮތަށް އަމަލުކޮށްފަ އެވެ. މިހެން ހެދުމުން އާންމުންނަށް ލިބިފައިވާ ޝަކުވާ ހުށަހެޅުމުގެ ހައްގަށް ހުރަސްއެޅޭ ކަމަށް އިދިކޮޅު ސިޔާސީ މީހުންނާއި ބައެއް އާންމުން ބުނި ނަމަވެސް، މަޖިލީހުން އެ ކަމަކަށް އިޖާބަ ނުދެ އެވެ.
އަބްދުލް އަޒީޒް ޖަމާލު އިންފޮމޭޝަން ކޮމިޝަނަރުގެ މަގާމު އަދާކުރެއްވީ 4 ވަނަ އަހަރުން 2019 ވަނަ އަހަރުގެ ނިޔަލަށެވެ. އޭނާ ވަނީ މި ސަރުކާރުގައި ވެސް ސްޓޭޓް މިނިސްޓަރު ފެންވަރުގެ މަގާމުތައް ފުރުއްވާފަ އެވެ.
އިންފޮމޭޝަން ކޮމިޝަނަރުގެ މަގާމަށް އައްޔަނުކުރަން ސަރުކާރަށް ތާއީދުކުރާ އަދި މި ސަރުކާރުގެ ސިޔާސީ މަގާމުތައް ފުރަމުން އަންނަ އަބްދުލްއަޒީޒު އައްޔަންކުރަން އުޅޭއިރު، ދައުލަތުގެ ވުޒާރާތަކުންނާއި ރައީސް އޮފީހުން މައުލޫމާތު ހާމަަނުކުރާ މައްސަލަ ވަނީ ބޮޑުވެފަ އެވެ. އަދި، މި މައްސަލައިގައި ސަރުކާރާއި އިދާރާތަކައި ދައުލަތުގެ ކުންފުނިތައް ގޯސްކުރާތީ، މިހާރުގެ އިންފޮމޭޝަން ކޮމިޝަނަރު، އަހުމަދު އާހިދާ މެދު ސަރުކާރުގެ ހިތްހަމަނުޖެހުން ބޮޑެވެ.
އެ ގޮތުން މުއިއްޒު ވަނީ އާހީދަކީ އިދިކޮޅުގެ އޯޑަރަށް މަސައްކަތް ކުރައްވާ އިދިކޮޅުގެ އެޖެންޓެއް ކަމަށް ވެސް ތުހުމަތުކުރައްވާފަ އެވެ. ނަމަވެސް އާހިދު ވަނީ މި ވާހަކަަތައް ދޮގުކުރައްވާ، އޭނާ މަސައްކަތް ކުރަނީ ގާނޫނުގައި މަތިކޮށްފައިވާ ޒިންމާތަކާ އެއްގޮތަށް ކަމަށް ވިދާޅުވެފަ އެވެ.
